宏仁閣、宏新閣、宏泰閣居民今日（22日）再回家。多位災民早上再到宏福苑，包括曾在獨立委員會聽證會作供的宏泰閣居民冼善卿、葉家駒。葉家駒希望今次上樓，能尋回亡妻葉白瑞蓮的婚戒。冼婆婆難忘宏福苑，難忘白鷺早覓食、晚歸巢等一切，重申：「我要開業主大會、我要返嚟宏福苑、我要返屋企」的心聲。宏新閣中層住戶 Dorz ，早上跟嫲嫲來到宏福苑，準備再上樓。
Dorz 跟嫲嫲再到宏福苑
宏福苑居民一連九日第二輪上樓，居於宏新閣Dorz 今（22日）晨與 87 歲嫲嫲回家。嫲嫲早前曾入院，因此未在首輪上樓，今日為她大火後首次回家。她坦言有些緊張，近期有多行路和行樓梯練腳骨力，前一晚輾轉至凌晨未入睡，但來到宏福苑前心情平靜，開心能夠回到住逾廿年的住所，「（準備）好㗎喇！一定可以上」。
執拾後打算彈琴
有信仰的她表示，今次或是最後一次回家，打算在離開前最後一次彈琴奏《耶和華是愛》寄意。Dorz 緊牽着嫲嫲的手，他表示心情難以形容，「因為都唔想係最後一次，好不情願地返嚟一次，但唔知幾時可以再返到嚟」。Dorz 表示，今次主要陪嫲嫲整理房間。嫲嫲亦豁達表示，假如部份物件損毀未能取回都無所謂，「都燒咗啦，你可以點呀？我一路覺得上帝恩典夠我使用」。對上一次回家，嫲嫲因體力問題未有上樓， Dorz 回家取回爺爺生前行醫的中醫牌匾等物品。
葉家駒再上宏泰閣
「唔知點解我噚晚瞓得唔好，個情況都一早了解咗，可能希望今次可以真係搵返啲嘢囉，好多嘢上次都搵唔到。」妻子葉白瑞蓮在大火中捨身救人的宏泰閣居民葉家駒，今日（22 日）再次與兒子和兒媳回家。
如常傳訊息給亡妻
他形容，上次上樓後，整間屋如「打完仗咁」，「基本上所以可以燒到嘅都燒晒」，不會燒到變灰的物品大部分尋回，包括太太的一粒水晶、由葉母傳給太太的玉珮，以及自己已經燒熔的結婚戒指。但太太的結婚戒指仍未找到，「希望今次可以搵埋佢嗰隻」。他今早也有傳訊息予太太：「都係嗰句囉，保佑我搵得返啲嘢囉。」
希望播放太太喜愛的古箏樂曲
雖然已上過一次樓，但這次心情好像較為緊張，「我都唔知點解」。他未有再攜鮮花上樓：「上次已經帶咗啦，相信佢應該已經好完整咁上咗彩虹橋」。三小時的時光，他亦希望播放太太最喜歡的電話鈴聲，古箏樂曲《高山流水》。
會否擔心是最後一次？「呢個唔到我擔心嘅，等佢安排囉，我哋會繼續爭取」，「我屋企嚟㗎嘛，無論我間屋變成點，嗰個都係我屋企嚟㗎」。
冼婆婆堅持要開業主會要回家
難忘白鷺早覓食晚歸巢
居於宏泰閣、靠開啟抽氣扇逃出生天的冼婆婆今日上樓執拾，上樓前受訪指心情是「死到臨頭就要面對，睇將來囉，如果政府用熱心對我哋，香港人可能唔會慘嘅」。她亦強調不會視今次上樓為最後一次，「每次搭車經過，都望住我曾經好鍾意嘅家園」。冼婆派說得雙眼通紅，難忘「一早一晚白鷺出去覓食，晚黑歸巢，嗰瞬間嘅景緻，你哋可能未必有機會見過，但係我差不多日日都見，你叫我點捨得？」
「我要開業主大會、我要返屋企」
至於曾發起居民聯署的宏福苑前法團成員江祥發，被指涉嫌串謀詐騙及使黑錢被捕後，指以後不會再接受任何訪問，冼婆婆稱「我無江生咁有 power ，我敢喺你哋面前講呢啲說話，已經覺得自己好叻」，「既然江生要避嫌，再唔出嚟喇，我哋都知道乜嘢事嘅，我哋唔會怪佢，但都喺你哋面前講一句，『我要開業主大會、我要返嚟宏福苑、我要返屋企』」。
無語問蒼天
面對重置的抉擇，她說：「我自己意向就係樓換樓」，「我一個人養大四個細蚊仔，都唔慌有咩積蓄㗎喇……仲有幾多多餘嘅錢可以買呢 380 萬買唔到嘅樓呢？當我哋有一百幾廿萬儲到，擺埋落去，我哋以後食乜呢？真係『無語問蒼天』呀我哋！」
半年仍未適應暫居地
至於內心希望的樓換樓，能否換回大埔的新居所，冼婆婆就指「睇我自己有無好運氣，大埔我住咗40幾年」，現時在女兒上水家居住，「我都覺得好多嘢要問」，她亦有申請位於將軍澳的過渡性房屋，「去到幾乎連巴士站喺邊都唔知，我淨係識一個地鐵站，𠵱家都已經半年，都未可以適應，如果我去第二區，我又點適應呢？」冼又慨嘆「不過呢啲嘢可能無人關注」。
訪問期間，冼婆婆遇見昔日街坊，「哎呀呢個女仲喺度！我真係好擔心佢！」街坊回應指自己在火警前半小時外出離家避過一劫，冼隨即向街坊高呼「見返你就好喇！好好好！」
年逾八旬的宏泰閣居民冼善卿，大火當日，開了屋內的抽氣扇、抽油煙機，抽走濃煙保命，被困至當日晚上約九時，由消防入屋救出。她在聽證會作供時憶述，消防員在烈火救走她的同時，在 12 樓不忘抬走遺體，免死者再受蹂躪。冼婆婆在 5 月 1 日回家時，因沒有升降機，體力不夠，未能上樓。
曾說想彈琴跟家人共渡 胡小姐：今次一定係要衝衝衝
居於宏仁中層的胡小姐，今日上樓前與家人一同合照，因父親身體未能應付上樓，故在上樓前合照留念。胡指今日天氣好，「我都好開心，好想望吓屋企個景」，合十表達感謝。
胡指今日特意戴上「Time to go home」襟章在身上，「今日真係time to go home，上去再懷緬再執拾」。她指首次回家時未有執拾太多物品，故「今次一定係要衝衝衝，盡量將所有屋企嘅嘢執晒落嚟，都希望再有機會再上去，慢慢欣賞個屋企，做乜都好」。
對於未來打算、是否賣出宏福苑業權等，胡指「唉，大家可以點呢？一個計劃就係賣業權、賣業權、賣業權，希望可以有多一個 option 就係原址重建」。下一步會細心研究文件內容，「睇清楚佢寫乜嘢先」。
居於宏新閣19樓陳小姐指，「好多居民本身都有反映過開業主大會呢樣嘢，我都希望政府真係正視返，只係個好少嘅要求」。
陳續指，家中長者「老人家住咗幾廿年，自從火災之後佢創傷都太大，𠵱家成日好多嘢都唔記得，情況有嚴重落去」，她認為，難以要求此等長者到他區適應新生活。「政府咁唔想我哋 6 月 30 號之前開大會，究竟係幫緊我哋定係想逼我去死路呢？好想知道究竟佢用咩方法嚟幫我哋」。
對於政府回購方案，陳指大埔居屋只有頌雅路西選擇，「個環境係完全唔同，同埋有斜坡，對於老人家嚟講出入唔方便，係完全唔合理」。而頌雅路西地盤被不少墳墓包圍，「景觀地點都好唔同」，希望政府給予更多選擇。至於會否出售業權，陳就指「未諗，諗咗執嘢先」。
宏福苑回家｜居民指小朋友對未能回家情緒受影響 「社會制度咁，仲有發展嘅機會？」
宏福苑回家｜兄葬火海遺體不完整 日記被燒碎
宏福苑回家｜亡妻金鈪不翼而飛 宏志居民落淚錄口供：好似對唔住太太
