宏盛閣中層住戶冼先生，今（25日）午會上樓，欲取回私人收藏品。面對 6.30、8.31 的出售業權大限，冼先生鏗鏘地明言自己的決定：「我完全當冇件事，我只要求一樣嘢，我要返屋企，我要求重建，重建後回遷」。
「呢度絕對係我嘅根」
42 歲的冼先生，從出生一刻就居住在宏福苑，「呢度絕對係我嘅根，我剩係想要返我屋企，我嘅家，就係封鎖線入面，我淨係想要返屬於我嘅家」。
「我唔賣嗰喎，我要重建」
冼先生提到，早前收到政府回購業權的文件後，解說員已曾致電他及其父親，詢問簽署文件進度，「解說員第一句：呀，有好多居民賣，你幾時上嚟簽約？」。當時冼感到不悅，隨即在電話中大罵對方，「我好快話，我唔賣嗰喎，我要重建，跟住好快佢就唔出聲收咗線」。
後來，解說員再致電其父親，道出同一番說話，「剩係單方向向我屋企人埋手，即係話佢唔理㗎啦，總之我搵到個可以應承賣樓俾我嘅人，我就 ok 㗎喇」。「我見唔到解說，我見到一堆售樓員」。他續指，解說員並非有盡解說的職責，「好似入咗地產舖啲sale，喂，單位好正，好似地產sales sell 緊我賣樓，我見唔到解說，我見到一班售樓員」。
冼批評指，目前政府的方案並非幫助居民上樓，即使現時有的「樓換樓」計劃、東華三院的千萬撥款，他有感居民仍然只能「食自己」，「由頭到尾俾我哋睇到嘅情況就係，你賣咗個業權之後就躝屍趌路，自己搞掂，我咩都唔知，政府俾我嘅態度係咁樣。我唔明白政府仲有咩情理法，情先行，除非佢個情係解做『無情』」。
站在封鎖範圍外，冼先生說：「我嘅家，就係封鎖線裏面，而政府，係要拆毀我哋屋企」。他又質疑，未來這裏或會變成紀念公園，寫上 2025 年 11 月 26 日，nothing happened here。
