宏盛閣1樓住戶關小姐，今午上樓執拾前遙望舊居，不忍落淚，「都擔心執唔切，始終住咗咁多年，但都冇辦法一定要搬扯喇」。她與家人準備約 70 個紅白藍膠袋，「見嘢就掃晒落袋，唔好諗」。
姑姐撐著拐杖堅持上樓
同行家人除了丈夫、兒子，還有患癌的父親，以及行動不便的七旬姑姐。姑姐撐著拐杖，仍然堅持上樓，「但因為佢身形比較龐大，加上做咗手術拖住隻腳，我哋行一層可能1分鐘，佢可能已經要5分鐘，我哋要 support 佢」。
維修「差一兩個月就成功」
無懼步履蹣跚堅持上樓，全因一家人對宏福苑有着深厚情意結。關小姐的家人 30多年前，從二手居屋市場購入宏盛閣單位，單位見證關小姐結婚、生兒育女，加上交通四通八達，因此希望可以原址重建，「我哋係頭一批鋪石仔，其實仲差一兩個月就成功（大維修），但點知無妄之災，搞到咁樣，就令到老人家退晒休，一下子就打回原形，好心傷」。
解說員催促「好似轟炸機咁」
不過，要落實原址重建的願望，半年過去仍然難以實現，「開業主大會，你又完全俾唔到我哋，咁其實呢樣嘢係咪真係咁難呢？定係你哋係想不了了之？其實我哋都係肉隨砧板上，個政府話要點樣我哋就要跟住去做」。她透露，近日不斷有解說員催促居民簽名出售業權，「好似轟炸機咁話畀你聽『要簽喇要簽喇』，需唔需要咁急呢 ？係咁 chur 我哋，真係有啲煩」。
「你換唔換得返個海景畀人？」
關認為，業主們本月中才收到政府信件通知方案，居民亦需時考慮，「我哋都要細想細思，老人家去邊度好。有啲人有海景嘅，你換唔換得返個海景畀人？換唔到吖嘛？呢啲位就係有啲糾結」。
「我哋係暫別，唔係永別」
災後半年，關小姐不時讀到鄰居們災難後的報道，仍然會默默流淚，「自己都會盡量迴避唔好睇，因為知道自己心情唔係太好嘅時候，我就ignore某啲嘢」。目前家人暫居元朗，尚算開始適應，但仍需返回大埔覆診，「其實個車程都好論盡，等於搭咗一程飛機去台灣，個零兩個鐘」。回家之路遙遙無期，她卻永存一個心聲，希望以筆寫在舊居牆上：「掛住間屋」，「我哋係暫別，唔係永別」。
