「最難忘呀？冇屋啦，即係心掛掛，喺出面好似流離浪盪咁」。今日（26日）是宏福苑大火半年，70 歲的宏建閣居民蕭先生，有這感慨。全幢只得一個單位嚴重焚毀，但升降機不開，他要撐上 25 層樓，回到住了 40 多年的家，「試下上囉，必要時（體力不繼）咪行返轉頭」。
「你收購咗個業權，就算你剷平咗宏福苑，都唔能夠剷走 167 個街坊同埋一個消防員，仲有1900 幾戶無家可歸嘅罪責！」宏仁閣住戶謝先生說，「你應該要搵返個責任人出嚟去攞個賠償呀嘛」。大火半年，對於問責，他說：「由唔係獨立『調查』委員會嗰刻，我已經覺得唔關我事啦，咪當連續劇咁追下咪算囉」。這套「連續劇」，他諷刺說「精彩絕倫」。
宏福苑大火至今半年，居於宏仁閣中層的謝先生，今日上樓執拾。他直言，宏福苑火災半年來的事態發展，「如果你當佢係連續劇去睇，就非常滿意啦」。他形容：「精彩絕倫、劇力萬鈞、星光熠熠」。
市建局稱招標妥「由亂及治」 居民：由治及亂呀？
為何有這感受？謝先生以市建局在聽證會的作供為例，局方稱「招標妥」是「由亂及治」的產物，「大佬，無招標妥嗰陣都未燒七棟喎，你有招標妥都燒咗七棟？佢係咪調轉咗兩個字呀？係咪應該招標妥係由治及亂呀？」
翻查資料，市建局樓宇復修部總監王思敬在聽證會作供時稱，希望加強版招標妥可撥亂反正，他當時說：「我哋真係做到由亂到治，希望加強版做到由治及興，希望做到撥亂反正」。
「梗係要消防員啦！唔通要輔導員咩」
謝先生又批評，999 報案中心未能及時派員救助災民。聽證會上披露的錄音顯示，報案中心人員，反問多次求助者「是否需要消防員」？謝先生說：「以為睇緊周星馳嗰啲戲，唔使問呀嘛？梗係要消防員啦！唔通要輔導員咩？你會唔會教啲有用嘅嘢畀佢（求助者）呀？叫佢裝定幾桶水，濕定兩條毛巾掩住口鼻烏低身，你教啲有用嘅嘢呀嘛！」他感慨說，該街坊最終離世，「咁仲唔劇力萬鈞呀？」
非獨立「調查」委員會 「冇乜理喇」
至於火災追究責任方面，謝生坦言「有乜理喇……」，他說：「由有人選擇咗舉行『獨立委員會』而唔係獨立『調查』委員會嗰刻，我已經覺得唔關我事啦，咪當連續劇咁追下咪算囉」。
「就算剷平咗宏福苑，都唔能夠剷走罪責」
面對現時宏福苑居民或需出售業權，謝先生稱「你收咗個業權，就算係剷平咗宏福苑，都唔能夠剷走 167 個街坊同埋一個消防員，仲有1900幾戶無家可歸嘅罪責」。謝又以車禍比喻現時情況，「我架車被人非法撞咗，想要返架車就係咁簡單，咪保險公司賠囉……而家公證行都未睇過就話你架車要劏喎，賠嗰舊錢又唔夠買過架車喎」，批評「咁你應該要搵返個責任人出嚟去攞個賠償呀嘛」。
70 歲長者 試撐 25 層樓梯
居於宏建25樓、今年 70 歲的蕭生今早首次上樓，老人家沒太多鍛鍊「就算畀我哋操練，都操練唔到啲乜嘢㗎啦，六、七十歲人，得就得，唔得就算啦」。眼部做過手術的他，上月也沒有上樓，今次則打算「試下上囉，必要時（體力不繼）咪行返轉頭」。火災至今半年，謝生形容，自己半年來有想念自己的家，而近半年的生活是「流離浪盪」，失去家園「心掛掛」，現時租樓暫住「𠵱家好啲喇」。
談起買樓，蕭生感慨「我哋幾廿歲都唔做按揭㗎啦，睇下到時呢度（大埔區樓宇）貴唔貴啦，如果貴都無得選擇」。
六年級 Jimmy 撐上 24 樓
居於宏昌閣 24 樓的簡先生，與小學六年級的兒子 Jimmy 上樓。宏昌單位是簡生母親的居所，簡指兒子在大埔浸信會公立學校就讀，「成間學校都要分開兩間學校（運作），但學校嘅支援其實係好好嘅」。
簡生與哥哥及妹妹亦在宏福苑長大，感到不捨「但都無辦法喇」。兒子放學後常到嫲嫲家，「佢有好多回憶喺宏福苑」。首次上樓時因人數限制，Jimmy未能上樓，「佢叫咗我好耐，好想上去，今次我阿哥就讓咗個quota畀佢上去」。
Jimmy 指今次上樓「想攞返啲回憶同埋啲簿……照片呀嗰啲囉」，對上樓亦抱有期待，不過要步上24樓的單位，「我覺得可能都幾辛苦」，但對自己體能有信心，「每日返學都行好多樓梯」。
相關報道
宏福苑火災半年｜丈夫、歲半女兒欣欣殞命後 她以家人之名走下去
宏福苑火災半年｜驚險半小時 救子衝出火海 難逃內疚 寫道歉信、港人加油助走出陰霾
