宏福苑宏新閣居民今（22日）第三日回家，今天開放予高層住戶上樓執拾，不少長者未能親自行樓梯回家，要由子女代勞回家執拾告別。有居民為今天回家，訓練自己每天行樓梯，希望可以取回愛貓骨灰龕。有居民踏入家門，隔著橙色封窗膠網嘗試眺望，只感到隔膜，「出面咁繁榮，但裏面就頹垣敗瓦」，慨嘆家園停留在近半年前的時光「好似平行時空」。過去三日內，共有 233 戶共 803 人回家。
今日有 78 戶、264 人上樓，平均逗留 2 小時 32 分鐘，最長停留 4 小時 5 分鐘、最短逗留 50 分鐘，約四分一居民逗留少於兩小時。有 21 戶 45 人上落大廈不止一次，有一戶兩人上落五次。今天有七宗求警協助，當中六宗已找回失物，一宗的單位沒被搜掠痕跡、五宗身體不適求助、三宗需尋求心理輔導服務。
30 樓｜梁婆婆 樓下等候家人傳相
家住宏新閣 30 樓的梁婆婆，年屆八旬，由女婿代為上樓，她只能在樓下等待消息。梁表示，最希望尋回有紀念價值的物品，「嗰啲相呀，後生嘅時候嗰嘅，戒指呀嗰啲咪執埋佢囉」。女婿向她發送相片，表示已尋回護照、被墊等物品，其餘物品仍在尋找中。
宏福苑是她逾 40 年來的家，她坦言對於未能上樓與舊居道別感到可惜，「無𨋢無盛，30 樓我點行上去？上去都落唔到嚟！如果我後生幾廿年，我梗係走返上去睇下啦！」梁婆婆曾嘗試練習行樓梯，惟體力不支，「我行過喇！行到腳震，落到嚟係咁震」。她透露女婿有拍下單位現況，家居已被燒到「黑晒」，「（燒到）黑鼆鼆囉，無辦法喇，瞓都瞓唔著囉都！」
27樓｜居民 最希望取回大戲戲服
六旬的梁女士居於 27 樓，是宏福苑第一手業主，料單位情況損毀不算嚴重，打算取回家中行李箱執拾。她的嗜好是做大戲，最希望能取回戲服，笑言「冇理由唔要㗎嘛如果冇事，好貴㗎啲戲服」，指八至十套總值約數萬元，但因太重不會全部拿回，打算「拎啲貴啲嗰啲、平啲唔會拎」。
梁女士有做運動習慣，因要上樓而「做密啲」，對要上 27 層樓未有太擔心，亦認為三小時足夠，「我知道啲嘢擺邊」。至於偷竊，她說「都冇得擔心」，「你為咗啲嘢唔見咗唔開心，自己戇居，錢財身外物，個人喺度咪得」。在宏福苑居住逾 40 年，梁女士望能「同間屋 bye bye」，但如何道別要「見到嗰刻先知，因為其實都擺低晒，啲心情唔係咁起伏」。
梁女士有做運動習慣，因要上樓而「做密啲」，對要上 27 層樓未有太擔心。
25 樓｜望尋回愛貓骨灰龕
居住 25 樓的鄧女士，與數位友人上樓，她最希望尋回愛貓骨灰龕、結婚照片、婚戒等，「我記得骨灰係裝喺一個不銹鋼嘅盒，溶點成 1000 幾度，你（記者）覺得o唔ok？應該未溶嘅嗰個」。她指，若尋回骨灰龕會整個帶走，「帶返落嚟呀，唔告別喇！」她只收到過家門口的照片，但估計家中境況尚可，「裏面嗰啲盒呀，都仲見到嘅，我見到都OK呀，好多人都拎到嘢落嚟」，有信心可以取回物品。
本身是基督徒的鄧女士，為與 19 歲的愛貓「重聚」，除了密密祈禱，在得知可以回家後每天都練習行樓梯，「每日上一兩次到囉，行到痛就唔行」。
25 樓｜「出面咁繁榮，但裏面就頹垣敗瓦」
居住 25 樓的吳先生，與家人上樓，僅執拾到數袋小紅白籃袋的物品，當中有一個盛載著一堆硬幣的杯子，另有一個完好無缺的花瓶。硬幣部份染黑和帶有灰燼，反映著吳先生家居的狀況，「單位大部份都燒咗㗎喇，走廊都燒黑咗，間屋都無乜嘢拎，都燒晒已經」。他形容，這些陶瓷、鐵盒和花瓶，成為火災的「倖存者」。
吳坦言，今天早已預計上樓未能取回大部份物品，亦有帶備鏟子準備挖灰，「睇相都知道（家居狀況），有心理準備㗎喇，即係有啲咩拎到，有啲咩拎唔到。間屋都 total loss（全部損毀），盡能力拎到嘅就拎」。
吳指，火災後的心情持續低落，「當然11月嘅時候最唔開心，之後收返啲相，見到都難過嘅，雖然有心理準備，但個心都會戚戚地」。直到踏入家門看到實況一刻，他的感受更深，「好難以想像會發生一件咁樣嘅事，唔係一間屋係咁，係過千間屋都係咁，好匪夷所思」。
他在家中嘗試眺望窗外遠景，以往可以清晰望到大埔墟火車站，但現時卻因有窗網隔絕，感到有隔膜，「出面咁繁榮，但裏面就頹垣敗瓦，好似兩個世界，好大反差，點解出面好似依舊，但呢度（宏福）停留咗喺半年前，好似平行時空」。
25樓｜取回貓貓骨灰 部分膠熊公仔溶掉
居於 25 樓的麥先生，今與弟弟和表弟一同上樓。他指收到單位相片，只見熏黑、但沒有燒毀，「都叫完好」，帶備背囊和大袋，「可能要上去先知有咩可以執」。麥先生一家在宏福苑住了 30 多年，養有兩隻愛貓，他盼能取回去年 7 月離世的貓貓骨灰，「一定要帶佢落嚟，乜都唔攞，呢個都要攞落嚟」，指從相片見到「應該就仲喺度」。另一隻養了 11 年的貓則不幸於火災中離世，事後消防將其遺體帶落樓，他帶了一束花回家悼念。家中亦有大量珍藏的膠熊玩具，故帶同啪啪紙望包住帶走。
要行 25 層樓梯歸家，他說「辛苦都要上㗎喇，都冇辦法」，七旬母親因行動不便未能同行，會在樓下等待，他會發放單位照片給她，「都冇㗎喇，都好平常心㗎喇，你冇辦法，都發生咗，佢唔上咪話留返個好回憶囉。」麥先生料能取回較多物品，「睇吓可以攞到幾多，盡量攞」，又指「一定係執唔晒今日啲嘢，得四個人、幾個袋，執到幾多嘢？平時搬屋都四、五十箱啦」，望能再上去多次。
麥先生落樓後，向記者提供單位照片和影片，可見牆身及不少物品熏黑。麥先生指，最後有兩人上落多一次，拾回十多袋物品，成功取回貓貓骨灰，部分膠熊則溶掉，取回了一部分，可以的話望能再上樓執拾。
宏福苑是吳先生自出生起的護蔭，為他遮風擋雨 40 多年。不過，由於母親未能走樓梯上樓，他靠 WhatsApp Call 功能與她視訊，讓她看看舊居狀況，「雖然話有心理準備，但睇到嗰一刻都係唔開心，（宏福）係我爸爸媽媽第一間屋，都難過嘅」。媽媽原本亦有心儀物品想取回，包括嫁妝、舊照等，但相信已全數燒毀。
「其實我覺得活着就是幸運，你話錢財、記憶係無咗嘅，但盡量喺腦海中記住啦，最緊要人無事嘅啫」。
24 樓｜八旬長者 兒子代勞上門尋回金器
林先生則是「代父從軍」的一員，他為八旬雙親走回 24 樓舊居執拾，為兩老尋到金器和結婚照片等，「我個單位好好彩，我見到隔籬屋嗰啲全部都係灰㗎嘛，但佢（兩老）嗰啲梳化、床全部都無事，可能啱啱個單位方向好啦」。
林先生父母由宏福苑落成已入住，居住了 40 多年。宏福苑亦是林先生成長之地，他亦有取回一些舊照，「以前 hardcopy（硬本）嚟㗎嘛，無得留底㗎嘛，所以擺晒入篋」。在屋內亦有與雙親視訊，展示舊居情況，他們亦為能尋回物品感到高興。
林先生由早上約 9 時半上樓，逗留 1 個多小時離開，帶走滿 2 個行李箱、4 個紅白籃膠袋的物品，「因為我哋一早plan（計劃）好要執啲乜嘢，同埋我哋唔係燒到好多灰，要掘嗰啲，始終我哋屋企OK，執到就幫阿爸阿媽執」。
他指，自己走上 24 層樓梯需時 20 分鐘，途中休息兩次，認為過程比想像中輕鬆，「佢（政府）冇話要着啲咩特別鞋，但盡量長褲長袖，不過我怕熱就短袖都OK，（情況）唔係咁差」，認為政府安排良好，民安隊亦有在上樓過程中提供協助。
23 樓｜街坊 準備椅板拐杖方便中途休息
居於 23 樓的蔡先生與父親一同上樓，他對家人要走多層樓梯表示擔憂，「後生啲咪頂得順，老人家就真係爭少少，就算唔係天氣問題，都係體能問題，平時行啲普通石級其實都已經會喘氣」。他們帶備了一雙厚底筒靴，另外有兩支可摺式拐杖，上面具備一塊小小的座椅板，方便家人走得疲憊時休息一回。
蔡表示，沒打算尋回任何目標物品，只希望可以「上去望吓」，「當然都希望有返啲嘢可以攞到，但攞唔到都冇乜嘢，都知㗎啦，有晒心理準備」。對於面對家中景象，他亦已做足心理準備，「見到早幾日大家啲相，其實都預計到㗎啦，唯有樂觀少少面對」。
如踏進一片陌生的地方
宏新閣高層住戶吳小姐與兩位家人上樓，她指自己成功取回有紀念價值的物品，包括舊照、家人婚照、畢業證書、公公婆婆的遺物等。她透露家居狀況不是太差，不過廚房「燒得好勁」，「基本上係爆嘅啲嘢，碎晒嘅，啲嘢冧晒落嚟」，全屋的燈亦已倒塌，天花板同樣已被燻黑。
吳小姐亦看到，屋苑的後樓梯和走廊被火災摧殘的景況，有如踏進一片陌生的地方，「你從來都冇見過你住咗咁多年嘅地方係咁樣，我喺度住咗 30 幾年，從來未見過我以前喺度玩嘅地方變成咁，全部嘢黑晒，跌晒嘢落嚟㗎啦基本上，一行入後樓梯真係好陌生、好陌生」。她有在家中與這個空間好好道別，「同佢講Bye Bye，完喇，要開始新嘅生活，冇辦法再咁樣望落去」。
在行樓梯的過程中，吳指，由於所有後樓梯的窗戶均因火災救援時全數被爆破，令後樓梯通風，因此上樓不算是過於辛苦，形容是「好諷刺」。父親雖然年屆七旬，但他行樓梯是「好似食咗興奮劑」，「佢一馬當先，因為有得返屋企呀嘛！」
吳續指，民安隊在上樓過程中有提供協助助，每層亦有座椅可以讓居民休息，落樓時警員亦幫忙拿行李，感謝他們的協助。吳的母親今次未有一同上樓，希望將來有機會可以再上樓，讓母親都能與家告別。
相關報道：
宏福苑回家．災廈眾生｜仁心仁術牌匾 跑步獎牌 三小時內 如何帶走嫲孫回憶？
宏福苑回家．災廈眾生｜大火後 八旬父患急性精神病 女兒取回熏黑茶壺 望喚醒爸爸返回現實
宏福苑回家．災廈眾生｜ 灰燼下尋回玉龜 七旬婆婆：呢次真係回「龜」吖！唔係呃你！
宏福苑回家．第二天｜擁兩單位戶主 自費購外骨骼上樓 「損傷又係兩間，記憶都係兩間」
宏福苑回家｜紅網圍封 灰燼挖掘家當 首日 264 人上樓 三宗失物求助警續跟進 一長者送院
