宏福苑回家．第 15 日｜首輪回家　最後一日　父母葬火海　遺屬一屋三口剩下一人

聚焦一周
2026-05-04
9:00 am
集誌社記者

今日（4日）是首輪上樓的宏福苑居民，最後一日回家。過去 15 日內，共有 1674戶，共6265人完成上樓。最後一批宏盛閣及宏泰閣的居民上樓。宏泰閣有 82 人死亡，是死亡人數最多的一幢樓宇，不少災民手持鮮花回家。 29 樓的居民黃先生，父母葬身火海。大火當日，是父親的 70 歲生日，他哽咽說：「無機會同佢講聲生日快樂」。他指，雙親是在人禍中離開。他對聽證會感失望，「感覺好似係畀錢人哋燒自己間屋」。

文章目錄 hide

父母葬火海　一屋三口剩下一人

居於宏泰閣 29 樓的黃生，悲稱「間屋本身有三個人，𠵱家得返我一個」，強調「爸爸媽媽喺人禍入面離開咗」。火災當日是黃父的 70 歲生日，但最終與黃母一同在大廈後樓梯離世。黃生與黃母最後一次聯絡時，黃母指在後樓梯逃生，「佢好辛苦，最後都咳到講唔到嘢」。

黃生手持鮮花上樓，希望可以在後樓梯獻花悼念父母，「希望佢哋會鍾意」。火災當天是父親的70歲生日，黃哽咽指「無機會同佢講聲生日快樂，希望佢哋安息」。

黃指多個月來均相當想念家人，上樓前已收到照片，「都見到total loss咗……都已經化成灰，心情都緊張」，希望尋回手錶等貴重物品，「都預咗冇嘢執到，執到就係一個bonus」。上樓三小時，黃指「政府話12個鐘㗎嘛，不過我都係覺得唔足夠」，冀尋回父母遺物，如母親的首飾等，「希望講聲最後嘅再見」。

「每一個部門都話唔關自己事」

有參與聽證會的黃生指，對聽證會不予置評，「可以話係失望，今日可以做到啲咩呢，𠵱家畀我嘅感覺好似係畀錢人哋燒自己間屋…… 每一個部門都話唔關自己事，其實大家做多少少、行多一步，已經可以做到更加多，阻止呢場人禍發生」。

多年來居於大埔，黃生指希望可以原址重建，「因為呢度始終都係我成長嘅地方」，對政府沒有原址重建方案感到失望。至於回購方案，「我哋都無得揀」，仍在思考會否出售業權。

「同層好多街坊走咗⋯⋯人禍」

宏泰閣譚先生今午將步上 29 樓的家執拾，成為現階段最後一批回家居民。他透露年過 70 歲的媽媽很想回家，但家人擔心宏泰閣損毁嚴重，單位勸媽媽不要上樓，留在屋苑地面等候。他與家人居宏泰閣 35 年，大火當日幸無人在家，趕返現場目擊大火感震驚，「想見嗰啲（鄰居）走咗㗎喇，同層好多街坊走咗⋯⋯人禍」。

重置安排　「有得揀咩？被安排㗎嘛」

被問到如何評價政府上樓、安置措施，譚先生多次反問「有得揀咩？都無得揀㗎啦，被安排㗎嘛」，形容居民處「被安排」位置，只能跟大隊。他表示不捨得離開宏福苑，但講到是否希望原區重建，譚先生再反問「有希望㗎咩？有得希望㗎咩？（龍）門有轆㗎喎」。

「乜我哋宏福苑啲人仲有感受㗎咩？」

譚生指，取回家人及自己的財物，他形容上樓的感覺「好慘」，「上到去……我啲街坊喺我嗰層嘅都死咗幾個，有啲街坊之前都喺樓梯下面死」，上樓後有在鄰居門口躹躬致哀，「識咗好多年㗎喇」。至於有否取回珍貴物品，譚指「攞返個祖先落嚟」，可幸未有財物遺失」。

被問及有何感受時，譚直指「乜我哋宏福苑啲人仲有感受㗎咩？你哋問咗咁多日，無感受㗎喎，由維修開始都無感受」。

逃生期間大廈斷電　摸黑逃離火場

事隔近半年，有成功逃生的街坊，正慢慢調整心情，希望走出陰霾。宏泰閣 27 樓街坊何小姐亦是最後一批上樓街坊。她透露去年11月26日大火發生當刻，正與丈夫和9歲孩子在家，「其實係我小朋友聞到味，同我講媽媽有啲味喎。咁就周圍搵吓，發覺廚房好似有啲煙」，至聽到竹枝燃燒時的「啪勒」聲，慌忙奔落樓，時為下午三時多。丈夫稍遲幾分鐘落樓，跑到中途大廈已斷電，最終摸黑逃出。

慢慢調整心情　孩子猶有餘悸

何小姐指過去五個月慢慢調整心情，「起初會多夢，諗好多畫面，其後慢慢自己調整，我始終覺得所有嘢都要move on，唔可以永遠困喺嗰度。上樓呢件事俾我哋可望一望發生咩事，可以再放低一啲。」孩子災後猶有餘悸，因此今日不會上樓。何小姐表示將視乎情況，考慮再度上樓時陪小朋友回屋苑告別。她另透露近日增加運動次數，練氣準備來回 27樓。何小姐沒有預先收到單位照片，觀乎近日街坊上樓經驗，她有心理準備或有財物失竊，「抱最大期望，有最大失望嘅預備」，希望家中夾萬無礙，能取回財物。

「要拉坐監嘅全部一定要拉坐監」

居於宏盛閣的麥生，本身從事酸枝花梨傢具設計行業，今日上樓取回部份酸枝傢俬，並向在場記者指，「呢啲全部大過你哋」，但慨嘆部份由他自己親手設計的大型傢俬則難以取回，「啲傢俬我自己出圖自己做㗎，明式，幾廿年都啱用」，但「無辦法喇，無𨋢係搬唔到」，言談間又突然想起「哎呀唔記得咗拎啲畫，古董嚟㗎，好貴㗎」，唯有寄望第二次上樓。他指上樓前「擔心咗好多日」，但最終沒有財物遺失，「錢同少量首飾」。

麥生由宏福苑落成居住至今，「當時啲人二三廿歲儲夠錢買樓，一住就40幾年」，至今已近70歲，面對工程人員不知是否可信等問題，「我哋一班長者最擔心嘅就係，我哋將來驚二次傷害，希望政府策劃未來新居簡單裝修，間下房舖下地，我哋個個都 70 幾歲以上，無能力再搞呢啲嘢」。

「想唔斷都唔得，想唔捨都唔得」

麥生指本身對上樓是「望天打掛」，「聽到好多小道消息啲人唔見嘢，我哋都有啲擔心」，可幸「上到去我間屋好乾淨㗎，除咗啲灰塵之外」，指「學局長（副司長）話齋斷捨離囉，想唔斷都唔得，想唔捨都唔得，𠵱家想唔離都唔得，一定要離喇」，他直言「無奈就梗啦，不過托賴感恩全部人都冇事」，希望政府可以安排第二次上樓，複查是否有物品仍未取回。

麥生特別感激是，火災發生後，社會上的熱心人士「幫咗我哋好多」，但強調「要負責任嘅人全部一定要負責任，要拉坐監嘅全部一定要拉坐監，呢個就係我哋個期望」。