妻子葉白瑞蓮在大火中捨身救人的宏泰閣居民葉家駒，事隔三星期，今日（22 日）再次回家。上次上樓只找回自己已燒熔的婚戒，今次上樓，他最希望尋回太太那隻，但最終經三小時的努力仍未能找到，「今次基本上係搵唔到想搵嘅嘢，好失望⋯但都冇辦法。」
灰燼之中，猶幸尋回太太常戴的手錶，雖只剩錶殻，但仍帶來少許安慰，「算係其中一個可以同佢有個聯繫嘅嘢。」臨行前，他擺放了一支電子蠟燭在太太罹難的位置，「我相信佢已經離開咗，已經去咗佢應該去嘅地方。」
葉生仍盼再次上樓，「無論我間屋變成點，嗰個都係我屋企嚟」。面對收購業權「死線」逼近，他坦言沒考慮過賣業權、亦批當局「不停咁壓迫緊我哋」：「我嘅屋企、我嘅物業，從來都唔係由市場價決定佢嘅價值，我自己有我自己嘅價值。」
向太太傳訊息：保佑我搵得返啲嘢
葉家駒今早與兩個兒子及兒媳，再次回到宏泰閣 17 樓的家收拾。雖已上過樓一次、亦知單位燒毀情況，「基本上可以燒到嘅嘢都燒晒，打完仗咁」，但今次心情較為緊張：「唔知點解，我琴晚瞓得唔好⋯可能希望今次可以真係搵返啲嘢囉，好多嘢上次都搵唔到。」
上次找回由母親和外母留給太太的玉珮、金鏈、戒指，還有自己已燒熔的結婚戒指，但太太那隻未尋獲，「希望今次可以搵埋佢嗰隻」。他今早也有如常傳訊息予太太：「都係嗰句囉，保佑我搵得返啲嘢囉。」
上次上樓，葉生在下樓整理後找到自己的結婚戒指，已經燒熔。（受訪者提供）
上次回家，葉生帶同與家人親手挑選的花束上樓悼念。這次未再攜鮮花上樓，因他相信太太「應該已經好完整咁上咗彩虹橋」。他亦望在屋內播放太太最喜歡的古箏樂曲《高山流水》電話鈴聲。
未尋回婚戒：失望㗎，但都冇辦法
下午 1 時許，葉先生手持紅白藍袋，乘穿梭巴士返回大埔站。家中因燒毀嚴重，只限兩人同時進入，兩名兒子怕他辛苦，在葉生入屋搜索一會後，便着他在門外等候，由二人主力尋找。
上樓前盼找回太太婚戒，但三小時內，與兩名兒子在原有擺放戒指的位置，以鏟挖掘、又以燒烤網作篩，清空每寸灰燼，仍不見戒指蹤影，「搵唔返⋯今次基本上係搵唔到想搵嘅嘢，好失望」。兩個兒子本來亦有期望，覺得會找到母親的戒指，最終也失望而回，「搵唔到，冇辦法」。
「都冇乜嘢感受㗎喇，好似喺度尋寶囉，一面掘、一面挖，睇吓會唔會挖到啲我想要嘅嘢囉⋯其實好多嘢都已經認唔到究竟係咩嚟。」
找回送給太太戴的手錶
期望落空，但所幸最終找回一隻約 8 至 9 年前買給太太、她生前經常戴的手錶，「算係其中一個⋯可以同佢有個聯繫嘅嘢。（算係少少安慰？）算係啦，總好過咩都搵唔到囉。」這隻手錶燒剩外殻，他打算連同上次找到的物品，好好收藏。
上次回家，葉生將花束放在太太罹難的廁所位置，哽咽道：「白瑞蓮，老婆，走喇，唔好留係呢度喇，去你想去嘅地方啦。」這次回去，他看見那束花猶在，只是變成乾花一樣。臨別前，他放下電子蠟燭：「我諗佢應該已經唔喺嗰度㗎喇，我相信佢已經離開咗，已經去咗佢應該去嘅地方。」
葉生尋回太太常戴的手錶。（受訪者提供）
仍盼再上樓：可能真係憑弔呢個屋企
兩次上樓仍無法尋回太太婚戒，葉生仍盼再次上樓，但這次「我就未必諗住要搵嘢喇，我可能係真係憑弔我呢個屋企」。雖然如果有機會，他仍想嘗試找找：「只不過⋯抱嘅期望可能會冇咁高囉。」
那會否向社工申請？葉生覺得沒需要：「我唔認為佢會聽我哋講，然之後有第二次囉。其實佢一早盤算好，佢係有計劃㗎。所以其實有冇第三次，同我哋有冇同社工講，其實係一啲關係都冇。」
以往太太將婚戒珍而重之收起，只在很隆重的場合才戴上，如今成雙的婚戒只剩下一隻，葉生打算遲些修復自己的婚戒，「如果可以，我會攞嚟戴」。
無打算賣業權：我嘅屋企有自己嘅價值
上樓過後，居民還要面對 6 月 30 日及 8 月 31 日賣業權的「死線」。說到政府處理手法，葉生難掩不滿和憤怒。他坦言，「我係一路都冇諗過（賣業權）」。他認為，私人物業不應由少數服從多數來決定，「唔可能你講話有七成想賣，然之後你就去推呢啲方案，我覺得呢個係好荒謬嘅。我私人產業，其他人點可能決定我私人產業嗰個命運？當然我自己決定啦，我賣唔賣。」
「唔係我心目中價值，自然唔會賣」
對他來說，「我嘅屋企、我嘅物業，從來都唔係由市場價決定佢嘅價值，我自己有我自己嘅價值。你𠵱家所畀出嚟嘅所謂市場價，唔係我心目中嘅價值，咁我自然唔會賣啦。」
至於當局設定接受收購的限期，他覺得更加荒謬，「佢對住全香港人講，『你情我願』，你又 set 咗 8 月 31 日為死線，喺呢日之前一定要決定，咁何來你情我願呢？其實喺成個過程，你都係不停咁喺度壓迫緊我哋咋嘛，咁叫『你情我願』，我就覺得真係唔知咩叫『情』、咩叫『願』。」他亦質疑，獨立委員會的報告未出，卻要在報告發布前處理賣業權，「唔係應該先問責，後安置㗎咩？點解要掉返轉嚟做呢？我唔明白囉。」
批「巧取豪奪」
合安早前以需時核實業主身分等為由，向土地審裁處申請延遲召開業主大會。葉生指，已進入司法程序，不會評論，土地審裁處亦應有專業判斷。他說會等待土審的裁決：「甚至乎可能土審話畀我哋聽，佢判出嚟，可能拖 10 年 8 年，咁我哋都係跟佢司法程序去做㗎啫，我咪上訴囉，冇嘢㗎。」至於有否被合安要求核實簽名，「佢用呢個作為理由去申請延期吖嘛，佢點會搵我哋啫？佢搵我哋咪即係自己冚自己、自掌嘴巴？」
會否認為整個過程「不近人情」？葉生即說：「呢個唔係叫不近人情，呢個叫巧取豪奪、輸打贏要。係冇人情嘅，根本都冇人情。從開始到而家，我都唔覺得有關當局係有任何人情，『情理法』，sorry，我真係睇唔到。」
相關報道：
宏福苑回家｜葉家駒回家悼亡妻：白瑞蓮，老婆，走喇，唔好留係呢度喇
宏福苑火災｜救街坊罹難 200 人送別葉太 最後一面白布阻隔夫悲慟 望災民團結為亡者覓公義
宏福苑聽證．第五日｜哽咽憶亡妻 葉家駒斥部門逃避責任 雙親罹難 子：宏福苑只能示範一次
