「其實我想返去瞓覺，我真係唔想執㗎。」八旬父母於宏昌閣喪命、居於宏志閣的蘇先生，今午返回宏志閣的家執拾。上次返回宏昌老家時很傷心，但今次要在重重限制下，返回與太太一手一腳建立、未有在火災中受波及的安樂窩，他坦言很憤怒：「我哋嗰座係冇問題㗎嘛，點解要咁樣去為難啲業主呢？」對於政府用善款收購業權、半年後才讓他們重返宏志，他屢批「唔 make sense」，亦不想賣業權，「呢個始終係我哋嘅根」。他只盼能盡快召開業主大會，和重返自己的家生活：「我絕對唔係上去道別。」
心情矛盾：如果唔收係咪又要搬返上去？
蘇先生今與太太和兩位朋友，一同返回宏志閣的家執拾。去年 12 月與太太上樓一個半小時，執拾了冬天衫褲、愛貓用品和重要文件等，但時間太倉卒，有很多東西未及執拾。他今日盼上樓拾回其他重要物品，但坦言三個小時「點都冇可能夠」：「𠵱家你係叫我搬屋喎」。
宏志閣的去向未定，他心情十分矛盾：「你又未公布究竟宏志閣嗰個去向究竟係點，如果你話我唔收嘅時候，咁我哋係咪又要搬返晒上去呢？即係好矛盾囉而家係，究竟佢想我哋點樣樣。」
樓宇無損 斥上樓限制「荒謬」、百般不願意
這次上樓執拾，蘇先生坦言「百般不願意」：「其實我想返去瞓覺，我真係唔想執㗎。」對於宏志閣無受火災波及，但回家仍要面對重重限制，時間、人數也受限，他感到很荒謬：「我哋返我哋自己屋企，你要登記、要申請⋯我哋嗰座係冇問題㗎嘛，點解要咁樣去為難啲業主呢？係好唔 make sense 㗎」。
他強調，自己仍擁有業權、宏志閣也無損毀：「難聽啲講，我上咗去我唔走，我鎖埋隻門，你奈我咩何呢，你用咩法例去唔比業主喺業主個單位入邊呢？」他又提到，《基本法》第六條寫明香港政府須保護私有財產權，「咁我就最擁護基本法㗎喇，咁我希望特區政府都應該擁護基本法」。
兩次上樓 一次傷心、一次憤怒
蘇先生形容，今次上樓的心情，與上月返回宏昌閣執拾父母遺物時有很大對比，「我上次上去係好傷心，好想見返父母嘅嘢，但今次我係好憤怒，你點解可以對災民咁無情？你成日話情行先，嗰個係咪無情呢？」
「係好嬲㗎，真係好嬲，好似當我哋地底泥咁樣，究竟你想點樣？你想點樣糟質我哋？我唔知道而家。」
他亦指，上次上樓「有水有電乜都齊」，今次卻沒有水供應。對合安稱擔心漏水，他質疑：「因為係你等咗半年，你擺喺度⋯令到啲水管損壞，咁點解你係拖咗半年先畀我哋返上嚟呢？」
指原料二月完工 質疑何以需九個月修復
合安昨晚舉辦簡介會，指宏志閣復修工程需至少逾 3,000 萬、需時最少九個月，又指宏志閣有三分之二外牆未完工，或出現滲水或外牆剝落。蘇先生望着宏志閣的外牆，質疑肉眼可見紙皮石已鋪了一半、下面的批盪亦已完成，「點解佢仲講係做咗三分一呢？」他亦質疑需時九個月的說法：「我哋宏志閣如果唔係有火燭，我哋二月已經係完工喇，點解佢仲話要做九個月呢？」
批政府以十億善款收購、不花三千萬維修
復修費用或需由宏志閣業主承擔，蘇先生不滿指，政府不肯花 3,000 萬維修，但就肯用十億元收購宏志閣，而且是用市民捐贈予宏福苑居民的善款來收購，「嗰個道理喺邊度呢？唔 make sense 㗎喎」，「啲善款其實係熱心市民畀我哋重建或者維修宏福苑㗎嘛，點解你又唔用呢？呢樣嘢其實係講唔通。」
對於宏志閣業主日後或要承擔公共地方維修的費用，蘇先生反駁指，政府收購其他座數後已成業主，不應由宏志閣業主獨立承擔。他又質疑，政府拆卸宏福苑的公園設施也沒有問過業主，「全部𠵱家變咗係一個工地，咁究竟係咩理據拆咗佢呢？救火嘅時候都冇需要拆。」
批拖延召業主大會：拖到賣晒業權，唔使開㗎喇喎
政府早前稱，如 6 月 30 日前有 75% 宏志閣業主接受賣業權，會將宏志閣納入方案。面對這條「死線」，蘇先生盼能盡快召開業主大會，了解其他街坊意向，亦認為業主決定是否出售業權前，合安應提供更多資料，包括驗樓報告。
他批評，合安一直拖延不召開業主大會，「佢一直都拖啦，佢拖到幾時呢？拖到我哋賣晒業權，咁其實已經唔關我哋事，唔使開㗎喇喎。我覺得唔應該囉，應該盡快跟返法例去做。」
不想賣業權：始終係我哋嘅根
面對收購方案，蘇先生意向是不賣，「因為係我自己嘅物業嚟㗎嘛⋯呢個始終係我哋嘅根。」於宏昌閣長大、自小已嚮往海景單位，15 年前再與太太一同購入宏志閣的海景單位，「真係一手一腳自己儲錢，好辛苦咁儲錢買返嚟」。他嘆，「我哋唔去旅行、死慳死抵，希望有呢個自己嘅安樂窩，但係因為一場人禍，而令到我哋失去咗嗰樣嘢。」
「絕對唔係上去道別」
這次上樓，會否當作最後一次？「唔會嘅應該，我唔係上去道別，我絕對唔係上去道別。」家中一部琴是他向太太求婚的禮物，亦可說是愛的見證，但因過渡性房屋空間有限，這次暫未能帶走，但他望仍能有機會取走：「希望攞到嘅，就算屍骸都希望攞到嘅」。
臨別貼字報、看風景、彈琴：暫時分開先，遲啲返嚟
蘇先生最終在宏志閣的家逗留了三個多小時，臨別前，他將事先預備的「我愛宏福 重建宏福 心繫宏福」字報貼在玻璃窗，又坐在床上觀看窗外海景：「我平時坐喺呢個窗度，可以坐一個下晝，好舒服好涼爽」。
蘇太亦再次彈奏蘇生送的鋼琴：「雖然呢個琴走晒音，但呢個琴係老公送畀我做求婚戒指嘅琴嚟嘅，你喺度留守屋企，我哋暫時分開先，遲啲返嚟呀吓，辛苦晒喇，你睇住間屋喇！」
臨走前痛哭：我唔捨得屋仔呀
臨走前，蘇生蘇太以濕紙巾抹勻全屋，想好好清潔這個心愛的家。蘇太抹地時不捨痛哭，一戶一社工上前敲門，蘇太嚎哭：「我唔捨得屋仔呀⋯⋯好似趕我哋走咁⋯⋯我都唔想走⋯⋯」，社工再勸說「你有車嚟緊㗎喇，差唔多啦，嗱你同佢 say goodbye 啦」，蘇太嗚咽：「我暫時性走⋯我唔想走啊」，蘇生亦哽咽：「我哋唔會 goodbye 㗎。」
自年少拍拖時已說過要買海景單位，至婚後於 2010 年購入，如夢想成真，兩人對這間屋也非常不捨。蘇太泣不成聲：「阿婆報夢畀我話，叫我中六合彩，我話唔使呀，你畀我買個海景單位得喇⋯𠵱家搶咗我個頭獎六合彩咁呀好似⋯」
蘇先生透過訊息說：「我哋真係好鍾意間屋🥹」
相關報道：
宏福苑火災｜八旬雙親葬火海 父遺骸碳化、母「失蹤」逾月靠牙齒證身份 「政府責無旁貸」
宏福苑火災｜單位牆身、天花薰黑 窗框變形 子望上樓悼念、獻花祭罹難雙親
宏福苑火災｜聽證會上午播已故雙親求救錄音 子下午旁聽始知雙親曾報警：聽唔到，好可惜
宏福苑聽證．第五日｜哽咽憶亡妻 葉家駒斥部門逃避責任 雙親罹難 子：宏福苑只能示範一次
宏福苑回家｜哭別雙親 面臨收購 遺屬蘇先生人亡家破 卑微願望盼重建
