政府今向受影響宏福苑業主派發問卷，收集長遠安置初步意願。問卷循三方向徵集意見，包括業主會否接受政府用公帑買業權、賣業權後會否購置居屋、綠置居等，抑或「樓換樓」換新居屋。問卷指「原址重建」最快要 2035 年或之後才入伙，又引述屋苑市場呎價為 6000 至 8000 元，惹來居民批評和疑慮。有居民批評問卷具引導性，以 2035 年原址重建「嚇街坊攞地」，而且估算呎價偏低，形容「以災前大維修緊樓價計算如同強姦」，無法令業主買回居屋、面積相若的單位。
政府今透過問卷徵詢居民長遠安置意向，但方向和內容引起居民批評和不滿。（資料相片）
宏昌閣業主批以 2035 原址重建「嚇街坊」
對於政府發的問卷，很多業主均反映感不滿及不合理。居於宏泰閣逾 20 年的杜先生（化名），認為問卷很有引導性、「設晒陷阱」，「引導班街坊揀佢哋想佢揀嘅嘢」。當中沒有獨立就「原址重建」徵詢意見，他認為政府根本不想原址重建，並透過強調原址重建最快 2035 後才能入伙，「用緊個年期嚟嚇我哋街坊」，估計最終是要「攞呢躂地」、將來予發展商建毫宅。杜先生說初時已預期，原址重建需時較長，但估計最多六、七年，但政府現時聲稱要十年，他認為是誘導街坊「睇住個年份去做個選擇」，是「偽選項」。
對於政府諮詢業主，會否考慮接受收購業權、再購置居屋。杜先生指，問卷引述 6,000 元或 8,000 元的呎價相當偏低，「憑咩可以定呢個數？」，而現時樓市開始回升，相關呎價「係冇可能喺大埔、甚至香港買到一間居屋」，「呢個已經唔係一個選項」。尤其對供完樓的街坊來說，「咁咪即係佢自己要再供多次樓？⋯你叫班業主或者班老人家重新再供多次樓，喂，捱咗幾十年，你叫佢再捱多次？好話唔好聽，好多都退休人士，憑乜嘢做 mortgage 呢？」
政府問卷引述測量師學會估算呎價，引起居民強烈不滿，認為按估算不公，居民沒有可能按此買回居屋、面積相若單位。（資料相片）
形容樓換樓是「陷阱」 料價格相若單位必縮水
至於「樓換樓」，他指現時根本不會找到價格相若、面積又相若的樓宇，按現時樓價，一定只能換取面積較細的單位，住宅只剩三分一或三分二面積，批評「呢個其實係喺度呃緊我哋」、同樣是「陷阱選項」。他認為，如果政府真心幫助災民，最少應用面積相若、而非價格相若作為「樓換樓」的標準，「以一個供滿咗嘅業主角度，係唔會再供多次樓，亦唔會再拎錢出嚟」，亦不會接受補差價換同等面積。
杜先生續批評，政府稱基金只餘 20 億、又指可能要用公帑收購業權，是挑撥災民與香港市民，引起其他市民對災民不滿；他亦不滿，政府以市民捐款收購業權是變相「將善款變公帑」。他說仍需時思考如何回應，形容自己的社工「從未試過咁勤力」，今天收到安排已立即致電和電郵他，認為當局「好急」、要盡快有回覆，但對他來說是無形壓力，覺得「你哋而家喺度逼緊我哋」。雖然問卷稱僅收集初步意願，但杜先生指政府之後也會以問卷結果作為「主流民意」，「可能佢最終出嚟嘅方案比呢個更 worse 都唔定，我哋都唔知佢而家點諗。」
有業主批評以大維修中樓價作估算如「強姦」，若要買相若面積單位，要在未供完的按揭下再額外付鉅款，「跳樓都唔掂」。（資料相片）
仍供樓業主 斥以大維修呎價估價如「強姦」
居於宏新閣約三年的羅太，批評最離譜是政府按測量師公會火災前、即屋苑正進行大維修時的呎價估價：「大維修緊一定係平㗎嘛，購買業權有咩可能用火災前大維修緊嘅樓價嚟計算，同強姦冇分別，你基本上用同區七年樓齡都正路啲吖。」她又指，就原區重建，廣福公園選址或宏福苑原址重建兩方案，最快 2033 或 2035 年才能入伙，現時兩年共 30 萬元的租金津貼用盡後，料政府未必再補貼，「咁就係你瞓街瞓到 2033 年，供緊樓嘅就繼續供空氣到 2033 年先有返層樓畀你住」。
羅太續指，現時未補地價、 431 呎的單位料值 200 多萬，若按同等價值只能換約 200 多呎單位；若她希望獲面積相若的單位，便可能要在未供完的 100 多萬之上，再自掏約 200 多萬元購買，「跳樓都唔掂啦！」她又指，宏福苑幾乎是大埔最好的地段，坐擁海景、交通方便，同樣估計政府希望取宏福苑的土地，日後讓華懋等發展商建豪宅，「佢仲要起高好多層、起多好多戶，咁咪賺到笑？」
有居民指社工要求十日內交回問卷，但自己「唔識揀」，亦有居民指下周實「覆唔到」社工。（資料相片）
居民紛質疑未提原址重建過渡方案
宏建閣李小姐指，下周將與社工見面，但認為根本「覆唔到」問卷，因沒有一個方案能安撫居民。她批評，政府在問卷完全沒交代，如果選擇原址重建，這 10 年間安置和支援安排如何，「佢嘅政策完全都冇設身處地考慮我哋，淨係睇吓點樣將市民捐俾我哋啲錢一嘢過洗晒佢」。她續指，基金的捐款是市民捐予災民，「點解會攞嚟回購呢？⋯畀政府袋返喎！」
她指，宏福苑是在政府要求下才做大維修，每家每戶亦付出十多萬，但政府監管不足，釀成火災，「我哋係最大嘅受害者」，政府現時引述的樓價估算僅約 200 多萬，「喺市區度，請問可唔可以買到一層樓係二百幾萬、四百幾呎？大埔同區都要最少一萬蚊一尺啦，咁我又要再供過樓啊？冇可能卦。」
宏新閣張小姐亦質疑，明明是政府的文件，就收購價標準，為何要用測量師學會，而非政府一貫市建局「同區七年樓齡」收購價？她指被要求 10 日內提交問卷，但「我都唔識揀」，「你當我等 10 年 8 年重建啦，咁點解唔話埋俾我聽呢 10 年 8 年我可以住邊呢？你叫我點樣揀呀？⋯好嬲我見到份嘢，可唔可以再仔細啲啊？佢而家刺激緊我哋啲居民啊。」
相關報道：宏福苑火災｜政府問卷三方向徵居民安置意願 未獨立問「原置重建」意向、指最快 2035 年入伙
