宏福苑居民第二輪回家，今天（23日） 是第三日，有居民在窗外貼上「伴我成長」、「多謝你」的字句，有居民表示，想原址重建，但政府並沒給予居民這個選擇，「唯有話自己唔好彩，即係啲人做錯咁多嘢，咁就搞成咁，都無辦法咯。」有業主指，一夜之間，數千人無家可歸、失去百多條人命，「真係好難放低。」她指由大維修、圍標開始，業主完全「冇 say」，政府部門集體失職，沒議員為居民發聲？「公道呢兩隻字，喺香港係咪已經消失咗？」
「公道呢兩隻字，喺香港係咪消失咗」
宏盛閣居民洪女士，中午離開宏福苑時表示，今次回家為了「懷緬、經歷多次屋企嘅時間」。她透露，首次上樓時，整個宏福苑面目全非相當震撼，「一路行上去嗰陣，心情好激動，因為窗外會望到出邊海景，一路望上去望到屋企海景。」今日再上樓，她仍然千頭萬緒，不知從何收拾。
宏福苑是她退休的安樂窩，歷劫後要入住過渡屋，她每個月放假，都會回到元州仔公園，「雖然返唔到上去，我都要去睇一睇，𠵱家我可以唔使數、逐層數，我都可以認得邊道窗係我屋企」。她暗寸高官，形容自己一家三口，合共住了七十幾年。她說：「唔係賣咗間屋我就可以一了百了，始終我哋經歷過。」
「我唔想講呢兩個字（告別），但我有好似以前咁，執完嘢、坐喺梳化到，望住屋企海景⋯⋯畀個腦完全發吓吽哣，唔諗咁多嘢。」
「真係好難放低」
洪女士連月來受盡精神折磨，她說不斷有新消息消化，「叫我哋面對現實，有時真係好難去面對現實，特別好似我哋呢啲接近退休，人生規劃、已經規劃好晒」。從大維修、圍標至今，洪女士說：「冇一樣嘢我哋有 say」，她指居民試過罷免法團、揭露工程問題，尋求政府部門協助但無得到正視，「搞到一夜之間，幾千個人無家可歸、百幾條人命，真係好難放低。」
政府公布安置方案，要求居民在下月底決定出售業權，洪女士屢次重申，「無一樣嘢可以話，有得我哋Say。」居民力爭要開業主大會，洪女士認為當局不是沒有聽到訴求，只是拒絕回應，「唔係賣咗業權就一了百了，仲有好多善後嘅嘢，你唔使還返死者一個公道咩？唔駛對我哋宏福苑幾千個人有個交代咩？」她說：「呢個唔剩係宏福苑嘅悲哀，全香港業主嘅悲哀」。
她怒斥，「你𠵱家唔係一個人問題，係幾個部門集體失職。但請問半年咁耐，咁多輪聽證會，係已經赤裸裸地部門失職，嗰啲高高在上，坐喺立法殿堂嘅議員，有無一個為我哋宏福苑出過聲？我已經就嚟懷疑，公道呢兩隻字，喺香港係咪已經消失咗？」
洪女士又質疑，政府除了催促居民出售業權，是否真的有從居民角度出發。她以「樓換樓」為例指，政府並非提供與宏福苑呎數相約單位；而成立有限公司動用善款收購業權，又是否合法，「係可以使用呢筆善款嘅咩？合唔合乎程序？合唔合乎法例？如果你合乎法例，係咪要（再）立一條法例去完善？」
「粟米肉粒飯」與「肉粒粟米飯」之分
洪女士直言，「我哋根本唔知自己前路喺邊度」如今大維修的圍標問題持續，自問無辦法再置業。「你叫我點有信心係香港買樓？」她指，政府的重置方案之別，如同「粟米肉粒飯」與「肉粒粟米飯」。「最終係賣同唔賣嘅分別，唔賣，咪立法叫你賣囉，其實我哋得一條路，但呢條路係咪我哋想行，有冇問過我哋意見？冇人 care 我哋感受。」
「𠵱家香港地，真係好神奇吖」
宏盛閣原定在 5 月 27 日至 29 日再上樓，洪女士一家因時間問題需作提早調動，她不忘再嘲諷說，「不過呢樣嘢要多謝政府，好有人性㗎⋯⋯當然啦，前提係要多得幾個失職嘅部門、集體失職，先至令到我哋有機會。多謝香港政府、喺度多謝香港政府，『特別恩恤』等我哋可以改日子返屋企。第二件事就係，或者可能要恭喜一啲，因為宏福苑呢件事而受勳嘅人，我唔知佢會唔會封返個金紫荊勳章畀黃碧嬌，好難講，𠵱家香港地，真係好神奇吖！」
「啲人做錯咁多嘢」
宏泰閣高層住戶莊女士說，居於宏福苑 42 年，子女都在此成長，她說要「多謝個家」，此行會在單位外的景色拍照、懷緬。她指，居民訴求是召開業主大會、有街坊堅持原址重建，如早前提議局部重建兩至三幢樓宇，讓居民自由選擇入住與否；或重新開放只有個別單位受損的大廈，惟政府沒給居民這個選擇，她自嘲屬於居民幻想。
「唯有話自己唔好彩，即係啲人做錯咁多嘢，唔肯好好哋做好自己本分，呢個又唔理想、嗰個又唔理想，咁就搞成咁，都無辦法咯。」
在宏仁閣，有回家者在窗貼出「伴我成長」、「多謝你」的字句。
莊女士指，已收到政府就居民出售業權的掛號信，她形容「好似驚死你唔要咁」，但目前她仍未決定選項，「睇都費事睇，等佢最 last 先至諗，因為咁多嘢你真係處理唔到。」
「我想翻返嚟囉」
嫁入宏福苑的宏建閣居民秦小姐認為，收購方案目前仍未明朗，需與家人「諗清楚」。她指，本身預想會在宏福苑「住一世」，這個安樂窩也十分「旺丁」，常有朋友聚會，未料會演變成今日情況。她批政府迫居民出售業權，「你問我最好嘅選項，我想翻返嚟囉，因為我唔使諗咁多嘢、唔使考慮咁多嘢⋯⋯佢哋好似畀好多選擇我，但其實又好似無選擇咁。」
如果政府唔做嘢，咁我哋可以做啲咩？
下午上樓的宏仁閣住戶溫先生指，政府要求居民配合，街坊均已盡可能配合，目前也無其他可選方案，只望政府能夠「做多少少」，如要購置同區類似單位，現有金額並不足夠，以他年紀也難承擔按揭貸款「嚟緊將來香港環境係點，適唔適合再去供樓，或者去買一層樓供咁耐，我亦都有保留。」他比喻說，宏福苑如「老爺車」其價值見仁見智，他則早已習慣居所，今日也打算取回家中日用品。
惟溫先生指，居民只是一介小市民，沒能力與政府對抗，「如果政府唔做嘢，咁我哋可以做啲咩？」目前仍未有業主大會，溫先生期望在賣樓期限前召開，讓街坊可以理性討論出路「大家睇到嘅，唔需要我哋多講。如果你認為香港政府已經做咗佢哋嘅嘢，咁我哋都無話可說。」
罹難街坊需要一個道歉
溫先生又指，撇除安置問題，罹難街坊需要一個公平、合理嘅道歉，「咁有無？」他關注，如日後街坊各散東西、對宏福苑的連繫解散，「咁仲可唔可以發言？仲可唔可以仲有權去講嘢呢？」
現時聽證會揭露多個部門在事件的所涉部分，溫先生指，「你承唔承認呢次火災係人為？如果唔承認，係意外嘅，咁咪無嘢講囉。佢哋（罹難者）就係意外死⋯⋯如果呢個聽證會講出嚟，大家都認為無人需要負責，咁咪無人需要負責囉，呢個唔到我去判斷⋯⋯大家都係成年人，唔需要再問啦。」
工作 11 載印傭 與婆婆入住過渡性房屋
原本在宏仁閣工作的印傭 Sholikah，今早與僱主一家上樓，她說，為家庭工作 11 載，希望尋回個人證件、衣物。現時 Sholikah 仍與婆婆一同於江夏圍的過渡性房屋生活，但老人家仍不適應，常說宏福苑更方便。她說，11年的時間，「睇呢啲（大火）都好似好痛苦，因為好似自己屋企咁，有嗰啲回憶」今日會與單位道別。
期望有平台能反映居民意願
居於宏盛閣的張氏一家，今午一家四口上樓。張太說，第一次上樓時，聽從建議沒有帶同兩位小朋友上樓，今次也再帶回上次遺留的首飾、絕版書。張太指，一家人在宏福苑居住 12年，但考慮到今次或是最後一次上樓，「難得可以一家人返去，就影吓相留念。」
仔仔信睿把玩著手頭上的「核突膠」玩具，上樓後，他發現家中還有大火前，收到的曲奇餅，試吃一口知道食用日期已過而發霉；如果可以，他還想再回家。
張太說，考慮到地段、金額，對是否出售業權仍然舉棋不定。張生補充，有收看合安簡介會，但說法「三幅被」、街坊問題也被忽視，半小時已離開線上會議。他說，政府安排好所有計劃，對小朋友而言是「梗係好啦」，「但我哋大人嚟㗎嘛，成年人、業主嚟，我哋唔係淨係要A、B、C嘅 option，我哋想有其他嘅 option，原址重建其實係好多居民都想，但係奈何，其實你見個情況，其本上無可能係發生，我自己真心希望，能夠有個平台，畀居民去表達自己嘅意見，能夠可以真係反映出嚟。」
曾太：大家可否救番我哋宏福苑的居民？
曾太於 1983 年搬入宏盛閣居住，一家四口現於大埔區暫租居所。她說至今仍希望最後可搬回這個家居住，「你問搬回來的機會高唔高？可能好低…..但我都想跟街坊一起盡力，大家可否救番我哋宏福苑的居民。」
她說，希望聽證會能落實給居民一個答案，才決定是否賣出業權。「聽證會訪問了這麼多人，希望有一個答案，但現在仍未獲得這個答案。8 月 31 日交表期限，我們沒打算交表，共有八座這麼多的居民，若大部份都不簽署，是否可以推遲才決定？」
