宏志閣業主周一（18日）陸續收到政府透過「收購宏福苑業權有限公司」發出的《接受收購建議信件》，最終宏志閣是否被納入收購方案，仍待全體業主決定。業主張小姐在樓價高峰購入單位，如出售業權將蝕約 60 萬元，但她仍傾向出售業權。「畀個清晰指引，好過佢咁拖拖拖拖到唔知幾時。好快就會換屆，政府換屆後可能又係另一個處理方法，到時可能再拖？」她期望政府決定是否收購宏志閣後，讓居民上樓搬走所有物品及真正與這個家道別。
原是下半生的家 盼大維修砌靚屋苑
2019 年，張小姐在樓價高峰以 500 多萬元購入宏志閣單位，其後為屋苑大維修再繳約 14 萬元。「我哋都出名天價㗎嘛，要履行合約精神都要畀錢。當初希望砌返靚成個屋苑，大家都住得舒服啲，相信好多人當時都無辦法，都照畀啦。」她舉例指，原裝單位無冷氣喉，每逢夏天滴水嚴重，期望大維修可改善。
張小姐本想在宏福苑住到老，以後將單位留給兒子。她自小在廣福邨長大，年輕時習慣租樓搬屋，笑稱自己是游牧民族，後來想回到廣福邨附近住近家人，對宏志閣單位一見鍾情。「我單位全部窗望海㗎，睇樓一睇就覺得哎好靚呀，喺大埔唔係好多單位會見到，同埋 sure 前面唔會起樓嘛。」張小姐為報道揀選的生活照是落日景色，是兒子與貓貓趴在窗邊休息，還有宏福苑具標誌性的鐵皮滑梯。
「其實點都係想我哋賣業權啫」
宏福苑火警發生當下，張小姐正在上班，小孩仍未放學，但家裡還有兩隻愛貓。牠們斷水斷糧三日後被消防員及愛協人員救出，平安無事。「無諗過出門之後會返唔到屋企。」宏福苑 7 座樓不度程度焚毀，剩宏志閣一幢倖免，全苑同被圍封。
政府公佈宏志閣不予收購，但要用至少 9 個月修葺，居民需再夾 3000 萬維修，而且回家無期。政府其後又說，除非今年 6 月 30 日有至少 75% 戶同意政府收購，當局會改為收購宏志閣，屆時若有業主拒授業權，財政司副司長黃偉綸表明「絕對有機會」以立法手段收回宏志閣單位。
有居民質疑修葺費過高，有居民疑問火險可否用作支付費用，但張小姐無意深究賬目。「算啦，都係一個數字嚟啫，都唔重要吖。講真，政府講幾多千萬，no one knows，都係講出嚟咋嘛，唔知係咪事實係咁，所以唔太執着。」她指自己不需要被說服，甚至已不太在乎。「你都同我講，如果我哋唔夠人賣嘅話，都要強拍、強收，其實點都係想我哋賣業權啫，𠵱家你同我講復修要幾錢，唔重要囉對我嚟講。」
難忍不確定性 欲賣樓重新開始
她坦言，曾經預備回到宏志閣繼續生活，但考慮到未來太多未知之數，例如屋苑原有的公共空間管理費如何攤分，也無法預知甚麼時間可以回家，加上屋苑環境已與大火前大相逕庭，與丈夫商量後，傾向出售業權予政府。「不如重新開始啦。我唔想等，我唔想人生前面全部係一個 unknown（未知），想自己掌握返可以掌握嘅嘢。」
根據政府方案，已補地價的單位每尺收購價為 10500 元，張小姐將會損失約 60 萬元，但她情願重新開始，不願再面對更多突如其來的變數。「由頭到尾，我都係講緊唔想啲嘢再拖，同埋唔係自己掌握，依家都唔係自己掌握㗎，但我可以停咗佢，可以重新再繼續行，即係再有生活嘛。」
宏志閣業主周一（18日）陸續收到政府透過「收購宏福苑業權有限公司」發出的《接受收購建議信件》，最終宏志閣是否被納入收購方案，仍待全體業主決定。張小姐未決定選「樓換樓」抑或現金，而她受訪時亦表示，理解有很多街坊對屋苑感情深厚，盼能原址重建，但自己立場是隨遇而安，「如果我係繼續再去拖，或者同政府周旋，我唔知要再拖幾耐嘛，所以我覺得（賣業權）OK 嘅」。
