調查宏福苑火災的獨立委員會今（19日）舉行首場聽證會，申請成為涉事方的原法團委員江祥發、遺屬葉家駒、李先生三人會後一同離開。江祥發表示心情「梗係唔開心」，留意到有旁聽街坊離開時在電梯「爆喊」。他又指，大家對多名街坊離世心情沉痛，「即係如果168 條人命換返嚟咁嘅，啫係唔值得囉。」他又說，憤怒了很久但又如何，「出 order 叫我大維修，你又冇協助，圍標你哋知㗎又唔去幫，咁𠵱家燒咗成個邨喇。」
江祥發指，今日聽證會的資訊，比想像豐富中很多，有內部文件、WhatsApp 紀錄等，法團和居民手上沒有。對於暫時是否已知真相，他和葉家駒都表示，言之尚早。葉補充，很多資料都「好爆炸性」，「會令我哋覺得好譁然嘅，原來好多嘢都係假嘅」，稱有互相遮掩的情況。他希望委員會後續會有更多他們不知道、想知道的事，「我哋祈求會得到真相。𠵱家我哋都係只係，即係我哋都好多訊息，以前我哋從來都唔會諗到係咁。」
沒想到監管也隨便
江祥發和葉家駒都認為，最震驚、想不到的是棚網的問題。江表示：「我哋（法團）都未必可以睇到嗰啲資料，單呀嗰啲我哋唔知，佢一 show 出嚟，原來啫係咁嘅情況。」葉指本身也知道有假證書，不少傳媒也報道過，沒想到監管也隨便，「其實話真係嗰張（證書）係真係假，睇嗰個人都唔係好在意，咁呢個係令我震驚。」
對於房屋局獨立調查組測試棚網，著火後 10 秒有人吹熄，葉指：「呢個我哋應該係第一次見到。」江則表示，法團一直質疑棚網阻燃能力，他見到有脆化跡象要求更換，但承辦商只在颱風過後更換損壞棚網，因此多番寫信投訴，希望加快巡查保障居民安全。
江祥發又質疑，金額高達 3.3 億元的大維修是否街坊組成的法團可以處理，「你咁多專業團隊，又有持牌，咁你先至可以做到個顧問咁樣，或者係一個contractor，咁你冇可能會畀完全喺呢一方面唔熟悉嘅，掉返俾啲居民，啲居民嘅身份係咪真係係專業人士呢？」
有數棟燒毀地方不太多 「點解要拆咗佢呢？」
江祥發指政府要收購業權，但會上見到畫面是有數棟燒毀的地方不太多，「點解要拆咗佢呢？」他又指，收購文件不全，「你有沒有見過賣樓完全都冇嘢，冇賣樓表呀，乜都冇咁你叫我賣樓，唔係賣棵菜咩大佬！我哋有啲考量㗎嘛。」
葉家駒指，會上資料顯示只有約 50% 單位受到不同程度燒傷，亦不是全部「燒通頂」，但房屋局早前卻表示宏福苑的樓宇「豆腐咁」、「掂一掂就冧」。他直言：「咁你叫我哋點樣覺得你係要拆呀？我哋點解唔可以返去住呀？」江建議政府向居民提供驗樓報告和相片證明是危樓。
「點解間屋咁好，點解要拆咗我間屋？」
政府下月安排居民回家收拾，江預期居民配對家中情況有很大迴響。李先生就指會出現兩個問題，「一個問題就係個個睇吓邊個唔見咗幾多錢呀咁囉，點解間屋咁好，點解要拆咗我間屋？要收購我間屋？咁就要問吓政府先知。」
宏盛閣居民何小姐表示看到庭上的片段當然不開心，「火燭嘅情景，其實到依家呢刻都會喺個印象中。」她又說：「點解可以做一啲咁嘅犯法嘅嘢出嚟呢？咁你依家係害死晒啲人喎、168條人命（死得）真係好冤枉囉。」
被問到認為委員會能為否找到真相和使涉事官員問責，何小姐表示，當初對政府沒太大期望，「由呢一單嘢 Day 1到𠵱家四個月嘅時候，冇乜實則嘢同我哋講過，想話對政府有咩期望，我真係想唔到囉呢樣嘢。」
「冇一個官員落過台呀嘛依家」
但她亦指當然期望政府盡快出問責，給死者一個交代，「因為冇一個官員落過台呀嘛依家，佢哋仲要講到自己好啱呀嘛，尤其啲區議員啦。」因時間不合，她打算下星期二（24日）和月底31日才會再來聽證會。
會上提到部分樓宇雖有單位受損但數量較少，何對於政府也全座重建那些樓宇表示「當然唔同意」，指大律師在會上播放的相片「好多係冇乜損傷」。她又以自己居住的宏盛閣為例，會上提到只有她所居住的六號單位受損嚴重，而自己經常經過的觀察估計整棟大廈只有一、兩成損傷。
她形容政府要拆除七座重建匪疑所思，政府亦未提供數據予居民了解內裏情況，居民亦遲遲未能上樓收拾，直至居民向傳媒揭發懷疑有人盜竊，政府才公布上樓收拾安排。
何屬意原址重建，但政府已「一刀切」撇除這選項，她質疑當初做問卷是說初步意向，不牽涉最終選擇，「當晒你哋啲人個原址重建係廢嘅，夾硬搵一個咁嘅安排出嚟，我覺得對我哋唔係好公平囉！」
宏泰閣李小姐下午才到場旁聽，她旁聽的部分主要關於棚網，「原來佢哋互相之間好多隱瞞」。她認為，暫時未能下定論是哪個部門的責任，但之後補充：「環環相扣囉我覺得，佢哋彼此之間都有責任、都有疏忽。」
「賺錢賺到盡，罔顧咗安全」
對於承建商使用非阻燃棚網，她形容是荒謬， 「賺錢賺到盡，而係罔顧咗呢個安全，我覺得好冇人性。」她指自己誤會了以為每日內容相同，只有報了今日旁聽，但希望之後聆訊可以還真相於死者，因為自己也認識不少街坊離世。她指如有違規，一定要承擔法律後果。
「希望政府可企出嚟還災民一個公道」
她目前暫居鄰近邊境的博愛昇平村過渡性房屋，形容今日來旁聽非常遙遠。她也希望聆訊可以解答到上樓，形容大火令那麼多人無家可歸，更承受網上欺凌指控災民收了政府很多資源，「我覺得幾多錢都賠唔返我哋經營 40 年嘅住所囉，我希望政府可以企出嚟，還返災民一個公道。」
她又指政府安置很差，「好似好多方案可以揀，其實實質就冇得揀。」她解釋，聆訊尚未完結，災民又未上樓取回物品，但已預先公布業主須在8月31日前決定，災民要接收很多訊息也很辛苦。
相關報道：
宏福苑火災．獨立委員會｜殉職消防員何偉豪疑被困破窗墮樓亡 房屋局 ICU 檢測 棚網着火照過關宏福宏福苑火災．獨立委員會｜房屋局 ICU 通知巡查 “r u ok? “ 宏業及早準備 實地檢測 棚網着火照過關
宏福苑火災．獨立委員會｜殉職消防員何偉豪疑被困破窗墮樓亡 房屋局 ICU 檢測 棚網着火照過關
宏福苑火災．獨立委員會｜首度公開居民 999 求救錄音 居民指閉路電視畫面「震撼」
