居於宏盛閣 30 樓的七旬老人蔡生，第一次上樓時因腳痛而未能上樓執拾，「爭取今日上去，我都 76 喇，睇下上唔上到啦，因為我都 30 樓呀，盡量爭取啦！住咗 40 年，多少有啲感情啦！」
今次上樓，蔡生希望取會紀念品、支票，各種資料等。面對攝氏 36 度高溫，蔡指「我𠵱家都熱啦」，帶備一乾一濕毛巾，「慢慢上啦，呢啲要自己爭取，我都好唔捨得」。他形容「經常掛住，發夢都醒，想望下住咗40年嘅屋係點」。第一次上樓不知會否是最後一次，蔡生直言「無得擔心㗎，係珍惜呢個時間，喺呢幾個鐘頭拎返想拎嘅嘢、會影返幅相留念」。
「政府要我哋賣業權，無辦法，係大圍嘅事」，不過蔡生希望政府可安排長遠安置計劃，「唔好話你畀咗錢之後就自己顧自己，喺市場買到就買，買唔到就你嘅事，千祈唔好咁樣」。
「我哋係受害者」
蔡指「我哋唔係要求高，」單位「就算二手都好，畀返我哋呢啲受災嘅……屯門呀、粉嶺都好，保障有個地方畀我哋住就OK」，他強調「我哋唔係自己燒咗自己間屋喎，我哋係受害者，（希望）畀返差唔多呎數」。
「我 70 幾歲，爭百幾萬點供呀？」
蔡亦擔憂單出售業權，「我哋拎返 300幾萬，出面好多（單位）都 400幾萬，我 70 幾歲，爭百幾萬點供呀？」希望政府可以安排「畀我哋揀咗樓先，心目中有咗著落先賣個業權畀你，係最好嘅！退其次嘅，政府承諾一定安置到你有正常居屋，希望政府做得到」。
