宏志閣重置|業權賣不賣 仍未確認賣樓的 22% 居民在想甚麼?

分享:

宏福苑大火至今七個月,政府今(26 日)公布,有 77.8% 宏志閣業主確認賣業權意向,會把宏志閣納入長遠居住方案。《集誌社》六月上旬訪問多名宏志閣住戶,面對 6.30 「死線」限期,直至今日,他們是仍未交表向政府確認賣業權的 22% 業主。有年長業主「十五十六」,預計最終無奈接受收購,惟擔心賣樓後再次上樓更無望;有人不滿當局態度強硬,稱「轉軚」不賣,卻多次接獲自稱建制派議員每日致電詢問。宏志閣業主、父母在火災中罹難的蘇先生冀重返宏福苑居住,不滿當局在委員會調查未有結果前, 要居民匆忙做決定。

政府指已有近 78% 宏志閣業主確認賣樓意向,仍未決定賣樓的 22% 業主,他們在想甚麼?(資料相片)

一家三口「十五十六」料接受現實

當局發出的收購建議信中,三個「同意出售」的選項分別是接受現金付款後自行作居住安排、接受現金並希望參與特設銷售計劃、及收取「樓換樓券」接受樓換樓安排。宏志閣業主、年逾七旬的袁女士說自己舉棋不定,只因賣與不賣似乎都前景未明:「唔賣你又不知所謂…你真係賣比佢,揀樓又未必揀到合心意。」

她說一家三口原本住在宏福苑四百餘呎的大單位,附近環境優美,早上晨運、飲茶、買菜都在咫尺,四十多年來如是。她本來希望重置於同區,但覺得設在山坡上、墓地旁的頌雅路西環境不佳,嘆 「好難同𠵱家(宏福苑)比較架啦。」她稱也有想過不賣,「但可能剩返你呢座樓都唔同以前環境啦。」

她說最初認為宏志閣未有受大火波及,以為很快可以回家。之後一直心儀原址重建方案,即使要等十年八載也願意,「我等唔到咪呀女等。」惟重建選項不再,她認為前景也不由居民自己決定,「今日我哋都要跟佢政策走啦……再堅持,我哋年紀都無咩精神、無咩能力再堅持落去喇。」

女兒任小姐亦擔心若不賣樓要額外付巨額維修費,稱若一直沒有原址重建方案,一家人最終料會選擇出售業權惟至今仍未交表。但她亦擔心業權一旦轉移到政府,當局會更罔顧居民需求:「賣咗畀佢、業權喺佢度,可能我哋已經無 say。之前業權仲喺我哋度都諸多限制啦。」袁女士亦說仍有很多物品未及收拾,「𠵱家咩都無講,淨係話要交表,交咗表係咪無得上樓呢?」

有年邁業主原擬賣業權,因對政府各項安排感不滿而「轉軚」,但每日收自稱建制派議員致電查詢意向。(資料相片)

業主「轉軚」拒賣樓 消息公布再動搖

在宏福苑出生、長大,婚後搬出也一度繼續租住同屋苑單位,宏福苑對黃小姐和很多街坊而言除了是資產,也是一份情:「唔係學司長講話斷捨離就斷捨離。」她說身為業主的媽媽原已打算賣業權,因擔心之後無法再以同樣呎價出售,老人家也只想早日可以安居,「佢覺得鬥唔贏政府。」

惟當局一度稱不排除立法收購,兩次上樓又諸多限制、是否能再回家也是未知之數,讓母親逐漸不滿,「佢就覺得個單位係我嘅,點解你會咁?然後就覺得咁我唔賣了。」兩次上樓期間有宏福苑居民貼出「原址重建」標語,之後都一一「被消失」。但黃小姐說媽媽看見了字,發現不止自己認為此時收購不合理,更堅定了不賣樓的決心。

隨「630 死線」臨近,黃說不時有解說員、自稱建制派議員人士每日致電,「每日(下午)三點幾就打來話你會唔會賣啊,媽媽已經話唔會賣、你地唔好再打來,第二日都係咁。」面對政府今公布有近 78% 業主確認出售業權,黃再度猶豫,說需時消化和考慮。

宏志閣大火中未被波及,有業主稱即將退休、無力再供樓,質疑「屋企無事無幹你點會賣?」(資料相片)

無力再供樓業主拒出售 斥合安以修復費「嚇人」

當局早前指要有四分三或以上的業主,在 6 月 30 日或之前簽署及交回收購信、確認願意出售單位予政府,長遠居住方案才會開放予宏志閣。宏志閣業主鄭先生稱自己將屆退休之齡,無力再供樓,出售業權的所得金額亦料只能換來比原先單位狹窄不少的居住環境,「一定搵唔到(差不多面積),350 幾萬,清水樓又要裝修,扣扣埋埋剩返 300 鬆啲,買到咩樓呢?我都唔知。」

他稱宏志閣單位沒有受火災波及,不願意出售「一定唔交」,「除非真係燒咗就會考慮賣,屋企無事無幹你點會賣?」管理人公司合安稱修復宏志閣要花費 3000 萬、需時九個月,鄭認為即使需要修復,亦應由大維修基金和保險賠償支出、而非由居民再自掏腰包,但指合安並無清楚交代由誰負擔,「其實佢都好模糊,佢只係將呢舊錢用來嚇人囉。」

蘇先生批評政府如「綁架層樓」不讓居民返回居住,至今仍拒公開驗樓報告。(資料相片)

難屬決心不賣 批政府「綁架層樓」

宏志閣業主、父母在火災中罹難的蘇先生亦冀重返宏福苑居住,他與太太決心不賣:「樓換樓就唔係樓換樓,係由頭來過,我就梗係唔選。你依家夾硬、可以話係綁架我哋層樓,唔比我哋入返去住啫。」

他認為讓宏志閣居民重返單位居住是最低成本做法,「如果你比我選擇我會入返去住,我乜都唔使郁,係咪?你話可能要三千幾萬整過,除開都係每戶十二萬左右,都未講話保險可以賠到。」「點解要出去又要比律師費、又要轉過曬啲按揭、又可能要裝修,嗰度講緊係四五十萬呀分分鐘,我點解要郁咁多嘢呢?」他稱宏志閣未有受大火波及、宏建閣亦只有一個單位受影響,「點解你唔畀人入去住,你畀返一個真正理由……一直都喺度話燒毀嚴重,但嚴重程度去到邊,你要畀個標準人哋先得嘛,你唔畀標準,人哋點考量下一步點做?」

蘇先生不滿當局至今未公開驗樓報告、委員會調查亦未有結果,卻要居民趕在八月底前做決定,「都等咗半年,你咪等埋個報告出來睇下點,邊啲人要負責、個後續係點,街坊個決定都會唔同。係咪真係要咁趕 831 前做決定?我覺得唔係。」對於政府今公布 77.8% 業主確認出售業權,他質疑「數字任佢講咋喎」,現時仍堅持不賣。

有業主堅持宏志閣未被波及、實可返回居住,加上合安未交代維修、費用分擔等細節,卻迫業主作決定不公平。

業主批數據不透明「唔知點相信」

黃小姐一家是宏福苑一手業主,父親前年過身後,續與母親和弟弟同住,亦不願賣業權。對政府的公布,她表示「預咗」,但對現時「要我哋冇燒呢棟都一定要賣埋畀佢」,感到很傷心和憤怒。她批評,政府一直以來的數據不透明,居民未能開業主大會、即場投票知道街坊意向,只能接受政府公布的數字,「我唔知點樣可以相信」;亦認為現時只是交回意向書、沒有法律效力,不必然代表確認賣業權,或涉「語言偽術」。

合安今表示會在 7 月內舉行業主大會,但「不應亦不會」處理出售業權事宜。黃小姐質疑,大會議程應由業主決定、合安亦未講明確實開會時間,質疑公司只是從方便自己出發、「話畀其他人聽我做咗喇」,並非真實為業主着想。

黃小姐一家原已決定,未有更清晰資訊前,6 月 30 日前不會簽署意向書。政府今公布後,她指需與家人再商量,但暫時意向未改變。她強調宏志閣與其他七座不同、沒被火災波及,「我棟樓冇燒,點解你無啦啦要收我棟樓,仲要喺一個所有資訊都唔清晰嘅前提下收我棟樓?」,認為在維修時間和費用分擔等均欠細節下,要居民做決定很不公平,「無論限期幾多都好,我唔會想賣呢棟樓」。

政府早前指可能立法收回餘下業權、業主或需自行在市場解決等,黃小姐稱已有心理準備、「唔擔心得咁多」,仍堅持當局先提供更多資訊,強調明明可返回宏志居住,硬要賣樓卻買不回同區單位,「我嘅心理係非常之唔正常」。她批評當局或知道沒有能力強硬收回,就在 6.30 前「放風」、「出口術」以壓力和輿論影響街坊決定,但身邊仍不乏街坊未交回意向書,盼透過大會了解意向。

相關報道:宏福苑重置|政府將收購宏志閣 指 78% 業主願賣業權