宏道閣居民、年屆七旬的黃先生，今早帶同背囊，手持著一條大泡泡紙上樓。由於家住中層，他笑言想取回洗衣機，但似乎難以成事，「如開返個電梯畀我，咪中咗六合彩囉！」他對收購業權方案感失望，但認為「官字兩個口」，勢在必行， 「壓到大家都冇氣抖嗰時咪反囉」。
談到政府回購方案，他表示「失望、無嘢講」，「佢一嘢壓落嚟，隻手指，你一定要賣個業權畀佢，你唔賣都唔得㗎。佢係政府你唔係。我哋五千年文化就係官字兩個口，我哋中國永遠講呢個字，官字兩個口，咪由得佢壓囉，壓到大家都冇氣抖嗰時咪反囉，官迫民反四個字係中國發明」。黃先生又表示，不會發洩不滿，「冇得發洩㗎，呢啲係中國人嘅文化，壓咗五千年都係咁壓㗎啦」。
黃先生居住宏福苑 40 多年，最不捨的是甚麼？他回答得毫不猶豫，「街坊！全部都朝見口晚見面，落嚟街市買餸又撞到佢，去斬料又撞到，𠵱家個個都各散東西囉。做人係咁㗎啦，冇得話捨唔捨得」。他指，這塊地屬超級豪宅地，數年後或「又賣返百幾億，玩吓手收埋廣福邨」。翻查資料，財政司副司長黃偉綸曾表示，絕對不會出售收回的用地。
黃目前住在啟德的過渡性房屋，雖然交通方便，但在家中不能煮食，「試過炒碟菜都搞到響火警鐘」，現時需餐餐吃外賣，變相令開支增加。對於未來安置、業主大會等，他沒有心存寄望，「你睇我頭髪都咁白啦，唔使諗啦，諗完啦，唔係我哋老人家嘅事喇，係後生嘅事，你老人家有本事去供咩？」，「總之有一日過一日啦」。
