宏福苑居民今日第七天上樓，宏道閣及宏昌閣居民獲安排回家。起火樓宇宏昌閣，住了 43 年的鄧太，有同層鄰居罹難，「鄰居係好好㗎，叫唔到佢走，自己都唔開心」，她撐着拐杖回家，看見「間屋成間燒晒」，她數度哽咽，相當難過。家人以鏟和徒手挖掘，只找到少量紀念品、金鏈、陶瓷、硬幣等。
有宏昌閣居民帶備鮮花獻給已離世的鄰居，亦有宏道閣居民打算，無論家居環境完好還是損毀，亦會在家中拍一幀全家福。
43 年宏昌閣住戶哽咽：燒晒啦，冇咩可以拎
宏昌閣 17 樓的第一手住戶鄧太和鄧小姐，攜着一個紅白藍袋離開。「好少咋，我見人哋一袋袋真係好開心，我哋都係得咁大袋」，鄧太苦笑。自得知可上樓，鄧太數個月來都想着「我一定會上去睇吓，即係住咗 40 幾年都唔捨得」。從社工提供相片已知家中燒毀情況嚴重、亦要撐着拐杖上樓，但她說「辛苦都要上去啦，想見吓自己屋企變成點樣」。
「但係一上到去就⋯即係比我想像中係燒到好犀利」，鄧太搖搖頭。「廚房至到房都燒晒，士多房都燒埋」，「好難過⋯冇喇，都燒晒啦，冇咩可以拎喇」，她說時不禁數度哽咽。鄧小姐亦說，雖一早已有心理準備，但看到熟悉的家居「九成半都冇晒」，「除咗無奈只可以無奈」。
以鏟和徒手挖掘 初版男兒當入樽成灰燼
40 多年的安樂窩變成頹垣敗瓦，三個小時內，女兒鄧小姐在現場以鏟和徒手挖掘，只找到少量紀念品、金鏈、陶瓷、硬幣等，但舊相簿及鄧小姐房間內收藏的多本小說和漫畫，包括全套初版男兒當入樽絕版漫畫，均料全燒成灰燼，未能帶走。
同層鄰居罹難
鄧太當天下午兩點多出門時聞到𤓓味，以為鄰居煲燶湯，拍門喚對面單位鄰居一同下樓，當時仍看不見火源；約 20 多分鐘後，鄧先生聽到人喊「火燭」、拍鄰居門無人回應便搭𨋢下樓，成功逃生。
鄧太說，同層有兩三個鄰居燒死，「鄰居係好好㗎，叫唔到佢走，自己都唔開心」。這裏也有很多回憶，「喺度住咗 43 年，真係好好住呢度」，她輕嘆：「唉，見到間屋都好難過，都唔知點講。」
「好耐冇望過個景」
因沒有太多時間，鄧小姐臨走前只是拍下家中相片作道別，包括窗邊那片現被橙網圍封的海景：「都好難忘，因為火燭前都仲未睇得返個海，當時仲係畀網包住咗，喺屋企其實都已經好耐冇望過個景。」她坦言百感交集、很多不捨，亦料沒什麼機會再重返這個家，「但件事都發生咗，有啲嘢記住佢囉唯有」，「你無奈都只能夠接受」。
「人始終都要向前行」
「唔（再）上喇，即係都燒晒喇，上去都冇用啦，連士多房都燒埋」，鄧太說。雖然失去了家，但鄧小姐說人始終要向前行、繼續生活，「有一啲難過係你面對佢，會好過永遠停留咗喺嗰個時間⋯人無可能永遠都停低喺一個階段」，亦不希望街坊繼續愁雲慘霧。
希望原址重建 「冇呢個 offer 畀我選擇」
曾奢望家中狀況尚可，收到相片一刻心很痛，要與這個家永別、「真係再冇屋企返」，鄧小姐說傷心過一兩晚後，仍是要收拾心情，繼續想下一步如何做，包括在大埔覓租盤和考慮長遠安置方案。在這裡居住逾 40 年，她說也希望原址重建，「但現實係唔容許，冇呢個 offer 畀我選擇」、年邁父母亦未必能等到，只能選擇其他方案，重新找一個家安居。
「見返啲鄰居好開心」
鄧小姐始終覺得「人最重要」，「始終都尚算係幸運，屋企人齊齊整整」，其餘都是身外物。鄧太在現場重遇樓下街坊，互相問候，坦言「見返啲鄰居好開心」。被問情緒起伏會否尋求社工協助，她平靜道：「都唔使喇，幾個月自己都調整好自己啦，諗住啲嘢冇咗就算啦。」
宏昌閣居民憂未能拿走的東西會變垃圾
宏昌閣 19 樓住戶馬先生，與太太帶同一枝紫色鮮花到場準備上樓。他指，自己的家人在火災當天不在家，目前全員安好，但從屋苑訊息群組中得知鄰居罹難，希望為她獻上鮮花悼念，「雖然你知𠵱家香港地，所有鄰居都係點頭之交，唔係好似以前嗰啲過嚟問你借羹鹽，但都想難得返嚟，一束鮮花又唔會話好名貴，叫做俾返啲心意佢囉，say 個 goodbye」。
馬表示，早前未有收到單位相片，估計單位受損情況不是太嚴重，希望可取回貴重物品、衣物和「太太啲愛馬仕」，「都係盡量攞到啲咩都會攞」，不過大型物品則未能搬走。他希望有更多的上樓機會，「多一次機會上樓嘅，咁仲有冇第三次呢？冇人知，咁如果冇，剩落嚟嘅嘢會變咗垃圾？」
相關報道：
宏福苑回家｜同歷大火 英格倫費爾大廈 政府加建電梯 聘災害管理公司 助居民取物
馬指，對當局如何處理家當表示擔憂，同時亦無能為力，「呢啲我哋都控制唔到，正如嗰陣我哋嘅 3 億維修費，我哋都控制唔到。當然居民會有大家自己嘅意見，但有無人去聽你咁講呢？聽完又會唔會接納你呢？大家都唔知」。
對於近日有多位居民表示，應該維修電梯讓居民上樓，馬認為有電梯固然是好事，但認為或會拖長可以上樓時間，「火災發生咗，你又要佢（政府）整返啲電，先唔好講邊個畀錢，一幢樓 3 部𨋢，咁要搞幾耐呢？」，寧可早日回家更安心，「自己屋企有邊個唔想返去？」
回家再影一次全家幅
宏道閣低層住戶潘小姐與父母和胞妹，一家四口上樓執拾。被問到會如何跟單位說再見，她微微哽咽道：「我哋屋企講好咗，要再喺屋企影一次全家福」。
潘小姐從小在宏福苑居住，雖然約十多年前搬走，但仍會不時與女兒回家探望雙親，「我哋通常屋企聚會，每一個人生日都會返屋企食飯，好多相、好多合照都係喺呢間屋度影，好多事都喺呢度發生，今日係當有機會真係最後一次返嚟嘅時候，點都要喺呢間屋裏面影返一張全家福，做返個留念」。
潘表示，自己未有收到單位相片，但知道鄰居住所有受火勢波及，「而家都唔知（情況）點，『開盲盒』咁囉而家」，最想取回舊照和女兒的玩具，「一定唔夠時間㗎喇，你去旅行都唔會執 3 個鐘嘢啦！何況而家係成間屋嘅嘢」。
「一啲事都冇、非常完整無缺」
潘小姐落樓後接受《集誌社》訪問，指感恩單位「一啲事都冇、非常完整無缺」，物品原封不動、沒有熏黑痕跡，但目睹一牆之隔的鄰居單位被燒黑、需支架支撐仍感心噏。甫回家，她便如願與父母在以往常拍照的餐桌位置、掛鐘下拍下一張全家福，之後便即專注執拾。
童年時在宏福苑公園合照
五個月也沒腐爛的橙
根據潘小姐提供相片，單位狀況完好，她取回與妹妹兒時在宏福苑的合照、找到一個五個月也沒腐爛的橙，家中植物仍翠綠沒枯萎，她形容「植物生命力強」。
帶走約 30 袋物品
潘小姐事前與家人商討好分工、又製訂執拾物品清單，最終「同時間競賽」，與妹妹兩人來回 6 至 7 次，帶走約 30 袋物品，成功取回貴重物品、重要文件如出世紙、父母結婚證書，小朋友玩具和家中所有舊相簿，「攞到幾多得幾多」。
「係一件好可悲嘅事」
她形容過程趕急但尚算順利，但嘆「諗返轉頭係一件好可悲嘅事，點解返屋企攞返自己嘅嘢要去到咁呢？」，指很多東西未必很重要或珍貴，但也要逐樣取捨「攞唔攞好」、「有啲掙扎」。
只夠取回約三分一較重要物品
潘小姐坦言，三小時未夠時間執拾家中每個角落，只夠取回約三分一較重要物品，要待下次上樓再取其他，包括母親望取回的廚具和衣物等；這次上樓亦已將部分物品搬出，方便下次執拾。她望能再次上樓，離開時亦說「我哋會返嚟嘅」，認為與這個家「未去到道別嘅我哋」、「呢一刻未覺得要正式同佢切斷關係」。
家中衣櫃被打開暫末發現有遺失
「本身噚晚都瞓唔著，因為隔咗咁耐，唔知屋企會係點樣，所以好緊張」。宏道閣 9 樓住戶黎先生，今天回到舊居，發現單位只有些微熏黑情況，才放下心頭大石，「見到啲利是呀，啲錢都仲喺度喎，就會放心咗啲」，他成功取回樓契、證件等文件。
損毀不嚴重
黎先生對於單位損毁情況不嚴重，卻因火災而被迫搬離居住 20 多年的住所，感到相當無奈，「見到都好唔開心，突然之間要咁樣（搬離），都係好唔捨得」，加上 3 小時時限太倉猝，希望將來可以再次上樓，取回更多物品。
不過，黎留意到家中的衣櫃全部被打開，「暫時就好似冇唔見嘢，唔知點解會俾人開晒門」，擔心有被盜竊的情況，「不過有啲嘢都擺咗喺箱入面，我見到好似冇開過，咁我當佢無（被盜竊）先啦」，因此未有打算向警方備案。
宏昌閣中層五個樓層及宏仁閣高層的11個樓層居民昨天上樓。宏道閣居民今天起獲安排回家，宏昌閣居民今日繼續上樓。昨天有 124 戶 459 人上樓，平均逗留 2 小時 33 分鐘，最長停留 4 小時 8 分鐘，四戶六人上落五次。 昨天有九宗懷疑失物的求警協助，六宗已成功尋回失物，三宗的單位損毁較嚴重，調查後，居民相信財物可能已焚毁。
相關報道
宏福苑回家．第六天｜告別？怎告別？ 中風伯伯淚灑 長者：根種咗係度 拍下最後風景
宏福苑回家・第五天｜雨中別家園 葉家駒：心情複雜 居民哭訴：三個鐘難執咁多年嘅嘢
宏福苑回家．第四天｜宏昌閣、宏仁閣居民今回家 災民：慶幸人還在
宏福苑回家．第三天｜最後一批宏新閣居民執拾 屋居民感慨：出面咁繁榮，裏面頹垣敗瓦
宏福苑回家．第二天｜擁兩單位戶主 自費購外骨骼上樓 「損傷又係兩間，記憶都係兩間」
宏福苑回家．第一天｜紅網圍封 灰燼挖掘家當 首日 264 人上樓 三宗失物求助警續跟進 一長者送院
宏福苑回家．災廈眾生｜家園焚毀 愛貓骨灰龕倖存
宏福苑回家．災廈眾生｜長輩曾是名媛世家 「成屋都係文化嘢」 居民見證宏福苑的誕生和終結
宏福苑回家｜「媽咪我哋返來啦」 羅曉琪兄妹 返家念亡母 「走啦，我地一齊走
宏福苑回家｜重返嚴重焚毀兩居所 子單位見煙頭 父家園有部分金器未尋回
