宏昌閣及宏仁閣居民今日（25日）繼續回家，中風的居民陳先生，由家人推著輪椅到場，未能上樓，在樓下等待與家人視訊，跟家園道別。陳先生當場淚灑，他的太太說，丈夫「一聽到火燭佢已經開始喊，一路喊到𠵱家」。
有長者說，不想跟家園告別，「根種咗係度，你要連根拔起」，表示如修葺好，願搬回居所。有居民則在窗前，拍下最後一次見到的吐露港風景。
最後的道別，也或許是最後的機會，在家裹找回最深刻的記憶。有街坊在家裏找回，有六、七十年歷史的花膠；有街坊仿如「考古」般，默默俯身剷灰，發現部分金器已半溶，部分不翼而飛，已報警求助。
中風長者淚別家園 家人望政府有同理心
今日有 124 戶 459 人上樓，九宗懷疑失物求助，六宗已尋回、三宗居民相信已被焚毁。有 54 戶 125 人上落大廈不止一次，當中四戶六人上了五次。
希望安排籠𨋢
陳太與丈夫今早到達宏福苑，不過他們只能在樓下等待與家人視訊，透過螢幕與宏仁閣 26 樓的舊居道別。陳太指，陳先生因中風行動不便，需坐輪椅出入，因此未能上樓，「佢坐輪椅，我諗佢哋應該安排唔到𨋢囉，唔知道可唔可以嘅呢可？唔知點解啲工人又可以上到去，有籠𨋢咁樣」。
陳太指，早前已從社工傳來的相片中，得悉自己的單位已經「化為灰燼」，仍抱着一絲希望要入屋「掘」回物品，包括找到有紀念價值的物品、金器等，「越近執拾（日子）就越焦慮，我噚日成日發夢就係掘嘢，但最想嘅都係同呢個屋企道別」。
相關報道：
宏福苑回家｜同歷大火 英格倫費爾大廈 政府加建電梯 聘災害管理公司 助居民取物
潸然淚下 妻輕聲安慰
當聽到家中已化成灰濛荒土，陳先生雖然不便說話，但禁不住潸然淚下。太太馬上摸摸他的臉，輕聲說「無事」。陳太憶述，火災當天他們到了附近的茶樓飲茶，「一聽到火燭佢已經開始喊，一路喊到𠵱家」。
她坦言，越接近可看到家中實況就倍感緊張，但近日看到街坊回家的新聞，聽到他們的訪問，她開始覺得自己並不孤單，「好似有人同我哋一齊行緊，係已經喊咗好多次」。
應召開居民大會 了解安置意願
陳太認為，目前政府最應該是召開居民大會，真正了解街坊對安置的意願，「就算我哋要投票，最後結果係要離開宏福苑，我都係心甘命抵，呢個係我哋意願，希望政府真係能夠愛民如子，能夠有智慧同愛心，有同理心為班災民去上，唔係你定一個方案畀我哋就一定要去，就算係都心有不甘」。
她指，自己本身是六人家庭，「你安排都要合理啲，咁我可以抽到啲咩嘢呢？如果你有機會重建，10年我都等，我都等你，咁點解唔可以呢？可唔可以俾多一個方案我哋呢？」
長者哭訴被連根拔起
不少長者都排除萬難上樓，七旬麥先生居於宏仁閣 25 樓，他帶備拐杖、護膝堅持要上樓，「盡力啦，因為我膝頭哥都唔好，但我唔上又唔得呀！」。為上樓，他訓練自己行樓梯一星期，「因為好辛苦㗎行上去，嗰條氣好辛苦，而家住十幾樓，就隔日行一次」。他落樓時感到膝頭受壓更大，「上就好啲，落到隻腳好痛」。
麥先生指，早前並未收到單位相片，估計損毁情況不是太嚴重，最終單位內的廳、廁所等都未被燒毀，惟因鄰居單位火勢較大，廚房受損情況最嚴重，「初初預算係冇（物品）㗎啦，心理上都覺得未必有啦，但都搵得返嘅」。他取回結婚舊照等物品，但坦言未能搬走任何大型物品。
三小時絕對不夠
事隔約半年再踏進單位，麥先生的感受強烈，「好淒涼囉覺得，自己個屋企點解搞成咁？唔好受」。他續指，執拾時間三小時絕對不夠，「我搬屋都搬咗三個禮拜，我淨係喺樓上搬落去樓下，都用咗成個月，但因為而家冇𨋢，三個鐘你話夠唔夠呀？」麥生表明曾要求再度上樓，「其實唔會係得一次咁少㗎，一次基本上係執唔到嘢，冇辦法啦，佢（政府）都安排唔到畀我哋，我哋小市民有咩力量啫？我哋要求整返架𨋢，佢都冇出過聲話整唔整到呀，只係話『壞晒呀』」。
麥先生與太太在宏福苑居住 43 年，他堅信這不會是最後一次「回家」，「唔會告別㗎，告咩別啫，呢度我屋企嚟！」
撐着拐杖的太太同樣未能上樓，「我爬上去驚一陣有人抬我落嚟呀！我費事累佢哋呀！」對於未能親身重回家中，她大嘆不捨，「點會捨得啫！根本無爛無盛，你整返畀我哋就可以入去住，但問題就係政府肯唔肯做咋嘛！咁佢唔肯做我哋都冇計㗎！」
連根拔起
「我哋嗰條根種咗喺度，你要連根（挑起），無計，好無奈，你一刀切掟晒我哋第二度」，她怒轟政府未有為居民提供選擇，「公屋呀，揀樓呀都有三次俾人揀啦，呢度乜都唔知，方向唔知、高度唔知，售樓書乜都冇，咁我哋點揀呀？點樣俾個業權你呀？」，要求政府與宏福苑業主立案法團管理人合安，召開大會與居民商討，「同我哋居民傾吓偈吖，同我哋傾偈嘅勇氣都冇咩？」
宏仁閣單位盡毀 「一家人齊齊整整就ok」
「一家人齊齊整整就ok，四個人齊人就最開心」。宏仁閣最頂層 31 樓住戶顏小姐，一家四口上樓執拾。她指單位盡毀，「基本上好多嘢都搵唔返，因為全部燒晒啦」，但慶幸仍能取回兩個兒子出生時所買的玉鈪和金佛，正是她最想取回的其中兩樣物件，「老公突然喺嗰堆灰度挖返出嚟，真係天意！」
顏指，上樓過程比想像中好，環境通爽和光猛，「我哋直頭都冇戴口罩上去行」，中途只休息過一次。不過入屋後環境「好惡劣」，「阿仔啲證書、獎項全部都無晒，都收過（單位）相㗎喇，搏下睇下有無嘢搵得返」。她與家人住在宏福苑四年，對單位狀況亦已有足夠心理準備，因此情緒尚可。
兔仔化灰 帶「大悲水」上樓
不過，顏家原本飼養了一隻兔仔四年，牠一直住在籠中，因火災而不幸罹難，「佢無得走，監生燒死咗。（搵得返屍體？）搵唔返呀，最後變咗灰」。她為兔仔準備了一支大悲水帶上樓，「想佢早日投胎」。
拍下最後的吐露港風景
宏昌閣 13 樓朱先生與舊居的告別方法，是拍下一幀家中遠眺吐露港的風景，只求記低這片陪伴了他 28 年的畫面，「因為之前大維修都冇見過個海，冇見過啲陽光，佢燒完之後，反而𠵱家（重現）⋯⋯影到就盡影啦」。
他指，自己曾收過社工提供單位相片，但只拍攝到門口情況，「上到去單位度就⋯⋯因為我嗰邊係起火嗰邊，所以就『total loss』（全數損毀）」。家人只找到少量的金器和現金，他自己亦發現手提電腦的殘骸，但未有取走，反而取回一隻燒剩錶面的手錶。他已佩戴該錶幾年，碰巧在火災當天未有帶出街，「都係啲回憶嘢，起碼都有個殘骸嘅嘢留念」。
「唔係話放低就放低到」
朱談及回家心情時哽咽，「當 say 個 byebye 囉⋯⋯話晒住咗廿幾年，咁所以都（心情）複雜嘅走嗰一下，因為知道屋企狀態咁樣，應該都唔會再返上去，所以係真係最後一次同屋企byebye（說再見）」。
「放低⋯⋯當然需要時間啦，唔係話放低就放低到，喺度廿幾年，你話係咪即刻改變到，或者搬去其他地方度住，就可以即刻搞掂到啲心情呢？我覺得係比較困難」。
部分金飾已半溶 有的不翼而飛已報案
陳生及陳太居於宏仁閣二十二樓，今天上樓執拾物品，用盡三小時時限的每分每秒，直到最後一刻也不願離開。陳太說，她本身早餐吃得不夠飽，但上到單位時，心念這是最後一次機會，於是「去盡啲」，跟先生兩人「考古」一般默默俯身剷灰，「我哋都盡咗我哋能力去搵啊，鏟啊，掘啊，直情係用手潑走啲灰。」
兩人後來成功取到一些金器、碗碟及飾物，也找到有紀念價值的物品如母校鎖匙扣。物品分裝成五個紙箱，運送到仁濟醫院贊助居民的迷你倉貯存。不過部分金飾已半溶，有的更不翼而飛。陳生指未能肯定失蹤的金器燒至全溶或是被偷竊，但經已報案。單位也被燒得滿目瘡痍，部分位置僅容一人進入，因有崩塌風險。「你見到啲瓦爍爛曬，洗手間直情透光既，個牆已經係差少少燒穿。」陳太說。
兩人最終跟單位留下自拍，作最後道別。他們執拾至最後一刻被催趕離開，才趕緊攜物奔走二十多層樓梯，抵達樓下才發現自己有多累。「但係真係，覺得原來就算咁攰，但係真係需要上去。」「可以返去單位，絕對係好大意義。」兩人說。
跟過去道別後，便要繼續應對未來。陳生陳太表達對「樓換樓」安置方案的憂慮。他們擔心若自己不幸選樓次序較後，可能只剩小面積單位。他們現時與陳生母親同住，「二百幾呎單位，唔通我媽咪瞓下格床，我兩個瞓上格床？」加上母親行動不便，需要在家裹安裝無障礙設施，他們擔心無充足空間。
尋回六、七十年歷史的花膠
也有住戶找回具歷史價值的「寶物」，是家傳的海味。張先生家人住宏仁閣25樓，今天幫忙上樓拾取物品。儘管家裡物件盡化飛灰，他卻幸運地在廚房未被燒毀的一角，找到父母貯存了六、七十年的花膠。「（年紀）大過我㗎。」因為具紀念價值，花膠多年來未被食用，想不到因此在火災下倖存。另有一家四口離場時指，單位甚麼也沒有，但想不到「搵到一蚊雞」，說到此時，大家忍不住一起大笑。
用了三十年的瓷碗 老居民詳列執拾清單
78 歲的林生及 78 歲的林太，火災前居於宏仁閣29樓。因林生曾中風，林太認為自己「力氣唔夠」，即使渴望回家，但今天只能望樓興嘆，改由女兒、女婿及兩名朋友下午代為上樓執拾物品，希望取回飾物與証件。但除此之外，林太說也列出長長的欲取回物品清單，「但個女睇咗，話冇樣值錢嘅！你咁都要攞！」
女兒眼中「唔值錢」的物品，卻是林太心中珍愛之物。當中包括多年前在耶路撒冷旅遊購買的花瓶、在葡萄牙買的花公雞牙籤筒、一個已用了三十年的瓷碗等等。林生則希望取回USB手指。
林太代發音困難的林生說：「裡面有很多同神父共聚嘅時刻，有好多回憶。」可是，女兒會把有價值的物品列為首選，這些「唔值錢」但具紀念價值的物品，「佢一定唔會同我攞落來啦係咪。」林太說，若然自己可以上樓，必定會一件不漏地全部帶走。「即係樣樣都係我嘅，我嘅心頭好，即係我唔中意，我唔會Keep啦係咪？同埋我哋咁嘅年紀Keep呢啲嘢，都係應該有個價值呀，有個紀念呀。」 （註：林太後來告訴記者，指女兒幫忙把花瓶及牙籤筒帶回來。）
望政府可安排升降機
林太最渴望政府可安排升降機，讓像她一般的行動不便的人士也可上樓。當聽到記者提到關愛隊義工或可幫忙她上樓時，她說或會因此考慮申請第二次上樓：「如果真的有辦法幫我上樓，有兩個關愛隊義工陪我係幫我攞啲重啲嘅嘢落嚟，我當然唔介意啦！」
林太的單位沒有被大火波及，尚算完好。但自火災發生後，她一直心焦家裡狀況。新相識朋友居於廣福邨，單位剛好面朝宏仁閣，便拍下照片傳她。林太向記者展示照片，說：「係咪啊？我間屋向呢個方向，應該冇燒到啦，係咪呀？ 」談起昔日家園，林太自豪地說：「我哋向海嘅，所以我好引以為榮，我成日同我啲朋友講屋企好舒服，」說到此林太不禁哽咽：「我哋諗住喺度安老嘅。」她指他們從「天地初開」時就已在宏福苑居住。買樓時，樓宇尚未建成，他們已選定單位方向。
誰料一場火災，奪去住了四十多年的單位，也毀了兩夫婦的安居養老夢。「去到呢個年紀，當然想安安定定……即係諗住簡簡單單喺度安老啦，同埋我哋兩個要求又唔多，希望enjoy life，簡單嘅life。 」
相關報道：
宏福苑回家．第六天｜告別？怎告別？ 中風伯伯淚灑 長者：根種咗係度 拍下最後風景
宏福苑回家・第五天｜雨中別家園 葉家駒：心情複雜 居民哭訴：三個鐘難執咁多年嘅嘢
宏福苑回家．第四天｜宏昌閣、宏仁閣居民今回家 災民：慶幸人還在
宏福苑回家．第三天｜最後一批宏新閣居民執拾 屋居民感慨：出面咁繁榮，裏面頹垣敗瓦
宏福苑回家．第二天｜擁兩單位戶主 自費購外骨骼上樓 「損傷又係兩間，記憶都係兩間」
宏福苑回家．第一天｜紅網圍封 灰燼挖掘家當 首日 264 人上樓 三宗失物求助警續跟進 一長者送院
宏福苑回家．災廈眾生｜家園焚毀 愛貓骨灰龕倖存
宏福苑回家．災廈眾生｜長輩曾是名媛世家 「成屋都係文化嘢」 居民見證宏福苑的誕生和終結
宏福苑回家｜「媽咪我哋返來啦」 羅曉琪兄妹 返家念亡母 「走啦，我地一齊走
宏福苑回家｜重返嚴重焚毀兩居所 子單位見煙頭 父家園有部分金器未尋回
