宏福苑回家|患柏金遜症爸爸 一家五口想拍全家福 最後一刻獲通融 急於執拾、頻被催促忘記合照

分享:

黃小姐的父母,是宏福首代業主,當初購入單位時,宏福苑仍未成形,但附近已有不少學校,因此黃媽媽每天帶哥哥從九龍到大埔上學,直至宏福苑落成,一家五口在這裡度過 43 年歡樂時光。即使黃小姐成家立室後,仍曾先後租下宏志閣和宏泰閣兩個單位,兩位女兒亦在宏泰閣成長,直至近年才搬離。一個屋苑,是五口子不同人生階段的見證。

「唔係話斷捨離就斷捨離到」

「(最唔捨得)係啲設施,因為係由細陪到我哋大,我哋以前做完功課,就會一班人,樓上樓下、隔籬左右嗰啲,一齊就會落去一齊玩,大家都會好快做完功課就一齊落去玩。佢哋(父母)都住咗 43 年,都有感情,唔係話斷捨離就斷捨離到」。

患柏金遜症爸爸:想返屋企

黃爸爸近年患上柏金遜症,在大火發生之際,他注視電視中屋苑被火焰吞噬的情況,「其實佢係知道發生咩事,但我問佢有咩感受,佢⋯⋯無囉,無反應,但今次唯獨是⋯⋯可能真係最後一次,就有講話『想返屋企』」。黃爸爸在上樓的今天格外精神,「平時問佢嘢都係呆呆哋,但今日我哋問佢嘢會有反應,我估係開心囉」。

最希望回家拍攝一家五口全家福

「想返屋企」其實亦是黃小姐的心願,她最希望的是回家拍攝一家五口的全家福,「我自己嘅性格係感性啲,我真係好想一齊再喺呢度⋯⋯再一齊囉,影一張都好」。

社工指只可做後備名額

她曾透過社工向政府查詢可否放寬四人限制,獲得回覆亦是只可做後備名額,「冇諗過我哋嗰幢冇燒都要限人數,因為佢(政府)而家講到要立法又盛,嚟收返我哋業權,可能今次真係最後一次,或者下一次有得再執,會唔會又係限人數?我哋真係好想去影張全家福」。最後黃小姐只能留守在廣福社區會堂內,待家人上樓。

收購建議信有威迫之感

原本仍抱持著原址安置的願望,近日卻要面臨收購業權的決定。政府今更向宏福苑業主發出收購建議信,須要有四分三宏志閣業主在下月底前出售業權,否則將不被納入長遠居住方案。黃小姐批評做法有威迫之感,令居民難受,「呢度係我真金白銀買返嚟㗎嘛,媽媽以前好辛苦,到今時今日終於捱到,但因為一場大火就要被迫收返,我𠵱家唔係租住緊政府啲樓」。

「我哋呢班居民係冇做錯㗎嘛,有好多嘢我哋投訴過,但係投訴無門,冇處理過我哋,到𠵱家發生咗事嘅時候,一句話要立例就要收返晒所有嘅嘢⋯⋯何(永賢)司長(局長)成日話要『情、理、法』,情行先,但以我所知好似感受唔到,外間有啲朋友都會講話,點解𠵱家你哋好似俾人為難緊咁樣?」

「我哋已好慘,仲要好似強搶民地咁」

黃小姐認為,每一戶的聲音都值得被聽見,「我覺得有啲(居民)想留返喺度嘅話,都可以俾啲居民留返喺度,唔係話你想做乜就要立法,因為其實我哋已經係好慘,你仲要好似強搶民地咁樣,我就覺得唔合理囉,我相信政府應該唔會咁樣對我哋」。她指,業主大會正是收集居民意見的方法,「好多嘢都係開咗大會先再做另一樣嘢㗎嘛,到今時今日都唔開,係咪對我哋有啲唔係好公平呢?」

上樓後忙於執拾 「急到唔記得影」全家福

黃小姐最終獲准一家五口一同上樓。她指於社區會堂登記時,再次與家人懇求職員讓他們五人一同上樓,起初職員拒絕,稱只准四人,他們多番爭取約 10 分鐘、母親亦稱「真係一家五口想上去」後,最終有督察稱破例讓他們齊人上樓。惟上樓後,因忙於執拾、臨走前又多番被催促「夠鐘喇,要走喇」,最終「急到唔記得影」全家福,盼能第三次上樓時拍攝。

「返自己屋企都咁艱難」

對於多番爭取才能五人上樓,黃小姐無奈嘆「覺得返自己屋企都咁艱難囉,點解要求佢,我哋先可以齊人返到自己屋企」。她憶述在社區會堂完成登記後,到宏志閣樓下時母親被指無登記、要再出示身份證,一向少脾氣的母親亦忍不住動怒:「𠵱家做乜啫?審犯咩?我返自己屋企咋,我返自己屋企都唔得咩?有咩就拉我啦!」

黃小姐始終不解為何要限人數、「唔畀返自己屋企人先」,指上樓時社工和一名不知名的藍背心義工亦一同跟隨,該義工「係都要入嚟」,稱來幫手但只是「企喺度睇我哋執嘢」。他們最終只執拾到約六成物品,「我媽爸住咗 43 年咁多嘢點三個鐘執晒,真係夾埋 12 個鐘咩?」社工稱可嘗試申請第三次上樓、屆時再執拾,但又有消息稱未必有第三輪執拾,教她憤怒:「我哋仲未賣㗎,點解要咁多限制」。

廣福邨居民蔡女士今午到廣福社區會堂,幫宏志閣親戚上樓執拾和搬運,她也受「限人上樓」所困。她透露,親戚一家六口欲於單位拍全家福,惟當局限四人上樓,他們向社工申請額外名額遲遲未獲批准。她強調「呢座冇燒到,有𨋢有盛,唔使咁辛苦上去,點解唔可以畀我哋上去?影張相就走喇,唔捨得呢間屋㗎嘛,係咪?」她透露親戚趁屋苑大維修時裝修單位,更換傢俬,豈料裝修後三個月便發生宏福苑五級火警,「咩都係整定,影張相啫⋯⋯希望六個人齊齊整整紀念影返張相」。