宏福苑第二輪上樓最後一日，廣福社區會堂門口今早（29日）排滿等登記的居民。宏道閣居民盧氏一家三口受訪時連聲嘆無奈，先不捨有 40 年回憶的家。盧太表示「焗住」出售業權，「無得選擇，𢲡住啲錢出去點買私樓？我唔係一把年紀仲要孭住層樓」，其女兒坦言政府方案不似預期，雖然自己好想原址重建，無奈「向現實企頭」，希望今日見到鄰居，親身道別。
盧先生表示，女兒自出生在宏福苑長大，亦幸好有女兒相伴，令過去半年災後生活較好過。不過，他失去家園的心仍然難過，「我哋屋企係無燒到，我退休嘅安樂窩，𠵱家變咗一樣嘢，我哋好似啲無主孤魂咁，四圍漂泊⋯⋯何處是吾家？」
曾在街上痛哭半小時
他透露，在宏福苑五級火後哭過無數次，甚至曾在街上擁着友人痛哭半小時。即使政府為居民提供特惠收購價，也無補於事，「對住一個家 40 年，有感情㗎啦，𠵱家同我講斷捨離」。
政府支援：頭嗰炮係威係勢
他不滿政府用善款收購業權，未有善用外界捐款支援災民，「頭嗰炮係威係勢，好多畀我哋，到後就⋯⋯ hold 到𠵱家」，指政府只提供每月$12050 租金資助，而其他慈善機構則有向居民提供生活資助。他引述有居民稱錢多到使唔晒，指對方「講啲風涼說話」，對有傷亡的家庭來說猶如在傷口灑鹽。盧先生另想知道多數業主的選擇，少數服從多數才是民主。
反駁貪心論 「調返轉吖」
盧太則反駁有指災民貪心的言論：「無人想間屋咁樣去換取人哋嘅捐助，我都希望啲人積吓口德，唔好再話宏福苑居民貪心。調返轉吖，你無咗間屋，無咗個家，或者屋企人死亡，佢係咪想用呢啲嚟交換吖？如果係，唔緊要，我諗好多宏福苑居民都想同你交換。」
指政府方案不似預期
二人女兒盧小姐補充指，自己無法控制政府給予甚麼支援，「政府方案係不似預期㗎喇，但我哋無奈都要跟着佢哋計劃去走」。她指出，明白很多街坊想宏福苑原址重建，也想宏福苑能原址重建，但認為實際不可能發生，「政府唔會撥咁多錢去重建一個咁多年前嘅屋苑」，她自己也同樣想原址重建，「但無可奈何地唔會囉，即係要向現實低頭，我哋唔係甚麼大財團，一個小市民，跟住佢 flow 去走」。
