宏昌、宏仁閣居民昨天（24日） 首日上樓，有 115 戶，共 424 位低層單位居民回家。今日（24日） 兩座的居民繼續回家。在大火中失去妻子、曾在聽證會作供的葉家駒，今天回兒子的家。他說，回家路上心情好複雜，因為路上會經過自己的家宏泰閣，才到宏昌閣。
回家路上心情複雜
太太為救人命喪宏泰閣的葉家駒，獲安排返回細仔位於宏昌閣單位。他指，早前已看過單位相片，情況「應該唔算太差」估計有不少東西可取回。雖然回家沒特別準備，但葉指，回家路上心情好複雜，因為路上會經過宏泰閣，才到宏昌閣，「咁嗰條路係我哋經常會行，𠵱家情況係點？唔知。」葉提到，雖然期望回家路上可以拍照，但現實是政府不許可，故不會堅持。
他說，今日與兩位兒子、媳婦重回宏福苑，一家人已商討執拾策略，希望盡可能在三小時，「攞到我哋想攞嘅嘢」包括證書、證件、兒子的獎牌；以至太太送給新抱的金器，形容三小時如搬屋，時間基本上不足。
葉表示，雖聽說有民安隊在場協助搬運，但沒打算多次上落，會先將所有物品擺好，再一次搬走，「盡量唔會浪費時間上上落落。」會否期許再次上樓？葉家駒說，「呢個唔係我哋準唔準備，我哋希望能夠有，咁佢哋會唔會再安排畀我哋，要睇政府點做。」
葉先生的妻子葉白瑞蓮，火警當日拍門通知鄰居離開，錯失逃生時機，在濃煙中逃回家中罹難。他在作供時，曾細數工程問題，批評有人仍千方百計逃避責任，「侮辱自己職責、專業」，難以給宏福苑一個交代。
要求改期政府未回覆 粉碎性骨折居民撐拐杖上樓
宏昌閣七樓住戶郭先生，月初因弄傷左腳導致粉碎性骨折，仍一拐一拐地與數名友人到場上樓執拾，「我驚我錯過咗呢次，就無機會再上樓，我都有衡量過，七樓啫，唔係高層，我應該上到去嘅」。他指有嘗試行樓梯，但未試過行足七層，今天需以拐杖支撐上樓，亦有自備頭盔，以及摺椅方便休息。
最希望取回舊水壺
郭先生自出生起居於宏福苑，居住約 30 年。他堅持帶傷上樓，全因這是已故父親的家，「入面有好多佢嘅日常用品，有佢嘅記憶喺入面，屋企會有佢嘅感覺」。他最希望取回的是一個水壺，「因為嗰個水壺用咗好多年，可能三、四十年都用緊同一個水壺，有時會有啲漬，老竇又會搵啲檸檬汁、梳打粉，黃咗又會清潔返，係有好多回憶」。
有回憶的還有家中每個角落，尤其是客廳，「爸爸晚年嘅時候，其實佢郁動都唔係好多，好多時都係喺個廳度坐、睇電視，嗰部份嘅回憶會多少少」，加上自己小時候亦會在走廊、樓下與街坊玩耍，回憶遍佈每片磚瓦。
「返嚟嘅時候，會有一啲（感覺）就係，以後都見唔到呢個地方喇，會好似少咗啲嘢咁」。
郭指，火災後未有收過家居相片，估計損毁程度不算太嚴重，「無論佢（舊居）係咩情況都好，我都覺得要返去照顧吓呢個屋企，我就抱住最大希望上去，希望上到去冇乜事」。
受傷想改上樓時間 政府一直未覆
郭指，他曾透過社工查詢可否改時間上樓，但至目前為止仍未收到政府當局回覆是否可以改期，「個結論就係積極安排，我明白積極安排係有機會嘅，但即係都係有機會唔得啦，如果我得一次機會嘅話，我用呢次機會上去，比起我會唔會整親隻腳重要少少」。他坦言，自己個案的嚴重程度或比其他街坊輕，「我明白唔會係佢（政府）想特別安排嘅個案，又唔會有啲咩好bad feeling（難受），但純粹會覺得，如果可以俾多兩個星期我在康復多啲，我想去會舒服啲，咁就好啦」。
相關報道：
宏福苑回家．災廈眾生｜「拜拜喇，702！」 撐拐杖上樓梯 記低最後一次窗外風景
宏福苑回家｜瓦礫中挖掘嫁妝
居於宏昌閣低層的李生、李太，下午行裝輕便地離開宏福苑。李太說他們居於宏福苑逾 20 載，去年年中完成新裝修後住了四個月便遇上大火。從李太提供的相片及影片可見，單位被燒的焦黑，地上滿佈雜物和瓦礫，睡房、客廳難辨
李太稱進入單位後要用工具挖掘，李生形容兩人「掘足三個鐘，掘晒、盡掘」，但時間有限，於是只集中在主人房。李太形容單位環境漆黑，兩人一邊提著燈、一邊挖掘，哽咽稱最終只起回少量金飾，「嫁妝⋯⋯啲金器唔係揾得好多，仔仔啲證書全部燒曬。」
她稱裝修原意是為了讓兒子「有間房」、住得較舒適，「我哋兩個老嗰時喺嗰度⋯⋯係囉」。
居民哭訴 想跟家人在屋內好好渡過最後一小時
居於宏仁座中層的胡小姐今早偕友人到場，她稱今早心情緊張又激動，「有少少頭痛」，料收拾兒時相片、相機鏡頭等，但未知家中情況如何。於是她做足準備，背上登山背囊、帶餅乾以補充體力，但仍擔心自己體力不足應付，「但因為係自己屋企，所以一定要返去。」她稱原擬借用工具惟遭臨時取消，故近日勤練習上樓梯，又戴上腰封、護腕等裝備，「要話畀自己聽係得嘅！」
要「限時上樓」，胡小姐說，家中沒有燒毀，大部分物品都在，只能盡量執啦，「三個鐘頭，好難執到咁多年嘅嘢」。胡小姐哽咽稱最希望可以再次偕父母上樓，有機會在家中再彈一次帶不走的琴，不必忙於收拾，安坐家中團聚、與居住了四十年的家好好道別。「係間屋享受一吓最尾⋯⋯希望可以同家人一齊度過最後呢一個鐘頭，回憶一下多年的記憶」。
宏仁閣12樓居民朱伯伯，今午乘搭穿梭巴士返回大埔墟站。兩手空空的他，在鏡頭前說「乜都想拎」，「但最後乜都無」，「成棟樓燒咗七份之一，我就係嗰七份之一。」他期望，政府在處理宏福苑安置上，會考慮地段因素，作出合理方案，而非以8000元呎價收購未補地價單位。
何先生：低層有水浸跡象
曾多次出席聽證會的宏仁閣何先生，今天與家人上樓執拾多袋物品，其中行李箱有被燻黑痕跡。他指，成功取回多樣貴重物品，包括舊照、各樣證書等，「冇唔見嘢先啦起碼」。
何指，家中的櫃腳已被浸爛，因此大櫃很多已倒塌，雜物散滿一地，「床嗰度都埋唔到去，櫃桶要撬先撬得開，無辦法啦唉」。他執拾逾三小時，認為最花時間是要處理櫃子，「要用螺絲批撬開啲櫃門，要拆咗啲櫃門先就到啲櫃位，同埋太黑、燶晒又焗，成身到濕晒」。
今天滂沱大雨，何認為亦有影響上樓執拾，他留意到低層有水浸跡象，「樓梯有少少水，可能因為噚晚落雨，不過 2、3 樓 condition（情況）都ok」。他希望可再次上樓，取回剩餘的衫褲鞋襪、書籍，被問到下次上樓是否應取消時間限制，「下次畀多 4 個鐘啦！」
為父母帶走一批參茸海味
兒時居於宏福苑的陳女士和妹妹回到宏仁閣的家，為父母帶走一批參茸海味、珍愛的音響器材和昔日相片。她在單位與剛接兒子放學的丈夫揮手，如最後一次從家中望出窗外。
除了大門曾被消防破門救貓而損毀外，陳女士的單位幾乎沒有火災的痕跡。牆上的相片、證書都完好。她說火災當日是她姨甥女生日，「買咗份禮物放咗喺屋企，諗住嗰晚成家人一齊慶祝」，今日終完成心願。
她形容上樓時心情複雜，但時間緊迫，要盡快平復心情以收拾。陳稱上樓前已計劃好要收拾什麼物品，但抵達後只顧環顧昔日家園，把物品清單忘諸腦後，最後選擇「見到就擸」。惟時間關係仍無奈要「斷捨離」，爸爸放滿客廳一隅的 CD 都帶不走。
宏仁閣 18 樓的住戶李先生，取回已故父親的木刨，他說，父親用這些工具，養大了八兄弟。
相關報道
宏福苑回家．第四天｜宏昌閣、宏仁閣居民今回家 災民：慶幸人還在
宏福苑回家．第三天｜最後一批宏新閣居民執拾 屋居民感慨：出面咁繁榮，裏面頹垣敗瓦
宏福苑回家．第二天｜擁兩單位戶主 自費購外骨骼上樓 「損傷又係兩間，記憶都係兩間」
宏福苑回家｜紅網圍封 灰燼挖掘家當 首日 264 人上樓 三宗失物求助警續跟進 一長者送院
宏福苑回家．災廈眾生｜家園焚毀 愛貓骨灰龕倖存
宏福苑回家．災廈眾生｜長輩曾是名媛世家 「成屋都係文化嘢」 居民見證宏福苑的誕生和終結
