宏福苑收購死線已過，最終有 13 戶沒交接受收購信件，宏盛閣洪女士是其中一戶。她一家三口在 2002 年搬入宏福苑，大埔是她的生活圈，她的心願是重返屋企。沒有原址重建、重返家園的選擇，夫妻簡單洽商後決定放棄。她形容，是無力改變下「躺平」。對於問責，她稱現時或要祈求上天，「喺一個法治之地嘅地方，叫啲受害者祈求個天還我哋一個公道，你話係咪好荒謬？」
「初初覺得過幾日之後我會返去」
居民今年五月獲政府批准第二次上樓，洪女士曾經接受記者訪問，表示每逢假期都回到元州仔公園看向單位。記者與她相約在公園訪問，她指著單位窗口說，一家三口在 02 年搬入，當時丈夫在大埔區工作，需要物色同區物業。
當初睇樓時，兩歲的兒子相當開心，「先生話小朋友開心，即係呢度係風水福地！」他們沒多想即買入這個看向吐露港的單位。
洪女士曾以政務副司長卓永興的論調，譏一家三口合共住了「七十幾年」，「唔係賣咗間屋我就可以一了百了，始終我哋經歷過。」住了多年，洪女士說單位在兒子大學前後再裝修，打算在此安老，全屋甚至選擇訂造傢俬，粉飾過後如同新屋入伙。
洪女士憶述兩次上樓情況指，「我屋企完全冇事，連啲（燶）味都冇嘅」，除了久久無人清潔，一切如昔。
《集誌社》早前根據聽證會內容，整合各大廈單位受損情況。其中宏盛閣 6、7號單位，以及部分公用走廊屬輕微受損到完全焚毀，1至5號、8號單位絕大部份未受波及，只有 6 個單位輕微受損。
「初初覺得過幾日之後我會返去，後尾見到咁樣，可能一兩個禮拜、再多幾日，但由頭到尾我係無諗過翻唔到去。」一如其他街坊首次上樓，洪女士只想著家中情況，無暇多想賣樓。到看見家中情況，洪女士更想再次回家，惟日子過去，政府未有提到賣樓以外的選擇。
「我冇諗過有一日我變咗一個受害者」
第二次上樓時，洪女士在梳化坐了一句鐘，「諗起放假嗰時候，做完家務坐喺梳化望住出面個景發吓吽哣，覺得仲舒服過我去旅行⋯⋯我又唔使諗其他嘢、其他嘅思想負擔，我就係好單純一個家庭師奶，我安安份份翻份工，放假做吓屋企嘢。我冇諗過有一日我變咗一個受害者。」
現時與丈夫居於大埔中轉屋，洪女士指，沒有把該單位視之為「家」，同時政府銷售計劃落閘。洪女士淡然道，現時「過得一日得一日」，她見臨床心理學家時，形容情況如同在大海之中，既上不到岸又無人拯救。
拒交收購建議信
上月 31 日，是宏福苑災民遞交「接受收購建議信件」的死線，政府曾表明逾期後方案即落閘。限期過後，政府指有 1971 戶（99.3%）已提交信件，洪女士一家未有提交。即使解說隊在死線前曾經聯絡過丈夫，但當時丈夫相當決絕，只向對方表示「唔賣」。
作為街坊，洪女士對絕大部份街坊選擇表示理解，「要落筆嗰一吓真係唔係咁容易去落筆，特別係嗰啲住得耐嘅，你話冇感情冇可能啦。」
她想起火災初期丈夫曾說，「對唔住，老婆。我以為我畀咗安樂窩俾你，但估唔到𠵱家去同我一齊奔波。不過如果你決定點，我就支持你。」
後來洪女士留意聽證會報道，看到相關監管部門辯解、圍標被視若無睹，甚至獨立委員會成員陳健波著市民多關心法團事務。另一邊廂，又看到民建聯大埔區議員黃碧嬌涉收取「死人授權票」，「失職嘅仲可以繼續加人工， 仲可以繼續坐喺區議會喎，你叫我條氣點順？」
她苦笑，「我哋𠵱家仲要為一片瓦遮頭奔波，嗰班人就可以高床軟枕，呢條氣點順 ？」
夫妻有共識，身在外地工作的兒子亦尊重兩老決定。最終成為少數堅決不遞信的人。洪女士說，街坊災前到災後都有積極參與屋苑事務，不論原址重建或修復都有訴求，報道多不勝數，但通通被無視，只見政府先拆屋苑公眾設施，再委託合安管理法團事務，是逐步計劃收購。她慨嘆，現時或要祈求上天還街坊公道，「喺一個法治之地嘅地方，叫啲受害者祈求個天還我哋一個公道，你話係咪好荒謬？」
「你（政府）鍾意立法你咪立，因為我哋無論做乜嘢，點樣去掙扎、點樣想有個公平嘅回應都冇嘅，係完全冇。所以其實『躺平』就係我嘅選擇⋯⋯呢個可以話一種『躺平』嘅狀態。」
相關報道：
宏福苑收購｜最後的 45 戶 沒掙扎 不動搖 拒賣業權何小姐：我條氣唔順
