大火中失去五歲愛女煦翹，過去五個多月，鄭太曾四、五次夢到回家執拾。夢境總是很真實，她會帶着袋，叫人放這個、放那個，手裏拿着女兒真實擁有過的物品。夫婦二人日前終如願回到宏泰閣的家收拾，取回女兒和離世菲傭 Maryan 的遺物，「終於攞得返喇，我終於唔使再發夢返屋企執嘢，我覺得終於同佢同姐姐有個交代。」
尋回囡囡最心愛的公仔、衣物和玩具，趕得及與她的骨灰一同安葬，他們有一點釋懷，「幫佢完成咗一件事」。臨行前，鄭生鄭太將兩束花，放在女兒的床上：「跟我哋返屋企喇⋯我已經兌現承諾，同爸爸一齊攞返啲嘢，咁你哋就唔好得閒偷偷地過嚟裝吓喇，冇嘢好裝㗎喇，我哋一齊去新嘅屋企。」
相關報道：宏福苑回家｜五歲女兒、外傭罹難 金器遺物疑被盜 警指尋回機會微、有兩個月「空窗期」
宏福苑回家｜居民引警指有兩個月登記「空窗期」 警方：善後工作開始後有登記
苦等五個月，經歷無數擔憂，鄭生、鄭太這天終於出發回家。
遲遲未能回家 憂風吹雨打、賊人損遺物
回家執拾的過程，鄭太內心已預演過很多次。大火後，她一直盼望回家取回囡囡和 Maryan 的遺物。但政府遲遲未公布安排，讓她飽受煎熬。剛拆棚後，從街坊相片得知，家中的窗全被打開，她很擔心打風落雨會損壞女兒物品，特意回宏福苑確認，「見到（打開窗）真係癲咗，但又唔知道可以做啲咩」；後來看到工人盜竊的報道，也教她崩潰——「屋企所謂啲值錢嘢我唔在乎」，但她很擔心賊人翻箱倒櫃時，會將女兒遺物弄壞弄髒。
五個月以來，她一有空就會掛心女兒遺物的狀況：心愛的貼紙有無霉到？公仔會不會發霉？但她記得社工說過，「人生永遠是見招拆招」，如果遇到問題一定有辦法解決，「唔好太早去諗如果咁咁咁（就）點樣」。這句話她一直放在心裡。假設 100 樣物品中，有 50 樣可以拿走，「我覺得相比起有啲屋企人走咗、成頭家係焚毀嘅，我可以攞返嗰 50 樣嘢，其實都好似唔係咁惡劣，好似咁樣諗會舒服啲。」
他們準備了三束花，分別送給囡囡、Maryan 以及很照顧他們的六旬鄰居。
取回囡囡喜愛玩具衣物 將一同下葬
上樓前一晚，鄭太心情緊張，半夜醒來三、四次。雖然做了很多心理準備，「但我覺得你實際行到過去，你見到、聞到、摸到嘅時候，一定係同你心底裏 rehearsal 唔同。」
知道單位狀況較完好，鄭生鄭太最想取回囡囡最心愛的玩具、衣物，還有她的畫作、習作等；這些她生前最喜愛的物品、連同一些新衣物和鞋子，將與她的骨灰一同下葬。二月時買下土葬位置，他們一直擔心未能如期在三個月內，取回女兒物品陪葬，「如果拎唔切囡囡啲心愛嘅嘢陪葬品，我個心會好唔舒服」，最終趕得上，對他們來說是個安慰。
想取回的亦包括睡房、客廳和廚房的閉路電視鏡頭，盼能回看大火當日及此前的片段；還有去年 11 月初剛買的菲林相機，希望能曬出那卷來不及拍完的菲林。鄭生前一天也買來攝錄機，想替這個家留個紀念。
煦翹去年五歲生日，幼稚園生日會照片。
一家三口到靜岡旅行搭乘纜車的照片，鄭太說只有這張實體相，起初只見已沾濕、空掉的相框，但幸在地下尋回。
女兒和 Maryan 分別在低層樓梯和九樓大堂離世，兩夫婦特意準備了兩束花悼念。囡囡生前喜歡日本，她的花以日式為主題；Maryan 則喜歡藍色，連菲律賓家鄉的房子也裡裡外外塗成藍色，因此以藍色為主調。他們另準備了一束花給已罹難的鄰居夫婦，「希望同佢哋講聲拜拜。」
大火時外出工作仍未回家，鄭太很想在回家後跟女兒和 Maryan 說，「我返嚟執你哋啲嘢喇」、離開時再說「我哋閂門走喇，以後都唔返嚟㗎喇」。「可能佢哋會覺得，我哋未放工，所以我覺得要講聲咁樣嘅拜拜。」「都硬住頭皮㗎喇，無人承受得住，但我覺得都要面對囉。」前一晚看到有家屬分享，上樓後覺得舒服了，有些東西好像相對放下，「可能我哋都係呢。」
夫婦取回囡囡的大部分玩具、衣物，但遺憾親友送贈女兒、具紀念價值的金器被盜。
疑遇竊失金器遺物 找回囡囡最愛毛公仔
這天回家，狀況比想像中要好。屋內的一切如平行時空，留在 11 月 26 日，物品無被搗亂，只是蒙上了一層很厚的灰，像燒烤炭碾成粉狀，再平均灑在所有空氣暴露的地方；大部分物品完好沒融掉，裡面應不曾經歷過高溫。走上 24 層樓梯時，鄭生心裡想着「頂住，差唔多上到去」，但一步入家門，看到自己熟悉的家，「嗰吓都忍唔住」。
三個多小時內，他們按一早準備的清單，取回女兒大部分玩具、衣物、勞作，以及校服和書包。看着每件物品，腦裡浮現平時的生活片段、回憶，還有女兒看到物件的反應，「會對住佢做啲乜嘢、講啲乜嘢」。撇除灰燼，「好似所有嘢都冇變過」，「如果囡囡好似以前咁，開心咁衝過嚟攬住我叫我媽咪，你話幾好⋯⋯」，鄭太嘆。略帶遺憾的是家人送贈女兒、具紀念價值的金器，全部不翼而飛；她以往常愛玩的一部舊電話，也未能尋回。
這隻黑白色狗仔，煦翹自小便攬着睡，就算家中另有兩隻同款狗仔也不要，獨愛眉心有黑點的這隻，「如果入屋只可以拎返一樣嘢，嗰個就係佢」，打算陪囡囡安葬。
從小到大，囡囡每晚睡覺都會攬住一隻狗公仔，鄭太入屋第一件事，便是到女兒房間找那隻狗仔。起初忘了戴頭燈、又有被鋪遮住，她找不着，幾乎瘋掉，「癲咗喺度搵」，最終在較入的位置尋獲，「我覺得其實搵到呢隻狗仔，我已經 OK，其他所有嘢我都當 bonus。」拿走的，還有女兒的枕頭、和最喜歡的一張柴犬被，「真係陪住佢一齊瞓，陪住佢一齊大」。
「執完嘢，我覺得舒服咗。」失竊向警方報案後，夫婦再將近 20 袋紅白藍、連同女兒的單車和滑板車分批寄倉，晚上，鄭生鄭太在迷你倉整理女兒遺物，身上的衣服滿是灰燼的痕跡。
打開紅白藍袋，掏出的全是回憶。囡囡見爸爸常幫她拍照，又嚷着要拍，去年 11 月初的五歲生日會上獲贈兒童相機，可惜還未來得及拆開；女兒和鄭太心愛的公仔已遭熏黑，將與囡囡一同安葬互相陪伴。他們也尋回結婚相、女兒舊照、懷孕時用心製作的超聲波相簿，文字流露對女兒的期待和愛。
鄭生尋回去年 11 月初買的菲林相機，有女兒拍他們、也有他們拍女兒的相片，打算拍完餘下菲林後嘗試沖曬。
懷孕的時候，鄭太親自製作超聲波相簿，很有心機地裝飾，寫下的滿是對女兒出生的期待。
外傭原去年聖誕返家鄉過節 行李箱裝滿手信
這次上樓，他們也望為 Maryan 的家人取回她的遺物。Maryan 在九樓電梯大堂被發現，走到九樓時，鄭太在防煙門位置用英文大聲嗌：「阿 mum 返咗嚟喇，你唔好喺九樓喇，我哋而家一齊上去執嘢，執完嘢跟住我走！」他們最終取回 Maryan 的隨身物品如銀包、衣服、手袋，還有她常戴的太陽眼鏡、最喜歡的兩頂帽，及一家人到福岡旅行時，Maryan 特意為兒子買的一對球鞋，將交給她在港的朋友、再轉交 Maryan 的 10 歲兒子。
還有一個黑色行李箱，起初不知是誰，但打開來全部都是手信，有衣服、有鞋、有零食——「原來係（屬於）姐姐，因為佢（2025 年）12 月中準備返菲律賓過節，佢就買咗隻喼，原來入面已經擺晒嘢。」
夫婦找回大部分女兒喜愛的文具、公仔。其中小熊貓是一家 2024 年在日本福岡旅行所買，臨睡前鄭太會與囡囡一起玩，承載兩人回憶，會與煦翹一同安葬。另外，還有鄭太每晚睡覺都會攬住的公仔，也會給囡囡代表「陪住佢」。
「跟我哋返屋企喇」
「終於攞得返喇。我終於唔使再發夢返屋企執嘢，我覺得終於同佢同姐姐有個交代。」鄭太心裡總是覺得，煦翹和 Maryan 都很想拿回一些東西，「畀我哋又好、咩都好」—— 到現在真的回家取回，她覺得是「了咗一件事」，「真係趕得切佢落葬呢件事，真係好安心」。
臨離開前，她將兩束花放在女兒的床上，向女兒和 Maryan 說：「跟我哋返屋企喇，我知道你哋應該唔喺嗰度㗎喇，但係你哋都會好想拎返啲嘢，咁我已經兌現承諾，同爸爸一齊攞返啲嘢，咁你哋就唔好得閒偷偷地過嚟裝吓喇，冇嘢好裝㗎喇，我哋一齊去新嘅屋企。」她又哽咽憶述，當時以英文向 Maryan 說：「講咗十萬次你退咗休喇，好抱歉，拎唔到你嗰啲金」。
兩夫婦也取回囡囡的單車和滑板車，暫與其他物品寄倉。
鄭生與囡囡在即影即有機拍攝，鄭太當時覺得很貴，沒有拍過，今嘆「但人生係真係好多後悔，我覺得應該要影嘅。」
離別一刻「唔捨得，但無計」
天色漸暗，雨勢滂沱。離開家門一刻，「唔捨得呀，但無計」，鄭太嘆。她深知發生這件事後，「係住唔返㗎喇⋯但真係好唔捨得」。屋是死的，不捨的，是住在這裡九年的種種回憶。上一次離家已是上班，這次再踏入家門，「哇，再行入嚟，原來間屋變成咁」。
囡囡於低層走火梯被發現，因不知確實樓層，從 24 樓的家走往第三、四層樓時，鄭太心情沉重，幻想當時女兒快逃到地面時，樓梯已很大煙、有很多人塞住而無法離開。想到在這麼惡劣的環境下走火警，她自己也會很害怕，在心裡跟囡囡說：「你好叻，走到嚟呢度，媽咪 24 樓落到嚟，我而家都腳軟喇。你真係叻，又勇敢。」
如果有下次，他們應該會再上來。鄭太想帶同 Maryan 的姐姐回去，再看看有沒有其他遺物要執拾。取回牽掛多時的囡囡遺物，下次或有更多時間與這個家相處。「可能第二次上去就，唔係主力執嘢囉。上嚟感受返間屋，去尋思吓，望吓風景咁樣。」
鄭生鄭太希望能第二次上樓，除能帶同 Maryan 姐姐回家，也冀與這個家再相處。
相關報道：宏福苑回家｜五歲女兒、外傭罹難 金器遺物疑被盜 警指尋回機會微、有兩個月「空窗期」
宏福苑火災｜五歲煦翹、菲傭火警後急逃生 命喪低層吸濃煙致死 雙親痛斥：絕對係人禍
宏福苑火災｜工權會訪遺屬 記罹難外傭故事：想佢哋每個人嘅名、故事出現返
