今日（17日）是宏志閣居民最後一日回家，早上雨著雨，居民在雨中等候上樓執拾。有居民帶了蛋糕上樓，為家人慶祝生日。居民冼小姐，五日內獲安排再次上樓，她希望政府再聽居民意願，召開業主大會，及派官員到場協助「幫一幫合安計一計個補償價、收購價」，讓業主可在大會中直接投票，決定是否出售業權，「唔使又要等到6.30、8.31，嘥晒啲人力物力，留返啲公帑做啲實際嘅嘢」。
帶蛋糕回家慶祝父親生日
宏志閣住戶李小姐與家人上樓執拾，在他們準備的行李箱上，放置了一個生日蛋糕，原來今天將近父親生日，一家人打算上樓慶生，「因為屋企始終係我哋嘅地方，我哋都希望喺上面爭取多啲時間去做我哋想做嘅嘢，而唔係畀人去⋯⋯你知啦，佢哋（政府）嘅諗法係點樣，我哋都唔方便講咁多啦，一（陣）間又唔知會有啲咩行動出現咗，所以我哋確保自己『想做就去做』」。
對於收購業權，李認為，目前未有足夠資料讓居民作決定，「呢度始終係我哋嘅地方，𠵱家無任何嘅方案畀到我哋嘅時候，無任何條例嘅時候，我哋根本就『硬食』㗎咋」。
李小姐一家只將標語貼在家中，而不貼在窗外展示是，源於有一定擔憂。
李小姐上樓後，向記者展示一家人在單位內為父親慶生的合照，他們在單位牆身貼上多隻大字：宏福苑係我哋屋企。她與家人齊齊指著標語合照，「好多人都鍾意咁樣指住（標語）㗎嘛，指住係咪真係做到嘢呢？」
標語不貼窗外 因有一定擔憂
她坦言，只將標語貼在家中，而不貼在窗外展示是，源於有一定擔憂，「擔憂上面嘅嘢都真係唔方便講，所以我哋屋企入面嘅嘢，我哋仲可以話到事嘅時候，我哋會選擇喺屋企入面表達下我哋嘅感覺」。
「唔能夠用 Happy 去形容」
李小姐今次上樓的主要任務，是為父親慶生，雖然一家人完成心願，但她形容感受非常複雜，「我哋全部人都抱住一個好困難嘅心情去慶祝，唔能夠話快樂，啲人話 Happy Birthday（生日快樂），唔能夠用 Happy 去形容⋯⋯都唔識形容，好難，感覺呢啲嘢，其實你問呢件事入面嘅人，佢哋都唔能夠答到你係開心，我哋全部都係唔幸運嘅一群」。
回到家中，李小姐一家圍著飯桌，吃著蛋糕、拍拍照，就如以往的日常。唯一不同的，是家人們會一同懷緬過去，特意打開窗欣賞單位的無敵大海景，並拍下美景回味，「我哋前面冇遮冇擋，係完全望正回歸塔，一個好靚嘅風景、好靚嘅地方」。
「會諗起喺屋企入面好開心嘅過程，又有養寵物，然後我哋人生入面經歷過好多唔同階段，家姐結婚、到我結婚，有好多重要時刻都係喺入面發生」。
受火災影響，毗鄰宏福苑的大埔浸信會公立學校，將遷入區內前中華基督教會基正小學的校舍。身為校友的李小姐，特地執拾自己就讀的小學校服，「因為我哋真係喺度長大，呢套校服已經係經典嚟，係古蹟嚟，因為佢已經轉咗名，又要搬走嘅時候，其實對於我哋喺呢度成長嘅人係一種遺憾」。
李小姐感謝偶像在災後創作短曲《將過去》，為居民送上一抹溫暖。
希望原址安置
她指，宏志單位完整未被波及，希望可以原址安置，「政府又話要用10億去收購我哋，咁但用10億收購我哋嘅時候，或者修葺嘅金錢係3,000萬，點解唔用啲善款去做呢件事，等我哋可以入返去住呢？」
李小姐是歌手林家謙粉絲，今天特意穿上林家謙《喃嘸師感官漫遊》T 恤上樓，「我都有同佢（林家謙）講，今日會着住佢件衫上嚟再戰一次，因為上次都係因為佢件衫，幫家姐執咗好多嘢，今次專登着返呢件衫，好似有佢嘅陪伴咁樣」。
李小姐是歌手林家謙粉絲，今天特意穿上林家謙《喃嘸師感官漫遊》T 恤上樓。
感謝偶像林家謙創作短曲《將過去》送暖
她感謝偶像在災後創作短曲《將過去》，為居民送上一抹溫暖，亦留待街坊細心咀嚼歌詞：
「無從振作 在問天可靠誰／如常拼搏 熱淚拭乾 心卻很碎／如何振作 就別急於面對／無論是多少片刻／絕望 也將會是過去」
希望召開業主大會
她續指，業主大會是出售業權的先決，「一定係要公開、透明咁去畀我哋每一個人去知道發生緊咩事，如果咩都唔講、咩都話宣佈咗嘅時候，咁係咪真係全部都知發生緊咩事呢？我覺得唔係」。
她說： 「如果佢真係尊重，或者有情有義嘅時候，以情行先嘅時候，其實係應該由業主大會俾我哋一齊參與，去知道緊發生咩事」。
有居民獲安排五日內再次上樓
周三（13日）曾上樓的冼小姐，透過社工申請再次回家，獲安排今天可再次上樓，「因為媽咪都有啲嫁妝、爸爸啲遺物呀，因為之前都執唔晒，政府好好呀！有聽我哋民意啦！但政府硬係有少少嘢未聽到，梗係開業主大會啦！」
宏福苑法團前委員江祥發被捕，會否成為召開業主大會的阻力？冼小姐說：「其實我哋居民都有我哋一定嘅疑問，我都諗到成四五個疑問喇，啲業主都係希望合安開一個業主大會，解答返我哋嘅疑問，我哋先可以做賣定唔賣（決定）」。
冼表明，自己絕對不會出售業權，但仍有不少疑問冀在大會中了解，例如維修費 3000 萬元的項目範圍、火險金額能否覆蓋維修費、善款去向等等，一律希望在大會中提出。
想知管理費價錢
她提到，外間屢指單棟樓的管理費高昂，「以我所知，嗰啲有泳池嘅嗰啲都係五蚊呎大約，咁當我哋除半，可能1000蚊左右？畀我哋知道個數，咁我哋先知去唔去㗎嘛，成日話好貴，又要搵啲供應商去幫你哋做個維修保養，我哋都想知道大約個價錢，有個心理準備，如果我哋 confirm（確保）咗呢個價錢我哋畀到嘅，咁我哋梗係留啦吓嘛？」
建議官員出席業主大會協助
冼指，政府常被指對宏福苑原址虎視眈眈，「我相信政府唔係嘅！但政府可以喺業主大會澄清返，我哋政府唔係想要你哋笪地，想幫我哋嘅！但我都知合安好忙㗎嘛，我都建議有啲官員，可能發展局，可唔可以出席埋呢個業主會，幫一幫合安計一計個補償價、收購價」。在得知所有資料後，所有業主可以在大會中直接投票，決定是否出售業權，「唔使又要等到6.30，嘥晒啲人力物力，留返啲公帑做啲實際嘅嘢」。
對於合安曾解釋，宏福苑現行屋契規定，任何一座物業的公用地方維修費用，需要整體屋苑「不可分割業權份數」來分攤，「以我認知，『不可分割』嘅意思係中國同香港咁，咁如果你講得『不可分割』，就即係應該係重建啦？我都唔係好明，所以希望合安可以搵啲高官落嚟解答返我哋嘅疑問」。
