宏仁、宏昌閣的居民今天（23日）回家，居住宏仁閣八樓的李太，在廣福社區會堂外，隔著鐵欄遙望舊居。由於每個單位只限四人上樓，她只好等待家人執拾完成。李太指，早前從社工得知單位損毁情況不算太嚴重，希望家人可為她尋回一切具紀念價值的物品，「呢啲有就一定攞，有啲好珍貴，有啲再前人（長輩）嗰啲相片，佢哋畫嗰啲畫會掛晒喺度」。她指，家中長輩曾是名媛世家，熱愛畫字畫，因此別具意義，「但係我估都唔會拎得晒，應該係要揀嚟拎，成屋都係文化嘢，好多好多」。

「我就喺度望吓咁囉」

今天代李太上樓的，包括她近七旬的丈夫，她指不擔心其體力負荷，「八樓可以用兩節，同埋佢又行開山，雖然瘦削但都壯健」。她坦言，當然希望上樓，「但世界就係咁㗎啦，有限制㗎嘛，同埋你需要有選擇，邊個需要多啲咪上，我就喺度望吓咁囉！」若將來有機會再上樓，她必定會一同回家。

見證宏福苑誕生和終結

李太是宏福苑落成後首任業主，居住 40 載，她見證著宏福苑的誕生和終結，「嗰陣睇住佢又未起好，去到慢慢望住佢（落成），知道要抽（籤）呀嘛！所以我結婚就已經喺呢度住」。因此，在家中所有物品之中，她最心心念念的是結婚舊照，「𠵱家好彩有啲將佢（舊照）轉咗做電子嗰啲，但始終電子同真實係唔同」。

火災當日，李太於外地旅遊期間得知意外發生，只可以透過新聞片段了解火勢，「你睇住嗰座嘢係咁燒、係咁燒，一路係咁蔓延，其實個心裏面好痛」，甚至在街上經過見到棕色的樓宇，都會令她聯想起宏福苑。

事隔快五個月年，李太希望政府和社會各界為事件討回公道，「唔希望因為呢件事之後，仲會有其他嘅災難。真係好想還一個真相，究竟發生咗咩事？同埋點樣去防止？事實係大家都睇到，應該係可以防止到」。

相關報道：
宏福苑回家．第四天｜宏昌閣、宏仁閣居民今回家　災民：慶幸人還在