大火過後，宏福苑宏仁閣居民陳太一家六口，暫時落腳在大埔策誠軒的九廣鐵路舊宿舍。陳太一家最為港人記得的一刻，也許是陳氏一家上樓後接受傳媒採訪時，談到自己的家，因中風而坐在輪椅上、不太說話的陳生暗自落淚的畫面。
面對著未知的未來、住屋、人生，甚或乎是否出售物業業權，陳太有著不同的糾結，「初初唔係幾接受記者訪問，好怕講錯嘢」。但災後她形容自己感受到滿滿的愛，「嗰種愛係令到你心裏面唔記得自己係火燭過」。
回想起宏福苑的街坊、一個又一個犧牲的生命，再看自己的人生、信仰、災後兩次返家的狀況，「我覺得……此時不說，更待何時呢？客氣啲咪得囉！」
記者訪問過不少宏福苑居民，但陳太有點不同。不同在於她正能量滿滿，口中常提起各種感恩的事情，「你話我係咪好好彩？」是訪問中提得最多的話語，連朋友都問他「點解你哋咁奇嘅，明明好淒涼」。「好彩」在全屋六人也全身而退，尤其是因中風坐在輪椅、今年 70歲的丈夫。不過雖說「好彩」，但她的家也是燒得幾乎一物不剩，「燒到成為咗灰燼」。
陳太的家燒得幾乎一物不剩，「燒到成為咗灰燼」。（受訪者提供圖片）
火災當日陳太為了開解一位身陷財務壓力、情緒低落的朋友，堅持請對方喝茶試圖開解，最初對方愛理不理，陳太曾想過放棄邀約，但後來仍決定約朋友食生日飯慶祝，甚至為配合對方的時間改了幾次日期，最後約定飲茶的時間，正好與火災發生的時間相差半小時。陳太感慨「如果我哋小氣啲，唔鬼理佢，可能歷史就會重寫……嗰種創傷，我都好難想像……」。
那時候陳生陳太與朋友在宏福苑的酒家飲茶，「突然有個街坊大叫，邊個人喺宏福苑住㗎？你哋快啲返屋企呀！宏福苑火燭！」陳太先將不良於行的陳生與朋友安置於酒樓，自己外出察看，「佢（陳生）當時已經喊喇……」最初火災未波及每一幢，陳太還在安慰受災哭泣的街坊，「去攬下佢哋」，回憶時她亦苦笑，「我覺得唔會燒咗我間屋㗎……不過最終就燒到咁樣囉」。
陳太本身想上樓拾回一些個人物品，但幸好被保安攔阻，最終落樓飲茶時攜帶的手袋、身份證，穿著的衣服就成為了最後帶走的家當。陳太回想，落樓飲茶時「我覺得個袋好重，我就將件我喜歡嘅衫隨便擺低，『返嚟至搞你！』有啲食物到一半，要落樓飲茶，『唔食住，返嚟再食！』原來我最後同佢哋交流，係同嗰件物件告別緊、同間屋喺度告別緊」。陳太感慨，「每一樣你珍惜嘅物件，你都唔知道係咪同佢告別緊，係咪呢次就係最後一次呢？」
陳太的丈夫陳先生是名 70 歲的中風病人，當年 50 歲中風後初期雖仍能行走，但近年身體每況愈下，說話與行動皆不靈活。因為提早下樓飲茶而沒有和火勢正面對抗，「我扶佢個過程一定會好亂，好埋一定係好創傷，呢個過程」。
陳生陳太是宏福苑最初代搬入的居民，回想在宏福苑最美的記憶，是陳太 30 歲那年，「極罕」請了兄弟姊妹到家中慶祝生日，當年的自己還在想「遲啲執好間屋再請你哋嚟過啦」，怎料時光飛逝數十年，再次請客已在策誠軒。
90 歲鄰居婆婆成功逃出
「生命真係有種活在當下嘅感覺」，在宏福苑居住時，她常常認為自己「無執屋」而婉拒朋友到訪，「落去飲茶好過啦！」她形容火災令她的心比以往更開放，在策誠軒的「新家」更破天荒舉辦了幾次「感恩宴」，邀請二十多位親友來打邊爐，感謝大家在災後給予的愛與支援，「我哋同朋友、親戚嘅關係都拉近咗好多」。陳太口中想上樓拍門拯救的 90 歲鄰居婆婆亦成功逃出，「我哋成家人仲探過佢一次」。
「冇晒所有記憶」
「嗰時睇到自己嘅價值觀」，「我隔離有個阿婆成 90 歲，佢聽唔聽到嗌㗎？好想衝上去拍佢門」，第二樣想的，是去年 12 月她要到日本上佛教哲學課程，「哎呀無咗 passport 我點去？」那時候她才發現，「原來我對智慧都幾高排位，死啦，嗰十幾年嘅（佛學）筆記咪無晒囉！」陳太女兒在火災當晚最惦念的，亦不是甚麼金銀珠寶，而是哭著提到，那隻由歲半開始陪著自己睡覺至四十多歲的毛公仔，「佢葬身火海喇……」最終由女兒的弟弟和弟婦在舊物網站購入一隻，「填補佢心靈嘅空虛」。不過女兒亦記掛著一張又一張兒時的照片，「個心都𢲡實，好多童年、BB 時候嘅相，冇晒所有嗰啲記憶」。
火災後，居民獲安排上樓執拾家當，「其實準備返宏福苑嘅時候，你已經係有情緒……原來唔係無情緒，只係壓晒喺下面」。身體條件不許可的陳先生只能在樓下等候區等待，由子女上樓。陳太回憶，丈夫在樓下已經激動落淚，「我睇到原來他佢對宏福苑呢間屋嘅嗰種情深，係好深情嘅。」
陳太後來也有機會在第二次上樓時，親自上樓與舊居告別，由於只有三個小時，陳太向家人道「今次有啲錢銀嘅嘢都應該放下……同間屋告別下」，她頓了頓，「算啦，咁多錢都燒咗、成間屋都無咗，放下啦」。
她和家人對著僅有的牆壁與房間說「多謝晒 2602 照顧咗我哋咁耐」，並拍下影片留念，摸一下牆壁、摸一下剩下的油漆，「好多記憶喺裏面」。那時他們還有一絲希望，「你保佑我哋暫時離別，遲啲政府可能同我哋重建，或者收復返間屋」。
這次上樓，陳生獲樓梯機公司協助，由義工一前一後將輪椅拉上 26 樓，陳生可以在家門外再之望見自己的家。陳太觀察到，丈夫聽到宏福苑有關的事情便會忍不住流淚，後來大家開始學會用黑色幽默來消化這份無奈。「嬲即係代表我哋仲希望改變，到我哋失望嘅時候真的喊喇……𠵱家佢會跟住我哋喊一陣就會笑，又會跟住我哋話『係呀，係咁㗎啦！』」
相比起有街坊擠在狹小的過渡房屋，陳太坦言一家六口能分到策誠軒大單位是「極其幸運」。這份幸運，源於孫兒的學校社工與老師在火災後的協助，加上民間團體的主動幫忙。「呢間屋連一張比老人家坐得穩嘅凳、小型風扇，都是民間團體主動諗起幫我哋準備……最感動的是喚醒了全香港人的愛。」
「以前無覺得宏福苑啲無障礙通道係咁正」
陳太感慨，近年以為大家變得很冷漠，但在這場火災後，她看到許多年輕人主動排隊做義工、捐款，「好多嘅支援、好多嘅愛，嗰種愛係令到你心裏面唔記得自己係火燭過。」也有些小事，是離開了宏福苑才體會到的，例如陳生坐著輪椅由策誠軒出外，需要陳太推上斜路，再橫過大埔公路，動輒半小時起跳，「以前無覺得宏福苑啲無障礙通道係咁正」。
雖然宏福苑街坊鄰里關係一直不俗，在被逼「共患難」、死裏逃生之後，宏福苑的街坊也有點點改變。「以前幾十年都唔會問人攞電話㗎！𠵱家見到街坊，覺得好似見到個屋企人，你覺得好想好想去攞佢電話，有咩互相支持、鼓勵，我哋係宏福苑家人」。
面對業權收購與簽署協議的抉擇，陳太坦言自己曾非常糾結。「有啲街坊比較有禁忌，唔係咁 open 咁講宏福苑嘅嘢」，但她的想法又有些不同，「我個人單純啲，我哋未到最後，有可能會變呢！」
糾結的轉折點來自一位朋友跟她分享的一個故事：戰場上有兩個各自帶領一千名士兵的將軍，第一個將軍把士兵當成工具，做決定非常爽快，但沒有考慮過士兵的感受；第二個將軍把一千人看作一千個生命與家庭，做決定時充滿著道德標準與牽掛。「聽完之後，我就決定選擇做『B將軍』，遲啲先簽，睇下個變化」。
陳太直言決定之後，「成個人鬆晒，個心好平安」。背負著一家六口的未來，陳太指如果早點簽署出售單位，或許有機會優先選擇較大單位，但她心底始終覺得愧對那些在火災中受難的人，以及為街坊付出過代價的人。
遲一點簽署也是一份表態
陳太說，168條人命的哀傷還在，還有許多人為這件事付出了代價，「佢哋想唔想我哋咁快就唔記得佢哋呢？」。對她而言，「我未去到佢哋咁轟烈」，但遲一點簽署，也是一份表態與支持。
作為宏福苑的第一代居民，「本身我諗住喺嗰度（居住至）功德圓滿㗎，哈哈」，現時未來的住屋走向也充滿未知，但陳太表示已經放開了自己，「佢（上天）又要我體驗下啲新環境」，她依然期盼著未來，希望明天會更好，「都係個天話事㗎咋」。
相關報道：
宏福苑收購｜曾爭原址重建 災民點名不滿三高官 單親媽媽范小姐擬含淚簽名：明知懸崖都要跳
宏福苑收購｜壓力纏身 夢見被強搶 單位完好 第一手業主無奈賣樓：已唔係我哋認識嘅香港，可以點？
宏福苑收購｜最後的「45戶」 宏志閣夫妻堅持：為咗保護等緊公義嘅街坊
宏福苑收購｜最後的 45 戶 沒掙扎 不動搖 拒賣業權何小姐：我條氣唔順
