宏福苑居民回家第八日，宏昌閣及宏道閣居民今（27日）日上樓。
大火當日，宏昌閣的胡先生被困 27 小時，出院後，他關節受損，無力上樓。他暗寸政務副司長卓永興的「4 人 12 小時」論說：「我哋一家四口總共住咗一百四十幾年」。
除了家當，他更不捨得逝去的街坊，泣訴「放唔低」。拿著鮮花和石頭，李家一行四人，要回家放下，悼念在大火離世的爸爸和愛犬。遺孀李太憶述，跟亡夫最後通話，是互訴平日少於啟齒的一句：「我好愛你」。
宏道閣的謝先生上樓後，向《集誌社》提供單位照片，其單位沒有明顯燒毀痕，他一如訪問所言「坐梳化」，他不滿政府全拆七座，表示會向申訴專員公署投訴。
鮮花悼亡父、愛犬
兩失物個案警進一步調查
政府指周一有 119 戶，443 人上樓，平均逗留 2 小時 32 分鐘，最短 17分鐘，最長 3 小時 45 分鐘。周一有十宗居民求警協
宏福苑七幢大廈中，宏昌閣有 81 人不幸罹難。李氏一行四人今午走上 22 層樓梯，打算向爸爸、11歲狗狗 Bobby 道別。相比其他上樓街坊，李家的行裝相對輕便，一行人只帶鮮花、背囊，和一個手提袋大小的紅白藍膠袋，李先生說，單位早已燒黑，「其實入邊都冇乜可能可以有任何嘅嘢剩」。
李先生透露，火警當天，爸爸與愛犬躲在主人房，由下午三時到五時，一家人也保持聯絡至最後。「有種遺憾就係，我最後係唔敢去睇爸爸嘅遺骸」因此今日上樓，一家人帶同鮮花送別至親，李先生指，「畀自己向前嘅一個儀式」。
媽媽李太 30 年前搬入宏福苑。她說，62 歲的丈夫是半退休狀態，當日一人一犬，支撐到下午五點左右的時間，已在房間「躺平」。她只能安撫丈夫，說消防員「上緊嚟」。
丈夫最後說話 佢話我好愛你
李太指，丈夫最後一段話，在話筒裡頭格外平靜，叮囑她好好生活、好好照顧家庭。「佢講咗我個名，佢話我好愛你；跟住我同佢講，我都好愛你。好少講『我愛你』呢個字，所以係佢最後嘅遺言，同埋『你真係好好咁樣同佢哋生活啦』佢知道佢自己係走唔到。」
「其實佢好平靜，真係好平靜。佢之後面對呢個事實，佢唔會走來走去，佢只係安安靜靜喺度等，喺度爭取時間同我哋傾偈。」
尋回少量金器
李家上樓後，傍晚時分離開家園。李生指，上樓後留意到走廊、電梯損毀情況嚴重「由個氣味開始已經Feel到好難聞⋯⋯所有嘢都係好沉重，漆黑一片。」
李太則提到，回到單位後，尋回少量金器，但單位只能每次兩人輪流進入，因此只算粗略找回物品；一家人也擺放了兩束鮮花、一塊石頭，向亡夫、愛犬道別，象徵要開始新生活。
發現疑似愛犬骸骨
早前警方災難遇害者辨認組（DVIU）到過七幢大廈搜尋遺骸。惟李生今日也在爸爸、愛犬Bobby最後時刻停留的睡房內，發現疑似愛犬的骸骨以及瓷製食器。李太補充，屋內大部份物品都燒成「一嚿嚿、分唔開」，但上樓發現的部分較零碎，相信是愛犬遺下的。
「無諗過係會咁樣搵到返出嚟」
李生續指，他們的火化程序已完成，需要時間再思考如何處理「無諗過係會咁樣搵到返出嚟，所以對我嚟講，係好錯愕。」重回家園，李生踏進單位，「視覺、觸覺感受到爸爸同 Bobby 當時情境，做咗最後嘅道別。再加上因為啱啱講，無見到爸爸遺骸，係有啲遺憾，去到𠵱家再搵到Bobby 遺骸嘅時候，我覺得感覺實在啲，無話可唔可以向行，但係至少好似達成到某樣嘢。」
暗寸卓永興
「就算一隻匙羹都係我嘅！」
宏昌閣 21 樓的胡太與家人捧著兩大捲泡泡紙上樓。她心上樓耗費體力但都要「死頂」，她指，會視乎情況，可能多於一次上落，因單位有很多紀念品想取回，如相簿、證書、出世紙，到公司派發的紀念鈔，「成間屋都係我哋回憶」、「就算一隻匙羹都係我嘅！希望盡量攞！」
居民限時上樓三小時，政務副司長卓永興早前發表「4 人有 12 小時」論，胡先生步出宏福苑時，帶走十多袋物品，包括陪伴一家人 12 年的寵物犬遺物「我哋一家四口，總共住咗一百四十幾年⋯⋯我哋用『 12 小時』去執咗頭先嘅嘢，係部分嘅啫，咁所有嘅嘢係有意義，唔係用金錢衡量。」
火場被困 15 小時 關節受損
他透露，自己與太太從火場被困 15 小時後獲救，他當時在 21 樓，行了兩層已行不到，當時由消防員孭他落樓，「我好感激消防哥哥」。他今日身穿的黑衣風褸、運動短褲，正是當日被救走時的衣著，他說，一來「有個感覺」，加上出院後，也沒特別添置新衣服。被困火場，胡先生吸入過量一氧化碳，導致下肢行動不便，留院超過兩星期。他近來依靠上落過渡房屋的樓梯，鍛鍊身體，但仍難上樓。故今日由太太、兩個兒子、朋友登門，家人傳來的相片顯示單位無嚴重損毀。
縱可帶走物品，胡先生談起宏福苑時，提到災後有遇上舊街坊，彼此都有感觸，也不時與太太重返廣福一帶，以至出席街坊喪禮。他不禁神傷指「啲街坊有老有嫩，因為咁樣走咗⋯⋯」他搖頭說，「我放唔低。」政府早前指，會考慮居民多次申請上樓，胡先生指，自己仍希望上樓。就安置決定，他冷笑指，現時政府安置只有「A、B餐」，完成上樓後會再作打算，惟他不忘提到，上樓後「更加想原址重建」只要有時間表，他就願意等。
他說，「我啲家人、親朋戚友對我嘅支持，亦都係我、我太太可以爭到最後一分一秒生存，亦都好多社會各界善心人士，喺呢個黑暗嘅時候有少少光，亦都包括各位傳媒朋友。」
物品易買 地方難尋
「入到去我覺得都（燒）黑到幾嚴重，個感覺就係，如果嗰日無走都應該死」同樣被困火場後獲救，宏昌閣居民張先生，從家中裝滿十多袋物品。他說物品可以買回，但地方不能尋回。張先生憶述，火警當日，他帶走寵物貓、雀離開，今日重回大廈，大堂已完全焚毁。他提供的相片可見，其單位雜物散落一地，客廳已熏黑，睡房未受波及。
張先生與其他居民於災後開了 YouTube 頻道，分享對宏福苑的心聲，包括提出「原址重建」訴求。他今指，從十多歲打工儲錢，到 28 歲買入單位，父母也住在廣福邨，「佢對我嚟講好似一個獎項、一個 trophy 。」「我頭先上去最感慨，唔係話有幾多剩返喺度，而係我望住自己好鍾意呢個單位、望住個海我覺得，去邊到搵得返呢啲地方？自己咁鍾意。」他最後指，上樓後，更加加深「原址重建」想法，「特別頭先再望個海，覺得⋯⋯真係搵唔到」
Byebye 啦，呢個海景
「Byebye 啦寶寶，冇哂啦，乜都冇」、「Byebye 啦，呢個海景，都冇晒啦」。宏昌閣高層住戶馮小姐，今早與火海逃生的媽媽重回單位。她在單位邊拍片紀錄，邊哭訴：「我哋每個窗都可以見到海照㗎，冇哂啦，一個安樂家，就咁冇哂啦」。
她向記者表示，當日媽媽被困火場後，逃到鄰居單位避難近廿小時，但貓貓「寶寶」卻不知所踪。人貓失散後，馮小姐憶述當日情況指，宏昌閣有「翻燒」情況，深明消防員是以命相搏拯救媽媽，「我哋唔可能要消防員以命換一命」，故今日上樓擺放鮮花送別。
她下樓後一度難掩悲傷說，重返單位期望可以取回兒時贏得的獎牌等，但走進門廊後，「渣滓，渣滓，乜都冇，全部化為灰，可以熔嘅都熔晒。」她指，今日重回宏福苑眼見單位滿目瘡痍，自己至今也沒法釋懷，因她從小居於大埔，宏福苑也是長大後，有能力置業下的選擇，如能重建，等十年也無妨，「你話咁多個單位都無燒到，咁咪慢慢整」。
「放長雙眼去睇」
居民苦苦追討，尋求合安管理公司為宏福苑召開業主大會。今馮小姐則憤斥，居民聲音被政府無視，「邊會理我哋講嘅嘢唧？（業主）大會都唔畀我哋開。」她又批評，當權者「一個人話晒事」，「我要買你塊地就買你塊地，邊有我哋講嘅嘢，大會都唔畀你開，你今日搶得我哋嘅嘢，個天係度睇住，我哋健健康康放長雙眼去睇」。
質疑七座全拆「戇居」
居於宏道閣八樓的謝先生，只帶備一個尼龍環保袋上樓。他說，上樓只望幫助不良於行的媽媽取回聖經、她的衣車、幾張照片，及一部方便媽媽食藥的小飲水機，及空氣過濾器。他指日後會再重新上樓，因此「都係諗住攞簡單嘢」、「唔使（準備）啦，又唔係搬屋」。被問為何有信心可重返單位，他認為，「唔開𨋢即係想我哋唔搬嘢走、唔搬嘢走即係我哋會返嚟。」
指會向申訴專員公署投訴
謝先生在宏福苑住了 20 多年，他表示，今次回家「冇諗住告別」，「諗住坐梳化一陣間」，沒打算多走幾轉，「唔使啦，又唔係搬屋」。政府有意拆卸七座受火警影響的樓宇，謝先生表示會盡力爭取保留，包括會向申訴專員公署投訴，「佢（政府）同港大已證實石屎結構冇問題。一次過拆七座，係好戇居嘅一件事。」謝先生上樓後，向《集誌社》提供單位照片，其單位沒有明顯燒毀痕，他一如訪問所言「坐梳化」，又表示尊重、理解其他街坊感受，惟對政府將七座大廈完全清拆的做法不滿，質疑是重覆災前政府部門敷衍居民的做法。
房屋局曾指，七座樓宇的整體結構無即時倒塌風險，但熱脹冷縮令石屎結構現微細裂痕，影響七座樓長遠維修、結構安全；惟至今未公開有關報告。
租客的無助
宏道閣 17 樓的租客、近七旬的何女士指，租住單位一年多，單位內只有洗衣機、冷氣機屬於業主。火災後，業主曾遊說她不要申請災民證，會助她代為申請資助，「佢淨係覺得我哋攞咗佢啲錢」。
何女士的租約，由兒子所簽，但他不是住客。等到今天可上樓，業主也只允許簽租約的兒子代為上樓取物。何女士說，已就上樓問題多次向業主嘗試溝通，但對方拒絕溝通，找過區議員協助也無果；她曾提議，可否陪同上樓但不進入單位，但社工仍指不能，「好無助，我哋都唔知搵邊個人。」
「話個程序係咁，無辦法改變」
何女士的兒子衛先生補充指，程序上要由業主交上樓名單，因此媽媽沒有話語權。他又指，曾與一戶一社工溝通，「佢就話個程序係咁，無辦法改變。」
學生望取回獎牌
與家人一同回到宏道閣 15 樓的學生 Edan 說，知道可回家後，已與父母要求一同上樓，沒從社工收到單位相片，Edan 說未知單位情況，主要希望取回數學比賽贏得的獎座獎牌、「都係想見返屋企最後一面」。
相關報道
宏福苑回家．第七日｜鄰居罹難 43 年家園化灰 宏昌閣街坊哽咽 宏道閣居民回家再影全家福
宏福苑回家．第六天｜告別？怎告別？ 中風伯伯淚灑 長者：根種咗係度 拍下最後風景
宏福苑回家．第五天｜雨中別家園 葉家駒：心情複雜 居民哭訴：三個鐘難執咁多年嘅嘢
宏福苑回家．第四天｜宏昌閣、宏仁閣居民今回家 災民：慶幸人還在
宏福苑回家．第三天｜最後一批宏新閣居民執拾 屋居民感慨：出面咁繁榮，裏面頹垣敗瓦
宏福苑回家．第二天｜擁兩單位戶主 自費購外骨骼上樓 「損傷又係兩間，記憶都係兩間」
宏福苑回家．第一天｜紅網圍封 灰燼挖掘家當 首日 264 人上樓 三宗失物求助警續跟進
宏福苑回家｜作供曾自責 好好道歉 重擔稍放 高以蕾：我哋會再返嚟
宏福苑回家．災廈眾生｜廿蚊燒烤網 灰燼「淘」家當 樂天爸爸也有憂慮
宏福苑回家．災廈眾生｜家園焚毀 愛貓骨灰龕倖存
宏福苑回家．災廈眾生｜長輩曾是名媛世家 「成屋都係文化嘢」 居民見證宏福苑的誕生和終結
宏福苑回家｜「媽咪我哋返來啦」 羅曉琪兄妹 返家念亡母 「走啦，我地一齊走
宏福苑回家｜重返嚴重焚毀兩居所 子單位見煙頭 父家園有部分金器未尋回
