居民執拾時限只有三小時，宏福苑街坊各出奇謀，出動各樣工具縮短搜尋物品時間。有居民因單位嚴重燒毀，準備多塊燒烤網，方便在灰燼中使出淘金術「淘」出物品，亦有人準備園林用的大泥鏟。
宏道閣魏爸爸一定四口，以廿蚊購來燒烤網，準備上樓「淘」家當，只得三小時，他說：「我哋冇乜嘢執就唔趕，冇燒的就好趕」。自言樂天派的他，面對突如其來的橫禍，仍樂觀面對，「社工、精神科問我，完全滿分，冇事」。唯獨一件事，他最在意，望一望身邊的太太，他笑說：「佢一有事，我就唔樂觀」。
魏先生與太太和兩名兒子一同上樓，他們準備非常充足，除了魏太使用的拐杖，還有手套、龍角散、食水，甚至有剛剛購買的燒烤網，「垃圾鏟鏟唔到呀嘛，呢啲可以鏟起啲灰，咁如果有隻手錶喺度，咪唔會跌落去囉！一鏟，隻戒指喺返到，咁咪執到囉下話！」他們最希望尋回年輕時的舊照。
魏媽媽：「我覺得我上到去會喊」
魏先生準備充足，源於他們早已收到單位相片，知道單位損毀情況嚴重，但他仍能笑看人生，「我無嘢㗎！我樂觀嘅，樂天派，我乜事都冇，最唔樂天就係佢（魏太），如果佢一有事，我就唔樂觀」。魏太平日走路都需依靠拐杖，他笑指自己會當太太的「人肉拐杖」。排隊準備登記上樓時，魏先生體貼地拖著魏太，一起前行。
即使丈夫談笑風生，魏太始終對上樓心情緊張，「我覺得我上到去會喊，我𠵱家同你哋做訪問都已經想喊」。
魏氏兩口子是宏福苑初代業主，「我哋第一批入嚟，第二批未入伙嗰陣，警察防暴隊都喺呢度練習㗎！你話耐唔耐啊？」40 多年來，宏福苑對他們而言是烏托邦，「呢度好住呀，風景又好，交通又方便，想去邊度都得，但如果走咗去第二度住，你知啦，我呢啲老人家麻煩呀嘛」。
無可取代的情懷
魏生指，街坊街里結伴數十年，是一種無可取代的情懷，「（感情）梗係好啦！由啲仔細細個喺度玩，到讀幼稚園到大，到結婚，咁你話係咪好呀！去到新社區你想再識人好麻煩㗎，會封鎖自己未必同你傾偈㗎嘛！」
這片樂土延續到火災當日，他們收到電話通知才知道火燭，原本以為火勢會陸續受控，遂慢慢落樓，「點知一落到嚟就唔畀上樓，一路係咁燒，睇住佢燒過嚟，根本都冇人諗住佢會咁樣燒法，本身走嘅時候無諗住係走難，一落到嚟就變咗災民」，因此當天連身份證都沒有跟身便離家，「拎咗個人囉，拎咗佢（魏太）囉！」
魏生指，他們目前住在大埔三門仔，但始終最牽掛的仍是宏福苑，「唔係財物嘅問題，係無咗間屋，你諗下喺度住咁多年，好似一棵大榕樹畀『山竹』一陣風吹走咗咁，而家都一樣咋嘛，一把火燒咗成間屋無埋喇」。
望原址重建 「佢肯起我要呀」
他希望政府可以安排原址重建，「佢肯起我要呀！但佢唔肯起。（等十年都願意等？）我等！等唔到埋我個仔等咋嘛，十年你睇我咁後生實等到啦！」
上樓之後，魏生的家園已燒成灰燼，頹垣敗瓦中，他們拾起了一隻熏黑的 Chiikawa 公仔。臨行前，他們在牆身寫上「我愛宏福苑」，畫上心心寄意。
自備筲箕上樓執拾
宏昌閣頂層 31 樓住戶方先生的單位，同樣損毀嚴重，因此自備筲箕上樓執拾，成功從灰燼中尋回首飾、金器，包括母親送給太太的龍鳳鈪，「無筲箕都好難搵得返今次搵到嘅嘢，我係掘咗好耐先見得返個地板，有啲嘢我係掘到底先搵到」。
方指，早前曾收到大量單位相片，已做足心理準備，「都係覺得不幸，我哋好彩就係人無事」。不過，他提到單位內有發現煙頭，估計是由工人留低，「我唔意外囉，因為一定有工人上去做過工程，咁有工人就有煙頭㗎啦，我會覺得唔係幾好嘅，會覺得唔係好應該，尤其是好可能當初因為呢樣嘢而導致火警，但我唔意外囉」。
