「爹哋媽咪你哋有冇返嚟呀？⋯我哋返嚟喇，我第一次返嚟。」宏福苑大火半年（26 日），蘇太首次踏足八旬老爺奶奶喪命的宏昌閣。看着曾經熟悉的家面目全非，她忍不住哭泣：「好似入咗一條時光隧道，黑鼆鼆嘅時光隧道。」
自言怕黑、有幽閉恐懼的蘇太，上次不敢上樓，但因不知還有沒有下次，這次嘗試上去：「唔想有遺憾」。兩人帶上為雙親親手學插的花束，以噴漆在剝落的牆身噴上「I Love Daddy Mommy」，將尋回的蘇老太手工藝品，放在桌上當裝飾，再將磚塊疊好、灰燼掃走。臨行前，他們向屋仔道謝：「暫別喇屋仔⋯我哋走喇，希望仲有機會上嚟啦。」
痛失摯親、無家可歸，這半年對蘇生蘇太而言，「好痛苦、好辛苦」。聽證會上播放雙親的求救錄音，他們至今仍未聽過，「我哋嘅情緒未接受到」；說到悲痛處，還是不禁落淚。但蘇太感謝一路上同行的人：「我哋要互相扶持講真，唔係淨係我哋成個宏福苑⋯都好感謝你哋。」
首次上樓報道：宏福苑回家｜哭別雙親 面臨收購 遺屬蘇先生人亡家破 卑微願望盼重建
不想有遺憾
宏志閣住戶蘇先生，八旬雙親於宏昌閣 27 樓喪生，父親被燒到碳化，透過 DNA 確認身分；母親只餘碎骨和牙齒，「失蹤」逾一個月才憑牙齒確認。
蘇生蘇太婚後曾住在宏昌閣數年，至十多年前購入宏志閣的海景單位，即使搬離後，仍不時回老家飲湯、吃飯。五月初第一次上樓，蘇太因怕黑、有幽閉恐懼症，不敢上去，只在樓下等待，透過視像通話與這個家暫別。
知悉有第二輪上樓後，雖然內心仍害怕，但不知道會否再有下一次，她還是很想嘗試上去：「我唔想帶有遺憾，我完全冇試過上去⋯我驚真係唔好彩，宏福苑佢唔重建畀我哋，我係一世都覺得有啲內疚」，她嗚咽。
一想到老爺奶奶以前佈置精美的家，變得面目全非，她在車上忍不住飲泣：「我唔知應間我會唔會好傷心，定係已經嚇到呆咗，冇晒反應。」
親手插花的心意
首次上樓準備了花束和心意卡，蘇生蘇太今次再帶同鮮花上樓悼念。這盆鮮花用上蘇老太鍾愛的百合花和黃色，是剛過去的周末，兩人在父母教會的姊妹指導下親手所插，「當比爹哋媽咪嘅小小心意」。
蘇老太生前愛插花，常在教會大顯身手，亦曾說過要教蘇太插花，但一直未成事。這次蘇太特意去學：「總之個心想做嘅嘢，想做就做咗。」他們亦預備了三束鮮花，打算獻給同層罹難的三戶鄰居。
為保持鮮花最佳狀態，兩人特意開冷氣照顧、又帶同生水上樓，在獻花前先淋水。
黑鼆鼆的時光隧道
步入宏昌閣的大堂，看到門口已燒焦熏黑、升降機全被木板封起，蘇太已忍不住哭泣：「入去嗰度黑鼆鼆，根本唔係一棟大廈嘅入口嘅感覺，好似入咗一條時光隧道，黑鼆鼆嘅時光隧道，好恐怖」，「我想像到當其時火燭嗰啲人，好迷茫、好驚恐嘅場面。」
走上 27 層樓梯，她不欲停步，擔心會喘不過氣，亦憂看到其他單位會難受。抵達老爺奶奶所住的樓層，她先停一停，準備好心情，其後向三個同層罹難單位鞠躬、獻花；得悉有街坊正在單位執拾，又特意上前打招呼。
事隔半年首次歸家，踏入家門前，蘇太先探頭問：「爹哋媽咪你哋有冇返嚟呀？」其後拿着電筒，小心翼翼地步入：「我哋返嚟喇，我第一次返嚟」。「爹哋媽咪應該去咗佢哋想去嘅地方㗎喇」，蘇生輕輕回應。
尋手工藝品、噴「I Love Daddy Mommy」
上次擺放的花束已凋謝，蘇生將新插的鮮花擺放在旁，細心地淋水、整理，又逐一為電子蠟燭換電：「呢紮花係我同太太搵你哋教會啲弟兄姊妹一齊教我哋插㗎，希望你哋鍾意啦。」一如上次，他播起父親生前最愛的歌曲《陪着你走》、母親喜歡的粵曲，還加上街坊為宏福苑寫的歌《我要回家》。
上次尋回不少父母生前的陶器，這次他們續以鏟挖掘、以燒烤網作篩，尋回花瓶、茶壺、父母手錶等，還有陪伴這個家多年、尾巴已斷掉的陶瓷馬。蘇生細心地以泡泡紙包起，望能帶回去修復。
蘇太曾為奶奶織過一件黃色冷衫，「但好不幸地成間屋燒晒，件衫都冇埋」，亦因載有冷衫圖案的書留在宏志閣，未及重織一件與她合葬。雖然無法尋回冷衫，但她在灰燼之中「尋寶」，仍找回不少奶奶的物品和手工藝品。
「媽咪整嗰啲鐵線花」、「用珠仔砌成嘅盆栽」、「我送畀媽咪啲水晶」、「媽咪個眼鏡框」——每有發現，蘇太都會興奮地展示，並一一放在小圓枱上。她說奶奶就像藝術家，會寫大字、唱粵曲、玩手工藝，雖然不少物品已破損未能帶走，「咪擺喺張枱度當裝飾囉。」
未能將所有物品帶走，有一下，蘇太亦不禁感觸痛哭，蘇生拍肩安慰：「冇辦法㗎冇辦法，唔緊要」，「盡力得㗎喇」。蘇生並以黃色噴漆，在已熏黑剝落的牆身噴上：「I Love Daddy Mommy」。
蘇太在灰燼中，尋回不少奶奶昔日的手工藝品，包括鐵線花、以珠仔砌成的盆栽，並放在桌上作為裝飾。
蘇太說，上樓前「我係好想髹返間屋嘅，但梗係冇可能啦，幾百呎嘅屋，三個鐘頭點油呢？」，最終上樓前一晚，蘇生想到以噴漆在父母喪命的單位牆身，噴上「I Love Daddy Mommy」。
不准掛窗外的「原址重建」標語
蘇生蘇太一直渴望原址重建。自第一次回老家，蘇生已表明認為是暫別、不是告別，望重建宏福苑，保留與離世父母的連繫；五月中返回宏志閣執拾，他亦將「我愛宏福」、「重建宏福」、「心繫宏福」字句貼在窗邊，怒斥當局寧用十億元收購宏志，卻不肯花 3,000 萬維修。
今次上樓前，他亦再次向傳媒表示：「點解要夾硬咁收咗我地嘅業權，係咪淨係得收業權呢個方案呢？慰問無嘅，問責無嘅⋯係咪一個政府應該做嘅野呢？」、「驗樓報告就鎖喺夾萬度唔畀我哋知，咁究竟係咩原因呢？」他又引孟子的名言：「以力服人者，非心服也，力不贍也。以德服人者，中心悅而誠服也。」
雖已留意到日前有街坊貼「原址重建」字句被移走，但蘇生蘇太還是準備了「我❤️宏福苑」、「I❤️WFC」及「原址重建」字句，想掛在窗外表達心聲。不過上樓期間他們收到消息，要求不要在窗外張貼「原址重建」，否則「有機會影響街坊」。蘇生最終將「原址重建」改貼在室內，「我❤️宏福苑」及「I❤️WFC」則掛在窗外，當中心心內是宏志閣毛毛蟲攀爬架。
「司馬昭之心，路人皆見」
懸掛期間，有警員關注張貼什麼字眼，蘇太指不會掛原址重建後，警員說「多謝你，多謝」；在蘇生將「『蟲』建」字句在窗外揚了揚時，警員亦勸說：「唔好拎啲嘢出去喇，危險呀，吹到落街咁點算」，蘇生回應「得喇，唔使講，唔好講危險喇」。當時他心想：「我哋覺得危險去投訴嗰陣時，你唔同我講危險，𠵱家你嚟同我講危險？合唔合邏輯？」
「佢唔想出面見到吖嘛，咪貼裡邊囉」，「唔想影響到其他街坊冇得上去執嘢」，蘇生說。仍堅持在室內貼上：「因為真係想、希望原址重建。原址重建的確係最公道、最公道，同埋最慳錢嘅方法，點解唔考慮，點解一定要收咗宏福苑呢幅地？點解宏志閣咁企理嘅時候，你都仲要去收？其實都司馬昭之心，路人皆見。」
砌磚、掃灰、執垃圾
臨行前，二人一如上次，盡量將家清掃乾淨，「因為爹哋媽咪係一個好整齊嘅人」。玄關的一面磚牆，是夫婦居於這裡時親手所砌，磚塊散落一地，蘇太一邊哭泣，一邊將磚塊疊整齊，又將泥頭掃進已焚毀的廚房：「我想個門口乾淨啲⋯唔想一入門口好似好污糟好邋邋咁。」
警員協助將泥頭掃進廚房。
蘇生也將燒剩支架的椅子放回原位，並將灰燼全鏟到一旁，露出原本的木地板。他笑說：「今次我覺得掃得比上次叫做再乾淨啲，即係盡做啦。」
兩人與同行友人，在家中合照留念。蘇生站在廚房門口，探頭進「只限一名居民進入」的封鎖線，以手機電筒照探，細看每個角落；又回到昔日的睡房，站在窗前凝望風景。
蘇太仍努力至最後一刻，將廢鐵檢進垃圾袋，又在蘇老太以往客廳擺放陶瓷龜的位置翻找。「啊！龜呀！」她突然驚呼，拾起一隻完整的小龜，蘇生即道：「哇，好靚呀呢隻，竟然漏咗。」
臨離開前，蘇太意外尋回奶奶一隻完整的陶瓷小龜，蘇生即道：「哇，好靚呀呢隻，竟然漏咗。」
蘇老太原本放在客廳的陶瓷龜架，她多年來熱愛搜羅不同的陶瓷龜裝飾。（受訪者提供）
暫別屋仔
離開的時候到了，也是與「屋仔」暫別的時刻。「暫別喇屋仔！」蘇生蘇太相繼說。「我上次上唔到嚟呀⋯但係我嚟咗住咗三、四年，三年幾，辛苦你」，蘇太拍了拍牆壁。蘇生亦向老家道謝：「多謝，多謝啦，好多謝屋仔。」
想到當初常擔心發生火災難逃生，蘇太摸着牆壁，不禁痛哭：「唔好意思呀，我感受到你會被燒，但我幫唔到手，唔好意思⋯我都同咗爹哋媽咪講，會有火燭，對唔住⋯⋯」
「我哋走喇，希望仲有機會上嚟啦⋯⋯」她不住哭泣，又哽咽道：「我終於上到嚟喇⋯⋯爹哋媽咪如果你真係有嚟過，跟我哋走啦唔該。」
第一次不敢上樓，這次終於成功上樓，亦尋回老爺奶奶的遺物，蘇太說，「今次我上到，我覺得無遺憾㗎喇。」
痛苦的半年
再次回家這天，剛好是大火發生半年。由最初在社區會堂奔走認屍，到災後逾一個月才尋回雙親遺骸、為他們辦理後事；未能重返未受波及的宏志閣居住，夫婦連同兩隻愛貓搬入過渡性房屋，所有事都得重新適應。
直至聽證會上播放雙親求救錄音，蘇生選擇作證，更成為涉事方之一。面對政府收購業權的死線，他們原址重建和召開業主大會的願望無變，近日又重回父母和自己的單位執拾，心情在憤怒和悲傷之間擺盪。
「呢半年真係好痛苦、好辛苦，好多嘢要處理⋯啲嘢我哋從來都未試過、未處理過嘅嘢，呢半年係全部做過、經歷過。傷心啦、憤怒啦、無奈啦而家」，蘇生嘆。
大火後聲沙至今
蘇太憶起，大火後數天，即使內心很難受，但擔心影響到人，也會笑着向過渡性房屋的職員講早晨，「唔想比人覺得我哋放負，希望帶啲正能量」。「佢哋會覺得，你哋咁慘，點解你哋可以笑得出，唔係我想笑㗎，我係唔想影響到人，但你唔講到個痛位係唔會喊囉，講真係咪先，但我真係唔想影響你哋⋯」她邊說邊哭泣，蘇生拍肩安慰。
大火後常感憤怒、又會哭喊，蘇太聲沙至今，「我係一直都未好過」。自言易哭的她，由起初不敢去聽證會，再漸成為聽證會常客。不過雙親的求救錄音，他們至今仍未聽過：「我哋覺得我哋嘅情緒未接受到囉，所以都選擇唔聽。」
互相扶持
何時才能走出傷痛難以預料，但起碼這段路上有人同行。這個早上，蘇生蘇太在記者的包圍下接受訪問，在兩人說「唔好影樣」時，記者將鏡頭朝向下，當蘇太說「影響到你哋嘅情緒對唔住」後，記者異口同聲說「唔會呀、唔會呀」，在訪問尾聲，又互道「辛苦晒」。
「呢一段時間，我哋要互相扶持，唔係淨係我哋成個宏福苑，同埋你哋，都辛苦你哋，其實你哋去追趕我哋、慰問我哋、情緒支援，其實都好感謝你哋。」蘇太說着哽咽。訪問完結，有記者說了句：「多謝蘇生蘇太。」
相關報道：
宏福苑回家｜重返兩個家園 一次傷心 一次憤怒 斥上樓限制「荒謬」 遺屬蘇先生：點可對災民咁無情？
宏福苑回家｜哭別雙親 面臨收購 遺屬蘇先生人亡家破 卑微願望盼重建
宏福苑火災｜單位牆身、天花薰黑 窗框變形 子望上樓悼念、獻花祭罹難雙親
宏福苑聽證．第五日｜哽咽憶亡妻 葉家駒斥部門逃避責任 雙親罹難 子：宏福苑只能示範一次
宏福苑火災｜聽證會上午播已故雙親求救錄音 子下午旁聽始知雙親曾報警：聽唔到，好可惜
宏福苑火災｜八旬雙親葬火海 父遺骸碳化、母「失蹤」逾月靠牙齒證身份 「政府責無旁貸」
