宏福苑七座大廈居民，周一（20 日）起可分批上樓，除了執拾物品，亦是與家園道別。面對暫定一次三小時的執拾，有居民以最後一次的心態預備，每天與家人練習行樓梯，盼盡量爭取時間；有居民則親自設計和製作搬運工具「樓梯雪撬」，盼能減輕負擔。有練習行樓梯的居民，由走 10 層樓梯便支持不住，至可完成 25 層樓梯以上：「原來自己都做到嘅，我都希望帶出個訊息，話畀街坊聽唔好成日覺得自己唔得，其實自己慢慢練練吓，原來都可以嘅，唔好畀自己有遺憾。」
相關報道：
圖輯｜紅網圍封下回家
宏福苑回家．持續更新｜宏新閣居民重返單位 會否再上樓？ 居民：應該冇嘢攞，所以都冇幾多次
為了上樓，李先生一家三口約一星期前開始，每天一起練習行樓梯至少一次，由起初約十層樓、不戴口罩，逐步加碼至戴口罩上超過 20 層樓。
「話畀自己聽，你一定做到」
「得唔得？」、「唞順條氣先」。一個周末晚上，宏福苑居民李先生李太在過渡性房屋的後樓梯拾級而上，這已經是他們第八次練習，為的是要回那個樓高超過 20 層的家。以往的練習無戴口罩，今次首次戴上，走到約十層，李太已大口喘氣，需停下休息半分鐘再繼續，並以扶手支撐身體前行。走到第 14 和 20 層，李太再停下拉開口罩回氣，走在前方的李先生鼓勵：「離你個目標唔係好遠㗎咋！」，最終兩人以 9 分鐘完成今天 25 層樓的目標。
「真係到埗喇！」雖然「好攰」、「條氣好唔順」，但返家的念頭令李太堅持下去：「話畀自己聽一定要返到上去⋯你點辛苦都好，你一定要話畀自己聽，你一定做到，一定行到返你自己嗰層」，「自己都要爭氣啲啦，因為你之後仲有冇機會上，冇人知。」
因憂吸入有害化學物質和灰塵，李生李太打算上樓時戴口罩，並戴上口罩練習行樓梯。李先生亦預料，到時每人或需兩三支水解渴，故打算練習負重 12 至 18 罐汽水行樓梯。
宏建閣只一單位受損 相信居所狀況較完好
李先生李太與就讀初中的兒子，居於宏建閣高層約 10 年，宏建閣只有一個單位受嚴重損害，李家的單位料狀況較完好，可容四個人於 5 月上旬上樓執拾。要在三個小時內執拾家中重要物品、再好好道別，兩人坦言完全不夠。
憂「唞多半個鐘，就少咗半個鐘執嘢」
後樓梯環境侷促，李先生擔憂較少運動的太太，抵家後要較長時間回氣，他在得悉上樓資訊後，安排一家三口練習行樓梯：「唞多半個鐘，就少咗半個鐘頭執嘢⋯會唔會係做好晒所有準備上到去，盡量爭取到自己可以用到嘅時間呢？」「我得三個鐘，我真係要用最有效嗰三個鐘去執晒我想要嘅嘢」，李太說。
李太經過一個星期練習、閒時在家做 sit-up，體能已慢慢改善，能慢慢走完逾 20 層樓梯。她建議街坊可協調呼吸，慢慢行，可行更多樓層，亦可每五層停一停，待自己呼吸暢順。
一家三口的苦練 將練負重上落樓梯
為了上樓，一家三口約一星期前開始，每天一起練習行樓梯至少一次，由起初約十層樓、不戴口罩，逐步加碼至戴口罩上超過 20 層樓。考慮屆時要搬運重物，包括攜大量飲料解渴，他們下周亦將練習負重上落樓梯，直至五月上旬回家的日子。平時完全不運動、體能較差，李太第一次練習時，行了十層樓梯已經「頂唔順」，覺得太焗，「有啲暈暈地」。但經過一個星期練習、閒時在家做 sit-up，體能已慢慢改善，能慢慢走完逾 20 層樓梯。
為了上樓，夫婦購置防撞袋、兩大卷啪啪紙和圍膠等，李先生將全部搬運上樓，以保護重要物品。李太亦特意買來四樽氧氣，供自己和兒子有需要時使用。
備四樽氧氣 「總好過冇準備」
除了練行樓梯，他們也購置不同物資如手套、頭燈、退熱貼，還有防撞袋、兩大卷啪啪紙和圍膠，以保護重要物品。上樓須知提及不可用風扇，李太亦特意買來四樽氧氣，供自己和兒子有需要時使用——「當你覺得真係好辛苦嘅時候，吸個純氧會舒服好多」，李先生說，「你有準備總好過冇準備。」
只有三個小時，究竟有什麼需要拿？又怎樣在最短時間拿到最多的東西？這些日子，李太會在腦海預演返家的情境，作最壞打算，但返家一刻到底會湧現怎樣的情緒，她也不敢想像——望着無比熟悉的每個角落，「自己會唔會突然 calm down 唔到失控呢？但跟住又話畀自己聽，唔得喎，因為真係得三個鐘咋喎，要好好執拾啲嘢。」
家中若失竊 「執嘢好定唔執嘢好？」
她也擔心若發現家中失竊，是否要先報警等警方取證，「執嘢好定唔執嘢好？」就算執好物品，又是否有能力搬到樓下？而且雖已向一戶一社工申請上樓第二次，但一切安排仍屬未知數，令他們難以部署；臨上樓在即，社工也未能答出在哪裡泊車、何時可入停車場等細節。
「所有嘢我哋都係好迷惘，所有嘢都係要聽指令做嘢，冇得話間屋係你嘅，你想點就點，冇一個我哋自己可以決定到嘅嘢。」
唯一可以準備的，大概就是自己的裝備、體能和心態。考慮到搬運困難和儲存空間有限，兩人已決定放棄大型傢俬、電器和衣物，只取回有紀念價值的物品和貴重物品，像是結婚相簿、學歷、兒子畢業相，以及兒子喜歡的模型和物品。
讓初中兒子回家執拾
就讀初中的兒子在宏福苑長大，每次看到被焚毀的屋苑也流露出不開心，說很掛住屋企、很想返去。李太也曾擔心他情緒波動，不想讓他上樓，但丈夫一句「唔畀佢上去會留遺憾」，二人終決定尊重兒子想法，讓他回家執拾心愛的物品。
李太自小在廣福邨長大，兒子出生後與丈夫買下宏福苑單位，由零開始，一手一腳建立，家中許多物品都是他們心血。如今要告別，她說「其實成間屋都唔捨得」，居住環境、交通、街坊情誼，通通已不復再，「原來發生咗一件事之後，個變化可以咁大」。
只能靠拍照留住回憶
兩夫婦料這次上樓將忙於收拾，沒有多餘時間作道別，只能靠拍照留住回憶。他們盼上樓時間和次數可增加，「你政府一路畀我上，我一路都 keep 住上，做得幾多次道別，就做幾多次道別」，「講真，間屋係自己嘅，有邊個唔想返去呢？」
災民要為回家自行張羅準備、鍛煉體能爭分奪秒，旁人看來亦覺悲哀，李太嘆「因為你（政府）所有嘢都唔清晰，我哋咪要自己嚟囉，咁唔係可以點呀？」但近半年來的經歷，也讓她慢慢學會，「改變唔到目前嘅狀況，就唯有改變自己嘅心態」。「你話冇咗層樓，會唔會開心呢？一定唔會㗎喇」，李先生說，但「唔發生都發生咗，可以點樣？唯有向前看囉，負能量你一路發出嚟，其實冇作用，只會令到自己更加唔開心。」
李先生居於宏建閣高層約 10 年，宏建閣只有一個單位受嚴重損害，李家的單位料狀況較完好，可容四個人於 5 月上旬上樓執拾。
「慢慢練練吓，原來都可以嘅」
未來的路充滿未知，但李太盼自己練行樓梯的經歷，可成為街坊的鼓勵——起初以為自己半小時也行不完、甚至可能要醫護幫忙，但練習一星期後，竟可在十分鐘內行完 25 層樓梯。「原來自己都做到嘅，我都希望帶出個訊息，話畀街坊聽唔好成日覺得自己唔得，其實自己慢慢練練吓，原來都可以嘅，唔好畀自己有遺憾⋯當你試咗之後，原來嗰樣嘢唔係自己睇得咁困難，原來你自己肯試的話，都可以做到呢樣嘢。」
「我哋之後條路係點唔知吖嘛，所有嘢都係一個謎⋯我哋點解唔索性用呢個機會話畀自己聽，原來好多嘢係做到，唔係做唔到。」
自製木板紅白藍膠袋助搬物
英國格倫費爾大廈大火後，政府曾在大廈一側加裝電梯，以取回高層物品，又聘專業公司處理，不過是次宏福苑上樓，災民須徒步徒手搬運。面對沒有電梯的搬運困難，街坊想出不同方法應對，有人打算以勾將物品滑落扶手、有人提議人鏈傳遞；宏福苑高層居民林先生（化名）則製作了黏着紅白藍膠袋底部的木板，以尼龍繩控制，成為流動斜坡，讓重物滑下樓梯，省下搬運的力。
林先生（化名）則製作了黏着紅白藍膠袋底部的木板，以尼龍繩控制，成為流動斜坡，讓重物滑下樓梯。
去信何啟明 要求樓梯安裝木板沒被採納
勞工及福利局副局長何啟明，二月底關注宏福苑居民沒電梯下，從高層單位取物的難度，林先生當時留意到新聞，想起國內樓梯通常設有斜坡供人搬運行李，遂向何啟明發信，提議可從頂樓至地下樓梯安裝木板，製成斜台供居民將重物滑落，又曾親身反映意見，何稱已轉達警方，但不知會否落實。
上樓方案公布後，林先生的提議無被採納。「大佬，你叫人哋點搬啫？⋯你要諗吓啲老人家先得㗎嘛大佬，就算後生都唔係咁易啦。」「你唔做，我唯有靠自己」，他找來幾塊木板、紅白藍膠袋、魔術貼等材料，上網學簡單繩結方法，斷斷續續以幾天時間完成自創的「樓梯雪撬」，到樓梯實測，大致符合預期，加裝木板的紅白藍袋毋須用力就會如雪撬滑落，但須控制住其速度、也不可承載過多重物。
為何不聘人幫助居民搬運物品？
林先生打算預備四個紅白藍袋加木板，予家人搬運新淨的電器，其餘「見咩咪攞乜、撥晒落去囉，仲慢慢喺度摷呀？」他因不良於行未能上樓，只能由家人代勞，「冇得講㗎喇，你自己都上唔到去」；家中海景最是難忘，「好靚㗎個景，對住個海，對住出去係幾舒服⋯」
林先生還有很多不解的問題，例如為何只限搬三小時？為何不聘人幫助居民搬運物品？為何不公布損毀輕微大廈的驗樓報告？尤其較完好的樓宇，若不是危樓，「我覺得佢冇理由唔畀人上⋯我覺得佢應該畀人搬晒啲嘢為止，直接你唔上為止。」
