農曆七月初七，香港仔漁民延續傳統，舉辦海上盂蘭勝會，超渡海中孤魂。漁民後代與喃嘸師傅登上載着大士王的船隻，於鴨脷洲與香港仔之間巡航，沿途撒放水衣與水飯，另有小船隨行拋寶盆、放紙船，以慰亡魂，亦求安心。
當駛到曾發現浮屍的位置，漁民後代彭德偉緊張地叮囑船隻停留，讓喃嘸師傅多誦經。「香港仔發生事情，我念念不忘。水浸死嘅亡魂怨氣好重㗎，佢根本就唔想死，所以希望超渡，一年唔得、兩年唔得、三年唔得，一直希望超渡佢哋返嚟。」
昔日三夜大典，如今僅餘個多小時的儀式，彭德偉見證傳統淡化，曾經心灰，近年轉念：「你調返轉諗，漁民都有進化，咁你係咪人會開心啲囉。佢哋開心就 OK，所以傳統嘅嘢，我哋做到就做。」
消失的歌堂躉 昔逾千艇戶合辦盂蘭勝會
盂蘭節是漁民十分重視的節日，彭德偉自 14 歲隨父輩籌辦盂蘭勝會，至今逾 50 年。在最豐盛的 80 年代，香港仔一帶有千多二千艘艇戶參與。他受訪時張開雙臂，比劃漁民搭建的海上舞台「歌堂躉」的大小。每逢農曆七月，逾二十呎高大士王掛在躉頭，驅除煞氣，震懾鬼魂，旁邊還有兩艘貨船，一艘負責燒衣超渡逝者，另一艘則做大戲給亡魂觀看。
焚廿呎大士王 深夜海面拋寶盆求庇祐
其間，漁民會將寫有善信名字、內藏觀音經的寶盆拋入海中祈福，「想話畀下面聽，呢班人係善信，想你哋保祐」，當年寶盆多得裝滿十幾廿個竹籮。彭德偉指，拋寶盆必在晚上進行，祭祀儀式則通常在子時過後，最後大士會被架在海面焚燒，儀式完成時已接近天亮。
漁村文化漸淡 晚間儀式改白晝
直到 1986 年鴨脷洲火燒連環船，大批漁民失去住家艇後上岸，漁村文化開始式微。「個個搵唔到食，我點解咁辛苦仲要做漁民呢？搵唔到食就賣船㗎啦。」彭德偉表示，自長輩陸續去世，海上盂蘭勝會亦缺錢缺人，儀式在約廿年前開始改為在白天舉行，現年 66 歲的他已是熟悉漁民傳統中最年輕的一位，「老人家成日話『德偉唔夠錢喎』，我話唔夠咪夾啲囉，再唔夠咪唔做囉」。
大有大搞 細有細做 「我心意行先」
後代與傳統漁民文化疏離，彭德偉解釋，習俗難以依書直說，需要多年參與方能清楚了解，有些人亦未必能承受鬼神之事。「我阿哥話做多兩年唔做，又無錢又無人做，我話大佬唔好咁講，我哋幾個肯做就做，籌唔到錢咪做少啲囉，喃嘸佬六個，請唔到就請四個，再請唔到就請兩個，無問題㗎！我心意行先。」
「無政府資助，我亦唔需要求政府」
早十年，彭德偉也曾經對傳承感到悲觀，「年紀大之後開懷咗…… 一代傳一代，我唔做，可能有人做呢」。在繼承人出現之前，他盡力而為，不求政府資助，今年出錢出力花約三萬元舉辦法會，爽快一句「我哋成班人可以救到自己」。
坦然接受時代變「我只係希望做啲嘢」
坐在避風塘的小艇上，環顧身邊艘艘富人遊艇，彭德偉接受漁村風光不再。「呢個係年代變遷，無道理逆轉，你無理由仲要揸住話想當年，一家八口出海做到差唔多死，都係賺到一餐飯食。你睇啲女仔，個個隻手砂紙咁，讀乜鬼書。而家就唔同，我出去打工，六個仔女唔使咁辛苦，可以讀書。你調返轉諗，漁民都有進化，咁你係咪人會開心啲囉。我只係希望做啲嘢，令大家安心，呢個就係宗旨，呢個先係宗旨。」
