巴黎奧運，羽毛球香港代表隊完成比賽，今（4日）晨回到香港，混雙組合「鄧謝配」在奧運過後，仍會繼續比賽，鄧俊文和謝影雪表示，八月和九月會參加日本、香港公開賽。鄧俊文說，心態上會放鬆些，「笑住打，可能會發揮得更好」。奧運八強戰後，兩人哭著訴說一段不離不棄、互相道謝的深情說話，場面感人，鄧俊文今日笑說：「𠵱家證明係冇揀錯」。
攝影：Nasha Chan
謝影雪表示，對奧運比賽沒有遺憾，「好感恩我可以完成比賽」，她憶述，比賽前曾甩骱，曾擔心未能出戰，「今次做到，更可享受這個舞台，發揮到應有水平，都好滿意」。
鄧俊文被問及，當初為何堅持選擇謝影雪做拍檔？他回應說，約在兩年前，發揮得不太好，阿雪傷後復出，「佢問我仲想唔想夾，佢未問我之前，我心裏都有答案，如佢想繼續打，我一定擺佢係第一位，傾完大家一條心，一路爭奧運分，直到𠵱家。𠵱家證明係冇揀錯啦，喺囉，哈哈」。
奧運過後，球迷仍可看到「鄧謝配」出賽，他們在八月尾加九月，會參加日本、香港公開賽，之後路向仍未有決定。鄧俊文表示，或先休息一會，沉澱一下，「打到幾時，之後再算」。
往後的「鄧謝配」比賽，鄧俊文說，心態上會放鬆一些，「個人會放啲，奧運完咗，唔太需要在意排名，好想享受每一個比賽每一分，有時會笑住打，更加enjoy個比賽，可能會發揮得更加好」。
談及未來，謝影雪表示，到這一刻，自己仍未退役，她指「由細到大」，都是靠前輩一代一代的帶起， 若有一日不再在前線，都想盡自己最大努力，去帶起年青運動員，爭取最好成績。
對於香港球迷通宵看直播打氣，鄧俊文說：「好多謝，無論凌晨比賽，好多人支持我哋，今次六點機到，都好多人支持，多謝，只能努力盡量回報給大家」。他又寄語隊友，第一次參加奧運「攞經驗為主，條路仲有好長可以行，繼續努力，唔好放棄」。鄧希望他們在奧運後再急起直追，將排名、實力提高，好好準備之後的大比賽。
鄧俊文和謝影雪，在 8 月 1 日奧運羽毛球混雙八強，對陣南韓「世界冠軍」組合徐承宰與蔡侑玎，以局數 0 比 2 落敗，無緣擠身四強。鄧俊文和謝影雪在賽後受訪時，真情流露，互相感謝對方，哭不成聲。
謝影雪飽受傷患困擾，她在奧運前一個月，確診類風濕關節炎，出發前一、兩周，右手甩骱。謝影雪在賽後受訪時曾透露，一個月前，連梳頭、擳牙膏也成問題，她哭著多謝拍檔鄧俊文「佢喺我練唔到嘅時候，佢好盡力做好自己，冇怪我受傷，冇怪我病，所以我好多謝佢一路都堅持……」。
她當時又指過去曾想過退役，感謝鄧俊文：「我又受傷咁多次，你都冇放棄我。亞運完咗我有問過佢，不如我退役啦，畀俊文夾個好啲。我自己都懷疑自己，都對自己冇信心，我都問過佢，不如你搵過個好啲既拍檔。但佢都堅持，繼續夾返我、冇放棄到我，所以我好多謝你。」鄧俊文當時也感謝阿雪每一次都沒有放棄，「好辛苦咁做返 recovery，所以好多謝佢。」「七年前，如果唔係遇到佢，未必有𠵱家嘅鄧謝配，或者𠵱家嘅鄧俊文。」
香港代表隊共有六位羽毛球運動員出戰巴黎奧運，包括混合雙打的鄧俊文、謝影雪、男子單打李卓耀、女子單打盧善恩、女子雙打楊雅婷、楊霈霖。李卓耀在 7 月 31 日，分組賽最後一場賽事，對中華台北「一哥」周天成，以局數 0 比 2落敗，無緣出線。他在賽後曾說，不滿意自己表現，認為自己情緒起伏很大，很想證明自己，「趁呢個咁大既舞台，可以證明畀人睇。可能賽前嚟呢度，都同教練講過，其實呢個係我唯一一個機會去證明畀人睇，邊個係李卓耀。」
