宏福苑宏泰閣及宏建閣居民今日（1日） 繼續上樓。宏建閣的居民，回家後都看見居所安好，有災民發現屋內所有櫃門都被打開，暫無失竊；有住戶帶了兒子繪畫「我愛大埔宏福苑」的畫作上樓，臨行前貼在窗外，留下心跡。有居民帶走家裏珍藏的果皮、結婚照、新買的電視。有居民回家視察後有感，復修或原址重建，會否是個選項？不少居民都期望召開業主大會，對前路表態。有居民不滿政提出的收購方案，直言「我有交稅㗎，但原來仲衰過新移民」。
帶兒子繪畫「我愛宏福苑」畫作回家
曾聯署支持原址重建的宏建閣居民范小姐，今日（1日） 帶著 11 歲兒子昨晚所繪的「我愛大埔宏福苑，這裏是我的家」畫作回家執拾。
她眼泛淚光指，「唔係得我唔捨得，其實佢都唔捨得㗎」，指兒子亦很想回家，「佢都話媽咪我真係想上去呀，你可唔可以叫警察先生放我上去、或者叫社工姐姐幫我呀」，又說「就算我行 26 層樓都唔介意」；但今次因人手問題，若兒子上樓會「少咗個人幫手執嘢」，未能安排，但會應兒子要求，將畫作放在宏建閣的家，亦盼下次有機會能帶兒子上樓。
范小姐表示，回家最想拿回小朋友的物品，包括相片、乳齒、「佢以前 BB 仔做過嘅手模仔、腳模仔」，因「可一不可再，小朋友唔會變返細嘅 BB 畀你再做返」。她亦想拿回電視機，因「新買冇耐」。至於現金和金器要看看是否「健在」，「希望我淨間唔使報警啦」。
三小時的執拾時間，范小姐說「梗係唔夠」，要三個鐘內「斷捨離」是不可能：「我哋又唔係有錢人，好難做到斷捨離嘅其實。有啲人就做到啦，因為佢有錢吖嘛，可以隨時買過第二度，或者買過第二樣嘢都冇問題，我哋真係唔得囉」。她說，如單位沒損壞，「應該三日都攞唔晒啦，何況三個鐘？可能要三個月都唔定。」
對於宏建閣只有一個單位嚴重受損仍納入收購，范小姐坦言無奈，指若發現單位絲毫無損，心情更複雜，因無奈下要出售業權。她仍希望原址重建，但坦言「睇政府走勢，連宏志都話要收返」，不過希望政府再次考慮居民意願。
范小姐今午與家人離開宏福苑。她說，兒子交托的畫已放在窗邊，也為他帶回恐龍、火車玩具，自己則順利取回樓契、象徵母子安樂窩的「Sweet Home」門牌、兒子出生紙，以及手抱時的手模腳模，一行人也在單位拍照留念。
已向社工申請再次上樓
慶幸單位未受損毀的她，向記者展示單位情況說，消防破門時，未有弄壞鎖頭，因此她離開時得以鎖好大門。上樓後最不捨得與單位道別，也已向社工申請再次上樓「真係講唔出，嗰個地方住咗咁耐，好有感情，同埋啲嘢，我自己都好愛錫啲傢俬、電器，裡面所有嘅嘢全部都好新淨，全部都充滿住我同個仔嘅回憶，喺晒裡面，𠵱家好似抌低咗個回憶，就覺得有啲傷心。」范小姐說，對未來暫未有打算，如後續未能抽中居屋，可能會迫不得已從私人市場物色、甚或租樓。
宏泰閣低層居民莫女士，周五（1日）早上 上樓執拾，大火後她發現懷孕，但因失去居所、無處安胎而被逼流產；又斥政府「選擇性失聰」、圖以立法收回業權是「撳住嚟搶」，自言居於宏福苑逾 40 年，「100% 係想原址重建」、「等幾耐我都肯等」。
立法收樓如同「迫遷」
日前政府公布宏志閣收購方案時，財政司副司長黃偉綸曾指不排除立法，收購不擬出售的業權。范小姐說，「如果佢（政府）係為咗咁樣而主動立法，其實我覺得某程度上，好似有少少變咗叫做，夾硬搶個業權返嚟。」她形容情況如同「迫遷」，「會唔會第時有啲咩地方，或者有啲乜嘢位置，可能要收購但啲人唔肯走，咁你會唔會又為咗呢樣嘢而去立法呢？會唔會有少少唔係好保障我哋市民嘅生命財產？」
宏建蘇先生：佢哋覺擦咗咪得，我哋就係犧牲品
宏建閣 26 樓居民蘇先生形容，執拾過程較亂和急，他反諷說：「四個人，（共）12個鐘，係咪先？但係都唔太夠嘅，因為我六個人，住咗（共）30年喇喎⋯多嘢執嘅」。他指過程中，「嗰個部門」溫和地催促他們，他形容，是一位剛烈的「男仔」，用一把温柔的聲線，笑着提醒用了多久、還有多少時間。
被問被催促的感受，他說「你都冇咩感受㗎喇，自從有咗呢個大維修之後，我個人都冇咩感受㗎喇，因為你畀錢出嚟，跟住你冇部門監管，然後你𠵱家仲要所有人都唔覺得自己冇（有）問題，但我會改善」。
他再發表「鉛筆、原子筆論」說：「好似幼稚園讀書咁，一支鉛筆嘅道理咋嘛，點解一支鉛筆後面有舊擦膠吖？因為你細個，你有改善嘅機會；大個點解你用原子筆吖？因為你會留意到幾時先係一個正確嘅嘢，你先會去做吖嘛」，但他續說：「咁但係佢哋都冇㗎啦，佢哋覺得佢哋而家用緊鉛筆咋嘛，擦咗咪得囉。但原來人生唔係樣樣嘢你擦得㗎嘛，但我哋就係犧牲品啦。」
對於宏建閣大部分單位完好仍要收購，他說當然可惜，指「我用呢個價錢買呢個地段」，但現時被逼在有限的選項中，選不喜歡的東西。但他指，「唔係你畀咩我就要咩吖嘛，我唔係難民喎，我唔係偷渡嚟㗎喎，我 local 嚟㗎喎，我有交稅㗎，但原來仲衰過新移民。」
被問望有何支援，他說「我覺得應該開吓業主大會啊依啲囉，聽吓我哋究竟要啲咩囉」，指因業主大會中才會知道他們的訴求和心聲：「我哋已經錯過咗好多次喇喎，個個都不瞅不睬，連我都係不瞅不睬，但跟住殺到埋身，就冇得不瞅不睬。」
宏建單位完好 被問政府有否放錯誤資訊？ 住戶：哇，呢樣嘢好敏感喎！
宏建閣 29 樓住戶陳先生代父母上樓。他指，今日四人上樓，按兩老意願，取回重要財物、相簿、以及兄弟結婚時，媽媽所穿的「飲衫」，其他傢俬未有搬走。他提到，父母在大埔居住超過 40 年，在他四年級時，一家人一手買入宏福苑。火警當日下午，父親需要覆診，只有媽媽在家，她聞到煙味即致電管理處，獲回覆說只有兩幢起火，幸好媽媽親自落樓，雖然一度失聯，終避過一劫。
陳先生說，上樓前曾擔心單位有財物失竊情況，包括昨日有中層戶主財物不翼而飛；幸而單位沒有被搜掠的痕跡。「完全冇損毀、一啲損毀都無，包括煙熏，同埋水漬，完全都無。即係簡單啲，如果通咗電嘅話，我吖爸吖媽今晚就可以返去住。」
「修復住返，會唔會都係方案？」
就安置方案，他未上樓前認為是在政策框架下選擇，但不少宏建閣街坊上樓後，異口同聲認為或可重新入住，陳先生也有同感，「之前淨係話宏志閣無燒毀，𠵱家原來宏建都好似無事，唔係淨係一棟（無事）喎？⋯⋯講緊無事單位唔係淨係一棟咁少，我覺得從原址重建、甚至乎修復住返，會唔會都係一個方案？」
被問到上樓後，會否認為早前政府就樓宇情況發放錯誤資訊，陳先生說，「哇，呢樣嘢好敏感喎！個人嚟講，我唔認同，因為起碼我見到，我間屋無事，我亦都聽到好多鄰居話無事，甚至乎頭先行樓梯落嚟，我都唔見到其他單位有事。」如日後重開電梯，姑勿論能否重新入住，他亦希望帶父母再次上樓。
宏泰閣婆婆：由冇到有、再由有到冇 只能向好嗰方面看
居於宏泰閣高層逾 40 年的婆婆，表示家中損毀情況嚴重，「燒咗好多嘢」、「廚房冧咗」，室內遭熏黑，床、窗全爛掉，珍貴相片被淋濕。對於家中狀況，她坦然：「冇嘢㗎，咁已經發生咗嘅嘢就發生咗㗎啦、冇得追㗎啦，你只能夠向好嗰方面看囉。其實你燒咗嘅嘢，你追又追唔返，亦都唔知邊個負責任，但自己就處之泰然囉，開心啲囉，唔好咁緊張囉。」
婆婆坦言，對居所感不捨，「因為自己建返嚟㗎嘛，由冇到有，而家就變咗由有到冇」，她指火災前因樓上水浸影響鋼筋等，花 20 多萬裝修，去年 10 月中才重新入住，但「全部都燒晒喇，樣樣新都冇晒喇」。婆婆不希望原址重建，「我想快啲走，真係想快啲有個屬於自己嘅家，覺得住喺其他地方冇安全感，我想要有安全感」。
宏建閣關太：所有櫃門遭打開、但暫無失竊
宏建閣 28 樓居民關太，今上樓取回數十年來自己曬的果皮、海味、兒子的童年照片、於公司工作 30 年獲贈的手錶等。她指家中「一定有人摷過」，入門口後「廚櫃、鞋櫃、所有櫃都比人開咗」，但暫時認為沒有失竊。
關太指，不會打算返宏建閣居住，指雖然很可惜、有幾十年感情，「但而家咁嘅情況，唔會返去住，寧願重新開始一個新嘅生活」，她指辛苦供完樓，現時回去住後將來沒人買。但她補充，「如果你係原區原址重建，我一定會（回去住），因為一定係有感情嘅大埔，住咗幾十年。」
陳先生今協助居於宏建閣的七旬夫婦執拾，指他們執拾後也有不捨哭泣，「好唔開心，始終自己屋企吖嘛，啲嘢都企理，但就要放棄咗呢個屋企」，最終夫婦將一袋高爾夫球棍轉贈他。
有否失竊？ 宏建袁先生：唔講喇嗰啲，屋企人安全平安已經夠
宏建閣居民袁先生落樓後表示，單位完好、「一啲都冇特別問題」，因此「比預期執多咗好多嘢」，包括衣物。被問到有否失竊，他思索片刻說：「eh⋯⋯唔講喇嗰啲，我諗大家都知咩事㗎喇，唔好再講喇，我諗屋企人安全平安已經夠喇。」
對於宏建閣只有一個單位嚴重受損仍納入收購，袁先生眼泛淚光表示無奈，指他於宏福苑長大、於宏盛閣居住逾 30 年，「好開心嘅回憶都喺度發生」，而小朋友出生後，「睇晒成個大埔，真係呢度先適合屋企人或小朋友居住」，故不足一年前特意搬回宏福苑居住。
他續眼濕濕憶述，大維修期間「屋企封晒窗、冇陽光咁樣成屋坐喺度，我都忍咗一年啦，諗住大家都差唔多埋尾，點知遇到啲意外咁樣，我諗大家唔會明白我哋嘅心情囉」，事隔五個月再回家感到不捨，「我諗返到嚟都已經忍唔到㗎喇已經，成個屋企都唔同晒」。
宏建閣居民：知道間屋冇事，最想直程搬返入去
蕭先生的父母居於宏建閣，是宏福苑第一手住戶，今日陪同六旬母親上樓執拾。他指沒有收到相片，料單位完好，望尋回金器、現金、相簿等，但擔心遭爆竊，指「一早都講過有咁嘅機會，不過冇人理」。
收購方案：「冇得揀嘅選擇下，就唯有支持」
對於政府的收購方案，蕭先生說父母「本身唔支持，但你冇得揀嘅選擇下，就唯有支持」，「老人家唔可以等到好多年㗎嘛」；加上即使樓換樓亦要自行付律師費，「都要蝕返畀佢」，打算直接取現金離場，「攞舊錢慢慢使」。
蕭先生又說，如果可以，父母「最想直程搬返入去啦，知道間屋冇事吖嘛，但係政府唔容許咁做」。對於宏建閣只有一個單位嚴重受損仍納入收購，他感無奈，指公布方案前，「根本冇人知道單位或者大廈損毀嘅情況，根本你嗰時都冇得做選擇」，至後來得知僅一個單位受損，政府已公布方案，「咁你都冇得揀啦」。
「都要學識放手囉」
要與逾 40 年的家道別，蕭先生的七旬父親說「梗係唔捨得啦，但都要學識放手囉，都冇辦法」，對於政府方案，他說「都係做得好嘅，都支持嘅」，認為「照顧都算係周到㗎喇，今次攞嘢都照顧得好好」。
政府表示，今日（1日）宏泰閣五個樓層，及宏建閣高層11個樓層有 130 戶 511 人回家，有七宗求警協助，三宗個案，居民相信財物或已被焚毁；四宗的單位無被搜掠痕跡，居民未能提供財物詳細資料。
相關報道
深度：
宏福苑回家｜哭別雙親 面臨收購 遺屬蘇先生人亡家破 卑微願望盼重建
宏福苑火災｜工權會訪遺屬 記罹難外傭故事：想佢哋每個人嘅名、故事出現返
宏福苑回家｜災民回家記 忐忑準備 8 分鐘上 15 層 執廿袋家當 無暇哭泣
宏福苑回家｜夾萬鈔票化飛灰 婚照相簿倖存 與家園自拍好好道別 戶主盼消化情緒前行
聚焦：
宏福苑回家．第 11 日｜父女罹難 家人尋回全家福 居民房間被搜掠 失十多萬元財物
宏福苑回家．第十日｜宏泰閣、宏建閣居民回家 卓永興認不止一個單位被堆雜物宏福苑回家．第九天｜女兒場外遙念亡母 住戶返家驚見一屋堆滿外來雜物
宏福苑回家．第八天｜遺孀憶丈夫最後通話 倖存者暗寸卓永興 居民質疑七座全拆
宏福苑回家．第七日｜鄰居罹難 43 年家園化灰 宏昌閣街坊哽咽 宏道閣居民回家再影全家福
宏福苑回家．第六天｜告別？怎告別？ 中風伯伯淚灑 長者：根種咗係度 拍下最後風景
宏福苑回家．第五天｜雨中別家園 葉家駒：心情複雜 居民哭訴：三個鐘難執咁多年嘅嘢
宏福苑回家．第四天｜宏昌閣、宏仁閣居民今回家 災民：慶幸人還在
宏福苑回家．第三天｜最後一批宏新閣居民執拾 屋居民感慨：出面咁繁榮，裏面頹垣敗瓦
宏福苑回家．第二天｜擁兩單位戶主 自費購外骨骼上樓 「損傷兩間，記憶兩間」
宏福苑回家．第一天｜紅網圍封 灰燼挖掘家當 首日 264 人上樓 三宗失物求助警續跟進
圖輯｜遺屬回家祭雙親
宏志閣重置｜議員上月指逾五成業主想賣樓 政府今指達 77% 爭重建居民：效率犀利呀
宏福苑回家｜宏志閣 5.13-17 限時上樓 卓永興：望保持一致性
宏志閣重置｜63 日內抉擇 6.30 前未夠 75% 業主願賣業權 收購方案會「拉倒」
宏福苑回家．訪問｜雙親葬火海 蘇先生帶花回家悼念：望來生再報答恩情
宏福苑回家｜作供曾自責 好好道歉 重擔稍放 高以蕾：我哋會再返嚟
宏福苑回家．災廈眾生｜廿蚊燒烤網 灰燼「淘」家當 樂天爸爸也有憂慮
宏福苑回家．災廈眾生｜家園焚毀 愛貓骨灰龕倖存
宏福苑回家．災廈眾生｜長輩曾是名媛世家 「成屋都係文化嘢」 居民見證宏福苑的誕生和終結
宏福苑回家｜「媽咪我哋返來啦」 羅曉琪兄妹 返家念亡母 「走啦，我地一齊走
宏福苑回家｜重返嚴重焚毀兩居所 子單位見煙頭 父家園有部分金器未尋回
宏福苑回家｜七旬住戶搬走「聽咗 30年」音響 對政府收購方案「好唔忿氣」
宏福苑回家｜宏昌閣頂樓 唯一沒燒的單位 八旬夫婦：好想返去住 將會「樓換樓」
