宏福苑業主大會｜被分開入場　八旬父與職員爭執不適入院　女兒未獲告知　斥合安安排混亂

聚焦一周
2026-07-19
9:39 pm
集誌社記者

大埔社區中心有一名男子，於今早約 12 時、召開宏福苑業主大會期間，因頭暈身體不適送院治理。女兒方小姐（化名）會後接受訪問，指其年近八旬父親因入場開會問題，與大會職員爭執，令他心臟不適入院，幸好目前情況穩定。方批評，當父親被送院時，自己已身在會議，惟完全沒有職員通知她，個多小時後才得知父親情況，「我超嬲，我同其中一個職員講：『我爸爸唔舒服，有咩事係咪你負責？』合安根本就唔適合做（業主）代表，佢根本就唔識搞（大會）」。

到場方知只可一人入場開會

方小姐今早與父親一同到大埔出席業主大會。爸爸以業主身份出席，方小姐則獲母親授權到場，兩人早已成功登記出席。怎料到場後，兩人才獲告知只可一人入場開會，「噚日已經打畀我爸爸對晒資料、對晒名、電話，咁你自己數人㗎嘛！嚟到你同我講唔夠位，喂，買機票你 over sell（超賣）都唔係咁樣啦！」

及後有職員指，會議即將開始要「截龍」，方先入場開會，但發現實際上並沒有「截龍」情況出現，「中間係 keep（持續）住有人上嚟，咁我係企喺度，又無 occupy（霸佔）啲位，點解我爸爸唔可以上嚟呢？」

父不適送院　女兒未獲告知

結果，在會場外與職員爭論的父親因心臟不適，由救護車送院治理，惟方小姐完全沒有收到相關通知，個多小時後與父親電話聯絡時，才知道對方已被送往那打素醫院。方及後聽到有疑似警民關係科警員，在對講機中與同袍道：「你哋無人知嗰個係佢個女咩？點解無人同佢講？」

批合安安排混亂

方批評，合安安排混亂，「根本就唔識搞（大會）」，又質疑為何要分四個場地開會，認為在會議上的點人數數目出現多次出入，如第一次點人數，單是大埔社區中心已有 300 多人，「你點會四個地方加埋，得 400 幾人呀？再點，就有 500 喎！好喇，到投票又有千幾張票喎，咁你頭先講咩得 500 幾人呢？一係你就 X 噏，一係你就 hea（敷衍）我哋」。

核數報告出錯

此外，方認為合安開會態度散漫，包括核數報告出錯，當中英文版本日期為 2025 年 12 月 30 日，而中文則為 2026 年 1 月 1 日，「你作為我哋代理，你唔望過份嘢，然後掉出嚟畀我哋議決？陳生（合安主席）你都四十幾五十歲啦，睇個款都唔似Gen Z 啦，做嘢仲衰過Gen Z嘅？」

方強調，是次業主大會完全沒有得到任何有用資訊，只讓業主更加無力，「我哋業主困死咗一個位，我前無去路、後有追兵。我後面畀政府追上嚟，畀迫我賣（業權），我保險無路行、業主大會無路行，我哋想原址重建，一句劈埋嚟『不切實際』」。她形容，合安已成政府的「儈子手」，「我哋畀人迫賣樓、賤賣資產、賤賣家當嘅同時，佢（合安）喺傷口上灑鹽嘅同時，仲係用一啲卑鄙嘅手法，去迫我哋就範」。