專業傳承 在地記錄

舞台劇獎|以「風」為題 馮祿德:寓感化人心、吹走陰霾

分享:

被藝發局撤資助、遭康文署拒租場的香港舞台劇獎,透過自行賣物籌得經費,今晚(29日)於灣仔碼頭的私人宴會廳舉行第 32 屆頒獎禮,獲提名最佳男主角的黃子華、林海峰,最佳女主角的田蕊妮、最佳男配角麥沛東等人出席即持(見另稿)。去屆頒獎禮主題為「勇氣」,今屆則為「風」,劇協會長馮祿德強調主題「句句都係正面」,寓意滋養生命、感化人心,又盼清新的風「吹走以往積落嚟嘅陰霾」; 他透露明年會繼續申請資助,「唔批准到時先算」。

今屆頒獎禮舉行形式與上屆有別,如因場地座位有限、不設公眾人士和傳媒入場;頒獎典設網上直播,但不設重播功能;另由劇協幹事輪流主持、由得獎者作頒獎嘉賓。馮祿德指劇協一直本符初心,做合法合理合情的事,而藝術發展求新求變是自然趨勢,「今晚有咩新構思,唔一定係因為目前環境、或者要顧忌甚麼,我哋要遷就做啲乜嘢。」強調不會降低原則,仍用藝術手法追求真善美。

文字:陳萃屏;攝影:Paul Yeung

獲提名最佳男女主角的黃子華、林海峰、田蕊妮今晚出席頒獎禮。

馮祿德在頒獎禮前接受訪問,形容心情輕鬆愉快,因一切順利。

劇協下午舉行綵排,馮祿德在頒獎禮簽名板上簽下第一個名字。他受訪時形容心情輕鬆愉快,因一切順利,「過去兩三個月籌備頒獎禮,都係保持輕鬆,好似冇事發生過嘅心態,咁處事先會順利,未來先會樂觀,同埋世界要繼續轉。」他指尋找私人場地作頒獎場地頗困難,因考慮會否影響市民生活,「唔係所有表演場地都係香港政府管轄,唔會影響民居生活,一引起哄動就唔好,亦都會影響公安……」指頒獎禮最後在灣仔私人宴會廳舉行,遠離市區又有特色,「做起上來安樂點。」

頒獎禮主題為「風」,馮德祿強調取其善意,寓意感化人心,也希望清新的風「吹走陰霾」。

主題為「風」 馮祿德:滋潤生命、感化人心「句句都正面」

去屆頒獎禮主題是「勇氣」,今屆則為「風」,馮祿德指風是自然界現象,有好、有壞的一面,強調劇協取其善意,「唔好估喇,我哋講到明,係揀善嗰面唔係惡嗰面,唔好屈我。」他解釋藝術工作者在疫情後齊心重建香港,傾力於藝術創作,如一股股氣流匯聚一起成風,表現不同的風格、風采,帶來風尚,能夠滋潤生命、感化人心,如化育萬物的春風,「句句都正面㗎」。

馮祿德又說,盼望清新的風「吹走以往積落嚟嘅陰霾」,無論陰霾是因何原因而積落,他又以大會主題圖片設計形容,「你睇到我哋晨光曦微,啲雲都好好、慢慢曙光出現,愈來愈光明,吹走晒啲黑雲、唔好嘅嘢」。

馮形容主題圖片設計是「晨光曦微」,曙光慢慢出現、愈見光明,「吹走晒啲黑雲、唔好嘅嘢」。

下屆擬申請資助:「跟對方重要人物傾偈透露過」

被問到會否再申請資助, 以今晚的頒獎禮向藝發局「表態」,馮祿德說今晚的表現不是表態,而是以平常心進行:「所謂平常心態,曾發生小風波又好、大風波又好,當佢冇發生過。我哋係唔係都係咁樣去準備,繼續去做,繼續創新,都係繼續劇人精神,盡力做到最好」。對於明年如何舉辦頒獎禮,馮指仍未有最後決定,但指「曾同對方有關嘅重要人物傾偈透露過」,劇協覺為全港市民和下一代服務,申請公帑屬「好合理」。他又指無論基於甚麼理由「唔批准到時先算」,但會抱著樂觀希望,「得唔到資助嘅,就睇現實環境再睇點做。」

為舉行今屆頒獎禮,劇協透過賣紀念品籌募經費,馮祿德多次感謝熱愛香港話劇、支持香港舞台劇的市民,指若有餘款會撥歸下一年,但指「希望唔洗啦,(望) 名正言順公開申請」到政府費用,又指「出年有冇錢唔知喇…唔可以成日攤大手板叫人買嘢」,但船到橋頭自然直,「到時唔得再算啦,天無絕人之路」,首要把今晚做好。

馮祿德強調不喜望用「封殺」、「打壓」字眼,認為不應鬥爭,應從樂觀、光明方向思考。

今屆形式安排不同 馮:本符初心,求新求變屬自然

至於被撤資助和打壓,是否有信心再度獲資助?馮祿德強調在上次記者會已說,不喜歡用「封殺」、「打壓」這類字眼,「大家都係為香港好的市民,盡心盡力做好本份,願意追隨政府指出的光明的方向,點解要有敵我雙方、點解成日要鬥爭呢,點解唔可以一齊做好佢?」他強調不知未來會如何發展,「我哋從樂觀、光明方向思考,但係有時,人事嘅野、一時嘅決定我冇得控制,但我哋劇協或劇界,我地一向光明、希望嗰方面去。希望唔好有咁的情況(封殺、打壓)出現,正常的現象唔會係咁出現。」

在去年的頒獎禮,劇協其中一宗罪,包括邀請「充滿新聞話題」的時事漫畫家尊子及前港台記者蔡玉玲等任頒獎嘉賓。今次的嘉賓有否經過再篩選?馮祿德說,他們一直本符初心,做合法合理合情的事:「係唔會踩任何嘢、觸犯法律嘅嘢。但至於其他人心情係點,鍾意邊個、唔鍾意邊個,我地冇得估測。」

他強調劇協是按主題安排頒獎禮,而藝術發展求新求變是自然趨勢,「如果發覺今晚有咩新構思,唔一定係因為目前環境、或者要顧忌甚麼,我哋要遷就做啲乜嘢。你會睇到我哋係純粹,可能礙於客觀環境、地方唔同咗;礙於人手;或者礙於行之有年,大家睇到厭喇」。他希望公眾不要猜估,強調「我哋係坦誠直率,依家表達多咗,驚有啲人好容易覺得太隱晦、含蓄唔明,就點明少少嗰類」,不會降低原則,仍然用藝術手法追求真善美。

頒獎禮形式與上屆有別,如因場地座位有限、不設公眾人士和傳媒入場,記者要在場外看直播;劇協又指網上直播將不設重播功能。

藝發局年初提「三宗罪」削資助

去年 6 月舉行的第 31 屆舞台劇獎,被藝發局指指活動內容、安排有「不妥之處」扣減和撤資助,康文署亦不再提供場地。當時頒獎禮的主題為「勇氣」,意指在疫情、表演場地連番關閉下的艱難時刻,業界憑藉勇氣迎難而上;大會以此主題邀請政治漫畫家尊子、電影導演杜琪峯、新聞工作者蔡玉玲等人作頒獎嘉賓。

到今年一月中,藝發局指頒獎禮對局方聲譽「造成損害或不利影響」,其後列出劇協「三宗罪」,包括邀「充滿新聞話題」的時事漫畫家尊子及前港台記者蔡玉玲等任頒獎嘉賓;主持人以「紅橋」、「紅線」意有所指、語帶雙關,局方「不能苟同」以此手法引起公眾注意及製造社會話題,劇協之後召開記招反駁

香港舞台劇獎於 1992 年初由劇協創辦,每年舉行一次。翻查資料,藝發局由 1998 年開始,最少資助 342 萬;最近 15 屆頒獎禮均連續在康文署轄下場地舉行。