大埔宏福苑發生五級火，政府重提以金屬棚架取代竹棚架，外媒則關注竹棚風險。入行超過 30 年的搭棚師傅李家俊為竹棚「平反」，指竹棚沿自廣東省，歷史過百年，竹材内含有水份，有一定礙燃性，歸根究柢，他認為是與工程管理疏忽有關。
李師傅指，近年屢有棚架倒塌意外，政府已多次提出以金屬架取代竹棚，又提到內地近月更開始不讓原材料運港：「杉木已不可以嚟香港，害我最近搭戲棚要用鋼通來補救不足，變成整個戲棚失咗真；好似遲啲連竹也不准運來香港，如果屬實，就連竹棚都無喇。」他提到，香港約七成地盤都用竹棚，要一時間全部轉用金屬棚架會較困難；而金屬棚手藝含量低、體力消耗大，相信業内數千名竹棚師傅轉型不易，最終或遭淘汰，面臨失業。他強調香港傳承了竹棚工藝，規格水平高，竹棚被視作藝術品、「係值得做落去」。
大火後政府重提以金屬架取代竹棚，業界紛為竹棚平反，重低竹易燃性低；有業界亦提出一旦遇火，金屬受熱達到某個高溫時較易倒塌。（資料相片）
金屬棚無需技術、雜工可做 惟搭建需時、成本較高
李師傅形容，搭建竹棚，高空工作，當然具危險性，但熟能生巧，屬純工藝技術型，跟搭金屬棚架截然不同。「兩回事嚟嘅，金屬棚架是一條一條砌上去，雜工都可以做到，唔需要甚麼技術，有體力就可以了，唔會請搭棚師傅做。」
據他了解，目前業內竹棚師傅平均年齡 40 歳以上，體力難比年輕人，加上竹棚師傅日薪約 2000 元（註：建造業總工會指引為 2150 元），相較金屬棚架工人千多元的日薪（註：工會指引為 1650 元），高出不少。「金屬棚架我都做過，我都識做，但鐵架好重，體力要好大，而且一到夏天，金屬棚會好㷫手。」他又指，早在他學師時，已有聲音提出棄用竹棚：「咁多年都仲係用緊竹棚，就證明有存在價值。」
他強調，竹棚靈活度高，特別適合香港建築業分秒必爭的特性：「香港咩都話趕時間，大廈地盤搭個竹棚大約十日，搭個鐵架一個月都搭唔完。」以成本論，大廈維修一般由居民共同出資，金屬棚架成本較高，搭建需時，全面轉型亦非易事。「而家仲有年輕人入行嘅，職訓局有培訓，入到嚟就跟師傅做，不過十個入嚟，最多得兩個會做到落去。」
李家俊師傅指搭棚為高空工作，具一定危險性，需要師傅的體力和工藝技術。（資料相片）
集誌社檔案：五級火掀起「取代竹棚之爭」
宏福苑五級火後，當局交代初步調查時，提及棚網、防水帆布等著火後蔓延速度快屬不尋常，而封窗的發泡膠板或令火勢蔓延。不過，同日發展局與建造業界會面時，發展局局長提及竹棚耐燃性不及金屬棚架，建議為符合工作情景的工程，擬定「較進取路線圖」改用金屬棚，但強調「非一刀切」。
前天文台台長林超英其後在社交平台發文指，「易燃的圍網和發泡膠是明顯的物質禍首，何以被追究的對象竟然是相對不易燒着的竹？」，又質疑 2009 年起的「屋宇更新大行動」令無數市民「吃了大茶飯團夥的苦」，質疑「為甚麼出事，只見『物質』，不見『人』和『制度』？
消防顧問梁錦得指，竹不是易燃品，要將竹變成助燃器要符合一定條件。他說「竹係燒得著，但唔係咁易燒，你試下喺街邊搭竹棚時，拎個火機燒下睇下係咪點得著？唔係咁易。」他相信大火成因是，棚網著火、火勢蔓延快令發泡膠板著火，再通過窗戶傳入住宅單位；眾多單位著火，亦令整幢大廈溫度更高、反過來燒著枝竹，致火勢一發不可收拾。
面對坊間質疑，發展局在 28 日再發文指評論認為政府意圖將矛頭指向竹棚，「是對政府立場的錯誤解讀」，強調跟進行動是全面進行、不會只針對某類棚架，重申多年來已有意思認為香港以竹棚為主流，與國際慣常做法不同，又指金屬棚能提供更工整通道、平台和走道，有助提升工地安全。
前財政司司長曾俊華今日亦發文指，要從悲劇中汲取教訓，但不應太快作結論，「去判『竹棚』死刑」，他指「有普通常識嘅人」都知道竹不易燒著，而金屬棚架遇上極高溫時亦有機會倒塌。他又指從現場片段所見，棚架經過幾十小時大火焚燒之後，仍然未有塌下，被燒毀的主要是棚網和封窗發泡膠板，因此「造成今次慘劇嘅『罪魁』，顯然唔係竹棚呢種建築材料」，他續反問是否應從人為角度出發調查？如火災是否因有人吸煙引起？ 是否採用了不合格物料呢？制度上是否有需補足地方呢？
他亦提及搭棚在香港以至廣東地區，已有四、五百年歷史，戲棚技藝已被列入香港非物質文化遺產，如因今次事件貿然決定禁用靈活有彈性的竹棚，係非常可惜。他又補充從實際角度睇，全港超過六成私樓的樓齡達 30 年及以上，「依家啲舊樓一做大維修，啲業主就呻要支付天價維修費，如果全面以金屬棚架，代替造價平一截嘅竹棚，普羅市民係咪承擔得到呢？」
李師傅指竹棚有逾百年歷史，源自廣東省，香港一直承傳嚴謹的規格，跟足每年橫竹、直竹一定尺寸。（資料相片）
源自廣東省 港承傳工藝、規格
竹棚架非香港獨有，有業界形容香港和澳門是全世界「唯二」仍用竹棚地方，李師傅則說在部分廣東省城市仍然見到，但棚架規格水平已不及香港。「以前最厲害嘅師傅都嚟自肇慶、增城，手藝都係嗰邊傳來，香港就一直承傳嗰個規格，每條橫竹、直竹都有一定尺寸，跟到足，做出嚟（外觀）效果至靚。」反之，內地師傅未有按規格搭建，竹棚美感欠奉，工藝亦逐漸失傳。
惟他坦言，資深師傅如他般，年紀已不輕，而搭建金屬棚架，方法截然不同，要重新學習，師傅或則選擇轉行，或則索性退休。「廿幾歳嗰啲就容易轉行，四十幾歲就很難再轉行；我們做唔到㗎，體力消耗好大，佢哋（判頭）都未必請我哋，請個咩都唔識，都比請我哋好；所以（棄用竹棚）對行業係好大打擊，我哋呢班搭棚師傅就會被淘汰，全部失業，工藝唔承傳，慢慢就會失傳。」他直認無奈，但形勢被動。
集誌社檔案：金屬棚工逾 1.3 萬人 多竹棚工逾三倍
根據建造業議會數據，截至2024年底，竹棚工註冊人數有 3065 人，其中逾 2200 人屬熟練技工、逾 800 為半熟練技工。至於金屬棚架工則有 13723 人，其中逾 10400 人為熟練技工，3200 多人為半熟練技工。
建造業總工會指引搭棚工日薪應為 2150 元，據統計處「由主要承建商填報有關從事公營建築工程的工人的每日平均工資」，在 2025 年 1 月，棚架工日薪為 $1502.4，在 39 個工種中屬第 12 高。高空工作有一定風險，近年屢發生竹棚倒塌意外，造成嚴重工傷，發展局推動工務工程使用金屬棚架，令傳統搭棚工人憂慮日後生計。
入行初年「搵命搏」後投身戲棚 工藝成「非物質文化遺產」
李師傅入行多年，2017 年一度全身投入搭戲棚，今年 4 月天后誕、全港唯一一個搭建於懸崖邊的蒲台島戲棚亦有其手筆。他回想當年中學畢業到地盤打工，最初做墨斗，後來遇到一位搭棚老師傅找他幫忙計數埋數，再叫他學搭棚。「嗰時後生，都係睇錢咋，因為人工比做墨斗高幾倍。嗰時墨斗千幾蚊一個月，但做搭棚有五、六千蚊，嗰時一個月搵五、六千元好多㗎，雖然唔係一定開足工，但比墨斗舒服好多。」
他憶述當年第一個上班的地盤，是銅鑼灣富豪酒店一期：「當時有 30 多層高，真係好驚呀，但慢慢就習慣咗。」以地盤工種而言，搭棚雖然屬高空工作，但只要掌握技術，熟能生巧，也不算很高危。「我哋行内有話『要坐穩』喺棚上，最難掌握，但都係熟能生巧。」他有試過給吹跌，整個人反轉：「死攬住條竹，唔好俾自己跌落地。」
香港戲棚搭建技藝於 2017 年被列為非物質文化遺產代表作名錄，有份搭建蒲台島戲棚的李師傅認為，竹棚對不少人而言是藝術品，值得承傳。（資料相片）
那些年，李師傅坦言「搵命搏」，事關當年工業安全意識尚低，上班只戴太陽帽，安全帶可戴可不戴。「（安全帶）環腰式，好似腰包，多數唔會扣，嗰時嘅文化就係咁樣，無得話驚，師傅話驚就唔好做。」過去 30 多年，行業隨經濟而發展，但亦不時面對衝擊，譬如 1997 年金融風暴：「嗰時都曾經轉行，做過好多行業，揸貨車都試過，嗰時後生呀，但後來又做返（搭棚）。」前幾年新冠疫情，當時全職搭戲棚的他亦半年無工開，遂重回建造業。
「以前都有人睇唔起做地盤，叫我哋搭棚佬。」時代變了，安全意識提高，香港的戲棚搭建技藝亦於 2017 年被列為非物質文化遺產代表作名錄。
蒲台島擁全港唯一一個搭建於海邊的戲棚，每年天后誕吸引不少人慕名而來。（資料相片）
「竹棚係好神奇，係值得做落去」
多年來，李師傅承傳超過 30 位徒弟，不少學滿師就往外闖，也有人開公司做老闆：「有返咁上下（手藝），就有自己嘅生活㗎喇，唔會一世痴住我呀，而家仲有幾個跟住我（開工）。」
問到行業再低潮亦未有轉行，是否搭建竹棚別具魅力，李師傅妙答：「習慣咗啫，唔係咩魅力，係要搵食。」搭棚搵錢多？「除咗錢之外，搭咗個竹棚出嚟，人哋覺得外觀好靚，係藝術品嚟，自己都會有滿足感，咁多年，我都仲有㗎；有啲人話搭棚師傅好勁呀，有人咁樣稱讚自己，尤其對外國人嚟講，竹棚係好神奇嘅事，咁呢啲，就覺得係值得做落去。」
相關報道：致命工傷｜工權會指各行業全年 74宗致命意外 世紀暴雨兩工人死亡
蒲台島天后誕｜懸崖上搭戲棚 入行逾廿年師傅：尚有餘力，願搭棚到老
