支聯會案裁決．庭外｜鄧燕娥：失望、憤怒　彤媽：希望環境健康啲　一女子被指衣服煽動被帶走

聚焦一周
2026-08-21
6:49 am
集誌社記者

支聯會被指「煽動顛覆國家政權」案，不認罪的支聯會、李卓人和鄒幸彤，被法官裁定罪成，押至下周五（28 日）求情。李卓人妻子鄧燕娥對判決表示「好憤怒，好失望」，鄒幸彤媽媽劉華珍說：「希望環境健康啲」。早上排隊黨壟斷前排位置，在街上留下不少垃圾，旁聽師昨晚開始前來，清晨有一女子，被警方指衣服懷疑有煽動意圖，被押上警車帶走。

彤媽：「希望環境健康啲」

散庭時，警方不准記者與受訪對象停留在大樓外。「睇車呀，小心呀，危險呀，過咗馬路先，繼續向前行，畀條路，畀條路，睇住，慢慢嚟⋯⋯」被告家屬離開法院時，現場警員不斷高呼維持秩序。鄒幸彤母親與前支聯會常委劉家儀受到大批記者追訪，至法院外天橋底，鄒母回以：「希望環境健康啲，乜嘢顏色嘅花草都可以綻放！就係咁多。」

劉家儀說，作為朋友和前常委，對判決感到失望，但案中人已等到短暫句號，「我哋𠵱然係覺得我哋一路以嚟係希望追求民主，我哋一路以嚟都係真誠地去悼念六四嘅死難者、去關懷天安門嘅母親」她希望大家再讀一次李卓人、鄒幸彤的陳詞，當中已清晰闡明不認罪緣由。

劉透露，兩人傾向繼續上訴，「為咗六四無罪，為咗悼念無罪，我哋依然會行法庭嘅路，繼續喺上訴歷程上面，去將真相、去將我哋所理解嘅講清楚，攤開喺陽光嘅視野下面，讓公眾一齊睇清睇楚論據係乜嘢，公道自在人心。」

劉說，李、鄒二人都是意志堅強的人，沒放棄信念，相信二人在獄中找到位置平安渡過直至自由，也不會放棄上訴。

鄧燕娥：失望、憤怒

李卓人妻子鄧燕娥對裁決感失望、憤怒。她在庭外說：「好憤怒，好失望，一路以來冇證據證明有不合法手段，都有罪，好令人失望，我自己都好嬲。會睇下求情點做，或者唔做。」她指李卓人「身體 ok 」，也精神，有調節自己心態，「係監獄生存之道」。

「阿牛」指港人共渡晚會多年　燭光不滅　

前社民聯成員曾健成（阿牛）對判決無奈、無助、難過，旁聽人士亦沒太大波動，因「激動嘅時代過咗」，「其實我好希望佢哋一判就放得返出嚟。」他說，六四燭光集會由港英時代到回歸，都是由警方與支聯會共同協調如何舉辦，不少港人家庭會在維園渡過每次六四，過程有序和平；在國安法訂立後，則被視為顛覆政權。但2019 年前「維園嘅燭光係不滅，無論風、無論雨都係繼續喺度。」

阿牛又指，現時特區講求愛國愛港、由治及興，所以現時鴉雀無聲，今日旁聽亦見證「越嚟越嚴苛」，「排隊都好，逐個搜身、逐個登記，入去法庭都係逐個放行，係透過大聲公一個一個，每一個入去旁聽都經過差人『木人巷』。」

「燭光嘅淚在心裡流」

支聯會被判罪成，阿牛透露月初曾探望鄒幸彤，她精神不俗，但始終已渡過五個生日，希望她盡早與家人、愛人團聚。對於日後悼念，阿牛只嘆，「我勸大家唔好啦，因為好容易犯法。燭光嘅淚在心裡流。」

前民主黨主席劉慧卿對二人被判罪成感到傷心，「其實搞咗咁多年（六四集會）都無嘢啦，有乜事啫？同埋搞嗰時係政府畀地方搞，我哋好多人都好唔明。」近日天氣酷熱，劉亦指有不斷去信懲教署反映情況盼改善獄中待遇。被問裁判會否感到過去三十多年被否定，劉慧卿說，「唉算啦，我又唔係律師又唔係咩，你等律師講，總言之我作為一個香港人，我係好傷心。」

今晨六時許，西九龍法院大樓外有逾 50 人排隊，排隊黨壟斷前排位置，也在路邊遺下大批垃圾。早上旁聽師陸續前來，一名女子被指衣服「有少少煽動意圖」被帶上警車押走。支聯會前常委鄧岳君的六四報章，被警禁帶入庭。牙醫李盈姿早上到場，一度被警截停，雙方爭論，李盈姿指有警員對她說：「你啲大佬入哂去坐緊監啦」。對於被告，她說：「多謝佢哋堅持同犠牲，六四永遠係我哋心中，直到平反一日」。

合十、高舉支聯會的 V 字手勢、身穿長毛汗衣，旁聽師入庭前，以不同方式表態。社運人士女長毛雷玉蓮、前社民連成員曾健成、佔中大黃伯等，都有到場。被告李卓人的妻子鄧燕娥、前天安門母親運動成員劉家儀，早上九時許到場。

一女子被指衣服懷疑有煽動意圖，清晨被押上警車。

一女子被押上警車

清晨五時許，一名便衣警察指，一名排隊女士「懷疑件衫有少少煽動意圖」，將她帶上警車離開。警員帶走該名女子時，另有數名警員一直指示記者離開，並指「帶你去記者採訪區」，將橙色封鎖線拉至近英華街方向，待該名女子登上警車後，又收起封鎖線。

T-Shirt 印有日文字

排在該女士附近的「旁聽師」阿偉指，該名女子身穿黑色 T-Shirt，上面只印有日文字，不解警方為何指她的 T-Shirt 具煽動意圖。阿偉表示，本周二晚上曾到過西九龍法院一帶，當時已見到有一批人排隊，當時有警員要求他循英華街離開，並引述警員稱「今晚唔准排」，但未有解釋原因。阿偉說，對於支聯會過去立場理解但不認同，至於裁決結果，阿偉表示已經有心理準備，指「想睇吓法官判辭點寫」。

「旁聽師」阿偉指，該名女子身穿黑色 T-Shirt，上面只印有日文字。

警禁鄧岳君帶「六四」報道入庭內

支聯會前常委鄧岳君，今早帶同明報於1989 年 6 月 11 日的「六四」報道，以及 2019年的「六四三十周年」報道，以及一批印上「紀念六四 22 周年」、「辛亥革命 100 周年」的書籤，原打算排隊旁聽。

他被警方告知有關物品印有「支聯會」、「平反六四」，以及孫中山的「革命尚未成功，同志仍需努力」等字眼，不能帶入庭內，如要排隊，警方會代為保管。他指，曾向警方表明不會在庭內展示仍然遭拒，決定不入內，在法院外等待裁決。

「我嘅理解之下都仲未係犯法嘅物品」

被問到為何堅持，他表示，「我覺得此刻喺裁決前，我覺得可能係有灰色地帶，我覺得暫時呢啲嘅物品⋯⋯我嘅理解之下都仲未係犯法嘅物品。咁所以如果佢（警方）話已經係涉嫌一啲（煽動）、有啲違禁品嘅感覺，我唔接受。我唔認同嘅話，點解要好似畀你繳械咁？做呢個無底線嘅妥協？」

對於裁決，鄧指屬於法官決定，會平常心應對，但個人而言不認為支聯會有罪。他續指，如支聯會罪成是顛覆過去法律認知，「唔係一國兩制已死，但係起碼一國兩制好明顯地一個劇烈倒退。」

便衣與李盈姿爭論：「你啲大佬入哂去坐緊監啦」

牙醫李盈姿稱，大前晚過馬路時已被警員叫停，指現場已有七十多人，今日只開兩個庭，「話我哋冇位，唔好過去」。她和友人堅持要到場，結果被查身份證。「我畀佢查，佢攔住我，唔准過去，話排滿晒。」

李盈姿說，現場有某一位警員「特別火爆」，雙方有言語衝突，「佢哋話嗰度 80 人，得咁多警察，佢哋控制唔到場面，唔准我哋過去。我哋話呢條路嚟，點解唔可以行？」李盈姿引述對方稱：「我話唔得就唔得」。「我話你咁安排令市民好憎你哋囉。佢就話，我都好憎你呀。你睇吓你啲大佬入哂去坐緊監啦，你跟埋入去啦，仲有好多好難聽對話」。