「宏福是我家、問責何在、愛宏福」一位宏福苑的居民，將這手寫標語貼在窗外。宏福苑大火半年已過，今日（27日）居民繼續第二輪回家。上樓前，宏道閣居民李太質問：「點解到𠵱家，都冇一個官員可以行出嚟道歉，剩係喺個聽證會度搬龍門？」曾在聽證會作供的居民梁浩軒說：「你唔好話對唔住，喺聽證會聽得最多⋯⋯係『唔理想』，咁點樣先理想？」
梁浩軒：盡量取走最多物品
曾出席聽證會的宏盛閣居民梁浩軒，今早與家人再次上樓執拾。梁指，上次上樓時，發現單位稍有染灰，「好多嘢都要再洗、再抹過，但都有好多嘢未拎」。他希望取回自己珍藏的漫畫、書籍、電腦配件，亦會嘗試搬走大型傢俬，已帶備工具準備嘗試拆開梳化。
梁在上次上樓前亦有受訪，他當時提到，想在家拍下風景道別。今天他預計或是最後一次上樓，希望盡量取走最多物品，因此時間趕急，「始終上一次返到去都係冇時間，一入到去就開始開工」。
他早上受訪時說，暫時心情平靜，「可能去到拎走晒啲嘢，啲情緒先會出嚟⋯⋯始終𠵱家都冇講話有第三次（上樓）嘅安排，始終喺度住咗 20 幾年，冇理由一句道別都唔講」。
不會貼標語 「都唔聽嘅⋯可能不予接納」
近日有不少街坊在單位內或窗戶上貼標語，作為與單位道別的方式，梁指自己未有準備，亦得知早前有單位標語被撕下，「有人喺（單位）嘅時候就唔會入去搜嘅，可能佢（警員）好心啦！係我哋走咗之後先入去搣咗佢，唔知啦係咪先！」
他坦言，居民一直以不同渠道表達意見，「但係佢（政府）都唔聽嘅！呀，Sorry 收返，可能佢聽到，但可能經過深思熟慮嘅考慮之後，就不予接納」，因此不會貼標語表達訴求。
「聽得最多係『唔理想』」
大火半年，梁的訴求又是甚麼？他以泊車作比喻，「例如你泊車唔小心揩花咗人哋架車，你都會落車睇下揩花咗幾多，同個車主講返句『唔好意思』，人哋未必想要你賠錢，人哋都係想你講返句『唔好意思，我無心嘅』。但係你睇返今次呢件事，你唔好話對唔住，喺聽證會聽得最多都唔係『對唔住、我哋都盡咗力』，係乜嘢呀？係『唔理想』，咁點樣先理想？啲嘢照樣咁樣做，但我哋冇燒到，咁樣係咪叫理想？」
梁認為，事件發生至今，政府應已可交代火災成因，「𠵱家都係 within 聽證會嘅範疇去做嘅揣測，但會唔會可以有報告，講明係七成、九成係直接導致呢個火災嘅原因，始終你唔講我哋唔知㗎嘛，唔好淨係講『我做咗㗎喇』」。
他續指，政府需與街坊來場真正溝通，「溝通係一個雙向嘅過程，好似你同你屋企人討論吓今晚去邊度食飯，都會有啲意見提出嚟，而唔係『今晚我哋就去食呢度㗎啦！你哋淨係聽我講嘅啫！』嗰啲唔係叫討論，叫命令、單純嘅通知」。
「我哋可以表達到嘅途徑好有限」
「放返喺呢件事上面，我哋每一個業戶都係呢件事嘅持份者，其實大家都係想件事好，都係想好好咁樣解決咗佢，但係我哋可以表達到嘅途徑好有限、好唔直接。半年嚟講，我哋感覺到嘅就係單向嘅訊息溝通，佢哋諗好咗啲嘢就通知我哋，我哋講就有我哋講，但佢哋有冇聽，我就唔係好感覺到」。
梁認為，業主大會正是其中一個面對面討論的方法，加上如出售業權後，街坊不會繼續有業主身份，屆時舉辦業主大會或會更加困難。
打算張貼「召開業主大會」訴求
宏道閣黎先生今日再次返回單位執拾，大火半年，他說仍然想念這個家，「噚晚都係會瞓唔著，都係會擔心，成日諗住返嚟會執啲乜嘢，有啲咩執漏咗要再執。」
大火發生三個月後，已有居民提出召開業主大會，惟早前接替法團工作的合安，已向土地審裁署申請押後；民青局局長麥美娟則指，出售業權不應與業主大會掛鉤。
仍未決定出售業權的黎先生，今日上樓除了執拾，也打算在單位張貼「召開業主大會」的訴求。他認為，業主大會，一來要看其他街坊決定，二來是政府沒正面接觸過街坊，只依靠解說員、一戶一社工單方面發放資訊，「其實就唔係一個咁正路嘅方法」，業主大會是合安收集居民意向、再向政府反映的渠道。
指政府急於收購業權「本末倒置」
早前有街坊認為，特設銷售計劃如同「開盲盒」，黎先生也贊同，「理論上，應該係畀我哋揀咗，買咗我哋自己想要嘅，跟住先賣個業權」。他形容，政府急於收購業權是「本末倒置」。
想召開業主大會，和叫官員道歉的，還有宏道閣居民李太，她說：「成半年啦，一個咁大嘅地方，成半年，大家冇咗屋企，咁原來唔需要一個高級嘅官員出嚟道歉，或者負責任囉」。她說：「點解到𠵱家，都冇一個官員可以行出嚟道歉，剩係喺個聽證會度搬龍門」。
大火發生半年，宏道閣住戶李太形容，這半年生活沒有停下來的空間，「好頻撲，大家都好攰，第一次上樓執完啲嘢要搵倉安置，執完晒，而家又再上樓，攞返我哋啲嘢再搵時間執。我哋都要返工，都有小朋友要照顧，呢段時間太頻撲啦，好辛苦呀」。
「原來唔需要一個高級嘅官員出嚟道歉」
為生活奔波的同時，她無時無刻都會想起意外發生後續發理的不公，「一個咁大嘅地方，成半年大家冇咗屋企，原來唔需要一個高級嘅官員出嚟道歉，或者負責任」。
她以近日發生的山西礦難為例，事後山西長治市市長兼市委副書記陳向陽在記者會上向市民鞠躬道歉，「香港作為一個發展咁全面嘅地區，點解到而家都冇一個官員可以行出嚟道歉，或者負責？淨係喺個聽證會度『搬龍門』」。
質疑為何不能在自己物業貼標語
李太要求盡快召開業主大會，「溝通係雙方㗎嘛，唔係隔住一戶一社工，或者搵解說員同我哋講，應該係雙方，成班業主坐低一齊傾，你俾啲方案我哋，係咪真係可以滿足到我哋每個居民嘅需要呢？係咪真係聽到我哋想要嘅聲音呢？」她指，目前仍有大量需待政府交代的事項，例如保險賠償額，「點解唔出嚟面對面同我哋傾啫？大家面對面，咁樣先係溝通囉！」
近日有不少街坊在窗戶貼標語，希望自己聲音被聽見，惟有人指被警員警告，甚至撕下標語，「咁都唔可以，其實都係貼張紙啫，或者幾句說話，係大家對宏福苑嘅情感，咁點解都唔可以呢？個業權仲喺我哋度，個地方仲係我哋㗎嘛？」
李太指，自己單位是完好無缺，「其實小小嘅維修，根本係完全住得返」，希望可原址安置，幸好家人在意外中並無大礙，今次上樓希望取回小朋友玩具。
