宏福苑 4,000 多名居民大火後各散東西，鄰近的廣福商場及街市，人流和生意亦大幅下跌。《集誌社》記者於年廿五（12 日）到訪，現場人流冷清，有賣年貨的商舖嘆入少一半貨下，銷情仍不理想，只盼及早離場：「佢冇咗個家嘍，你叫佢買咩啫？⋯根本點可能有咁嘅心情？」
領展去年提出為商戶減租三成、維持最長 12 個月，有商戶認為減幅不足，盼減租一半；亦有尚餘兩年租約的商戶，指要求領展延長減租至租期完結無果，「根本就冇得傾」，嘆每天都是「白做」、「焗我死喺度」。
一片低氣壓下，曾發聯署爭取減租的商戶，自發向其他店主派發揮春和新年裝飾，望令商場「冇咁死氣沉沉」。領展表示，會持續留意商戶營運狀況，於現行寬減期結束前，評估是否有需要調整相關安排。
賣揮春銷情不佳：冇咗個家，買咩啫？
年近歲晚，街市應有不少市民辦年貨，不過記者年廿五（12 日）到訪廣福街市，人流稀少、亦有不少吉舖。街市一隅，一排排揮春掛滿整幅牆，紅海一片，這家香燭店自開業起每年都售賣揮春，至今已賣了 42 年。店主說自宏福苑火災後，生意下跌一半，以往過年前數天理應擠滿人，但現時人流冷清，「成條邨唔見咗，冇咗 5,000 人，你人流點會有啫？你旨意淨低嗰啲邊度夠力啫？」以往新年前仍要補貨，他今年特意減少進貨一半下，銷情仍不理想、遑論補貨，「我諗今年都要掉好多。」
舊街坊各散東西，偶有熟客回來與他聊天，但「佢冇咗個家，你叫佢買咩啫？你叫佢買啲揮春返去粘呀，佢邊有興趣？間屋都唔係自己嘅」，「一間唔係自己嘅屋，你都唔會裝修啦，好多嘢都冇意思㗎，根本點可能有咁嘅心情啫？」不少老街坊不幸喪生，他只能表達安慰，「人哋都咁慘喇，我哋少咗啲生意有乜所謂。」
現時 70 歲的店主說，他尚有一段時間才完約，但領展減租的幅度，遠不及他生意下降的金額，現時只望盡快離場，「佢畀我走我走㗎喇，快啲畀我走，做埋呢個節就走⋯我年紀又大喇，都做咗咁多年，算啦唉，退休啦。」
雜貨店主：過完年死火、最緊要求身體健康
同樣入少一半貨的，還有在街市經營雜貨店近 40 年的劉先生。在舖位入口的桌上，擺滿瓜子、糖果、年糕、腰果等賀年食品，劉先生同嘆生意下跌一半，以往年尾前數天，「人流呯呯聲」、貨品已清得七七八八，惟現時只餘「小貓三兩隻」。過年的貨品賣不完，日後潮濕時就要倒掉。
對於減租，劉先生說「有得減多少都好吖，冇得減你就死晒火啦，邊度有錢交租」。經營勉強，他說暫時為止「最多自己冇人工」，但過完年後「就有排死晒火喇」，「過咗年就好靜，乜嘢生意都難做。」
劉先生還有大約一年半的租約，面對慘淡生意，他說「無偈」，只能見步行步。回想火災頭一兩個月，每天待在這裡，心裡很不安落；臨近新年，他的心情才好轉了一些。完約後有何打算？「到時先算啦，做人唔好諗咁遠呀。」想到那些驟然離世的街坊，「有時啲嘢好難講，人生嗰啲唔好諗咁長呀⋯最緊要求自己身體健康。」
藥房餘兩年死約 領展僅保證減租一年
祥哥於火災前一年剛續約，現時還有兩年死約，但領展只願保證減租一年、而非整個租期，減租後也索價約 3 萬元。「死得喇已經，咁我咪白做兩年囉⋯你下年唔減我係咪要倒貼呢？我冇糧出我仲要倒貼，唔使供樓唔使養家呀？」他曾望與領展磋商、甚至找區議員協助也無果，對方堅持現時只會減租一年，「根本就冇得傾，佢都唔同你傾。」
祥哥於火災前一年剛續約，現時還有兩年死約，但領展只願保證減租一年，減租後也索價約 3 萬元。「死得喇已經，咁我咪白做兩年囉⋯你下年唔減我係咪要倒貼呢？我冇糧出我仲要倒貼，唔使供樓唔使養家呀？」他曾望與領展磋商、甚至找區議員協助也無果，對方堅持只會減租一年，「根本就冇得傾，佢都唔同你傾。」
從事藥房生意多年，祥哥深知做的是街坊生意，本小利微；離開了的客人不會再回來，即使順道來買些產品，也只是杯水車薪。他說得最多的是「無得搞」：「邊有可能開一間舖頭，無端端第二日瞓醒，冇咗 5,000 個客？咁無稽嘅嘢都發生咗，都唔知點搞」，「講乜都冇用㗎𠵱家，冇人幫到我們㗎，我哋講乜都呻吓㗎咋嘛。」
「我成個人生嘅 career 錯晒。」奮鬥多年，投放心血、時間進這門生意，不求發達、只求穩定，但如今連穩定也得不到，每天只能坐在櫃枱後反覆質疑自己能力、擔憂未來生計，「你𠵱家焗我死喺度，呢吓先死吖嘛。」
農曆新年，領展問他要否如往年般在店門前舞龍舞獅，他立即拒絕，「我話你係咪痴咗線呀⋯我話今年你唔好搞咁多嘢啦」，「我唔知你自己搞唔搞喇，我就唔主張唔建議。」新一年沒什麼願望，只想休息、平靜一下，「你都冇㗎啦，啲願望根本都唔會發生嘅。」
琴行老闆派新年裝飾：望不要太死氣沉沉
一片低氣壓之中，有商戶選擇以另一種方式面對。走在廣福街市和商場，可見部分店舖門外，掛上以利是封摺成的吊飾、又貼上排列整齊的「福」字揮春。增添新年佈置，是琴行老闆 Heidi 的主意，她的琴行在火災當日開張，去年尾曾發起聯署和做問卷，爭取領展提供長期減租方案，惟最終領展仍維持最長 12 個月的租金減幅。
領展稱有彈性交租安排，Heidi 說現時難以招收新生、亦難請新的老師，收入有限，在生活與交租之間，她選擇先顧及自己，因此暫未有交租；但未知數個月後情況如何、領展最終會否願意再寬減，只能「過得一個月得一個月」。Heidi 坦言自己情況不是最差，屬新租戶的她租金較便宜，工作亦較彈性，除教琴外可有其他音樂方面的收入來源，艱困環境下，會嘗試發掘來幫補生計。
Heidi 在琴行的壁報板上，貼上關於宏福苑安置方案的討論，她說自政府公布安置意向問卷後，望一直跟進，引起街坊關注與思考。她又說，認識的大部分宏福居民，都希望原址重建、質疑需時十年的基礎為何，望能一直留意事態發展。
曾在大埔教琴數年，去年 11 月接手經營，因收集問卷而與不少商戶聯繫，Heidi 感覺到商戶的不開心，「我𠵱家都唔夠膽再成日周圍提我哋仲可以做啲咩、做啲咩，因為真係冇嘢可以做。」商場大部分是服務老街坊的老店，Heidi 嘆在火災打擊與零售業寒冬下，部分租約快完的商戶只能順勢結業、退休。
希望商場「冇咁死氣沉沉」、「氹吓佢哋開心」，她和學生及附近教會寫了些揮春，派給其他商戶張貼，又用利是封摺成燈籠、金魚等吊飾，給商戶掛在門前。「我都幫唔到啲咩手，叫做做到少少嘢，咁咪做吓囉」，她相信做一些好事，會帶來一些好的結果，「你自己開心，別人又開心嘅話，到頭嚟你應該都唔會好差。」新一年，她只希望大家可以好好生活下去，過到想過的日子。
領展：寬減期結束前評估需否調整安排
《集誌社》向領展查詢，領展表示，已向廣福商場及街市商戶提供租金寬減方案，正在實行，並會持續留意商戶營運狀況，於現行寬減期結束前，評估是否有需要調整相關安排。領展又指，除直接提供租金支援外，透過社區層面安排回應受影響居民需要，有社福機構於廣福商場設立服務據點提供社區支援服務；領展亦在旗下大埔區商場推行情緒支援計劃。
