宏泰閣居民歐太的家園嚴重焚毀，她今日再回家，希望在灰燼中，能找回結婚戒指，及小朋友成長的紀念品。她也帶了花束，想放在大堂，悼念逝去的街坊，「話畀佢聽，我哋返咗嚟，懷念大家」。面對重置抉擇，她指買樓不是買盲盒，現時資訊不足，她難以在 8.31 前做決定。她今日將「心繫宏福」等標語，張貼在橙網後，對於有標語因字眼問題被撤，她感到不開心，也想到聖經裏的四個字：「眼中樑木」。
「我唔希望係最後一次囉」
家有三位小孩，正值考試季節，小朋友雖想上樓，但歐太怕現階段會影響他們的情緒，所以已向社工提出，希望有機會第三次上樓。她說：「我唔希望係最後一次囉。」雖然，每次上樓，她都會當是最後一次。
回家受到限制，她說：「成件事好複雜，間樓係我，但我返嚟我要申請，我有好多限制，心情沉重」。
可否用火險重建？
快踏入六月，宏福苑居民要面臨是否出售業權的抉擇，歐太說，資訊不足，她難以在 8.31 前做決定，所以「暫時唔會簽」。歐太說：「政府好似畀咗好多方案我揀，但冇一個係切合我屋企嘅需求」。歐太一家五口，她說，家裏人多，要顧及空間、交通等環境等因素，加上小朋友在大埔讀書、家人的網絡都在大埔，「你畀我方案好似好多，講到尾，得兩樣嘢，有樓換樓、收現金，講到尾，三個字講晒，就係賣業權」。她續指，若不賣業權，在 8.31 後，「你間屋，我哋就唔會接手，或者立法，中間可否有中庸之道，用火險重建？」
「我哋唔係想要一個對立面」
歐太說：「你畀我哋嘅選擇，黑同白，either be with us either against me, 你乖乖地賣業權，至少你有屋住，如果唔係，我哋唔理，立法攞咗你層樓」，「同我哋一個對立面，我哋唔係想要一個對立面」。
歐太說，目前最大問題是，對售樓的資訊不足，「資料都未畀到我，set 條線 6.30、8.31，小朋友買玩具，我可以幾廿蚊買個盲盒，我𠵱家乜資料都冇，成家嘅將來，我唔可以幾百萬，乜資料都冇，作一個決定」。
街坊標語被撤 災民：眼中樑木
連日來的回家，有宏福苑居民將「原址重建」的標語貼在窗口，但被「撤回」，有居民將「我愛宏福」貼在室外位置，也要收起，改為貼在橙網之內。宏泰閣居民歐太今日（29日） 回家，她也準備了「宏福情常在」等字句，及代表一家人的熊公仔照片，打算放在屋內，有的則會向外張貼。對於部分街坊的標語字句被撤，歐太說，想起聖經的四個字：眼中樑木。
歐太的家園完全燒毀，物品也曾被移動。她表示，已準備了有紀念價值的相片，想貼在家裏的位置，「畀自己一路執嘢嘅時候，有返少少家嘅感覺」。其中一張相有五隻小熊，分別是夫婦結婚時的熊公仔，及每位小孩子出生，也增添了一隻。她會將這張代表一家五口的「熊人家庭照」放在客廳。
她也準備了「心繫宏福」及「宏福人，宏福情常在」的字句。她說：「我哋就算賣唔賣業權，我哋都係宏福人，可keep 住聯絡，大家都係街坊」。 對於近日有街坊的標語要移除，歐太說：「我睇到嘅時候，有啲唔開心，諗起聖經四個字，眼中樑木」。
她指，聽證會上「咁多嘢講咗出嚟」，政府都可接受到所有的「唔理想」，「每個 party 都係講緊呢單嘢唔係我跟開」。但對街坊貼的字，偏偏包容不了，「呢條木刺，係咪真係對你咁梗眼？」 她說：「我哋宏福人，互相勉勵，點解要將一件咁簡單嘅事，睇得咁敏感呢？」她表示，會忠於自己，說出這數月的感受。
相關報道：
圖輯｜人在，家在
宏福苑回家｜悼念街坊 淚崩執拾 屋內三小時記錄
