居於宏盛閣 9 樓的三母子，今早上樓執拾，李太慨嘆三小時時間嚴重不足，「有乜理由三個鐘可以攞到嘢？三個鐘仲要思考，返到去睇到自己個屋企，已經變晒，個感情係點樣吖你話？43 年喇」。丈夫居於宏福苑43年，她結婚後搬入，亦已居於宏福苑30多年。他們不滿安置問題被當人球，火災後無人問責，居民想開業主大會，近半年來只換來被漠視。
李指單位「養大三個仔，好好㗎」，但曾被焚燒，「拎咗我老豆啲缸瓦，佢畀我哋啲缸瓦，我哋就孭返走」。她批評早在宏志閣開放居民上樓時，另外數幢結構未被大火嚴重影響的樓宇亦應安排居民上樓，「半年喇……差唔多半年喇」。
安置安排：將我哋（當）人球
對於宏福苑居民安置安排，她指「𠵱家就係要問政府囉！𠵱家將我哋（當）人球扔嚟扔去，而家最緊要我要有居所」。現時居於善樓的她形容火災後的善後工作疲倦，「呢度跑下，嗰度又跑下」，「政府你為下我哋班市民著想下，有啲人燒咗、毀咗成個家園，係咪更加慘？我都唔識點講」，希望政府盡快安排受災居民上樓，「𠵱家好似流浪咁，無居所，而家將啲嘢都係擺喺迷你倉」。
至於宏福苑居民賣出業權問題，李太指「咪就係要開會囉！而家佢單方面講，我哋居民好多都唔贊成㗎！而家成日避開唔開會！」希望政府了解居民想法及需要，「而家你話收咗我業權，咁所有火險係咪佢擁有？咁火險應該分返比我哋業主先，之後先攞我哋業權，如果唔係我哋咪零囉，無嘢囉！」
「唔理想就收例，又無人問責」
對於政府指若收回業權不足，不排除立例處理，李太兒子 Kyle 受訪時形容「我無辦法有咩感受呀！司長都講咗咯，咁佢話點咪點囉，我哋講又點？講完都無人聽」，批評「（政府）一句話唔理想，唔理想就收例，又無人問責，我喺寫字樓倒瀉水，都會問邊個倒啦係咪呀？」批評火災無人承擔責任，「單嘢都未完，而家又話修例呀盛，搵咗人出嚟孭咗（責任）先啦！」他形容是「愈講愈勞氣」，「想開業主大會，講咗半年，都無」，憤然稱「見到嘅就係漠視」。
