融樂會解散|官方指完歷史任務光榮引退 前總幹事批荒謬另起爐灶  指有人「我唔做,又唔想畀人做」

分享:

最新進展:

融樂會解散|創辦人王惠芬開腔:清盤好過被人招搖撞騙 批謝永齡言論不實 感遺憾、震驚

主席莊明蓮:要決定呢樣嘢係唔易

融樂會主席莊明蓮在特別會員大會後,連同副主席 Puja Kapai Paryani、司庫鄭保華見記者。她表示,融樂會成立之初,幾乎沒有機構專門服務少數族裔,宗旨、初心是倡議少數族裔權益,而 24 年過去,認為原則上大部分已達到,例如在 2008 年已通過《種族歧視條例》、曾挑戰小一和初中派位制度,確保少數族裔學生進入主流學校等,現時超過 30 間社福機構,服務少數族裔。

莊指,自動清盤在兩三年前已有討論,非今日的決定;曾與以前董事討論,除少部分不同意,絕大部分也同意解散決定,「有啲人甚至話早啲」,創辦人王惠芬亦支持。她重申解散跟政治、經濟原因無關:「唔係政治,都唔係經濟,我哋咁耐做倡議工作,當然係困難,但係立例《種族歧視條例》係過到,任何倡議係喺何時代都會有困難,唔覺得幫少數族裔爭取權益特別困難。」

「成立初心已做到」

莊表示解散後,對服務沒大影響,因融樂會是一個倡導、為少數族裔充權的機構,不會有幾多人到輔導中心、接受輔導服務。財政方面,融樂會約有 400 萬元,要支付同事遣散費、長期服務金等,估計仍有錢剩餘,會再開會員大會,商討給予跟融樂會初心一致的機構。

談及解散感受,莊明蓮指與鄭保華均是創會董事,24 年前與王惠芬一起考慮是否成立機構:「呢 24 年來甜酸苦辣、甘苦與共,我哋都做咗好多,要決定呢樣嘢係唔易」。但她重申,看到以往「冇乜機構做、政府又唔理」,至現時逾 30 間機構做相關工作,涵蓋教育、就業、健康,亦看到政府願「擺少數族裔喺一個重點」。「當然有啲嘢可以改善,永遠都可以繼續改善,但我哋成立嘅初心,我哋覺得係做到,我哋係有啲情緒、亦都有啲難過,呢樣嘢係我哋親手成立,而家做自動清盤,係有感觸,但我哋幾次開會,都覺得呢個係正確嘅做法」。

還有何工作需要關注?她指例如《種族歧視條例》太多豁免,執行需要改善,少數族裔學習中文方面,仍需繼續努力。記者會約 15 分鐘結束,臨別前,莊明蓮說:「好多謝你哋關注,以後靠你哋啦,大家努力。」「好多謝大家,希望大家繼續關注少數族裔嘅聲音,同佢哋權益」。

前總幹事謝永齡:融樂會說法欠說服力、荒謬

「炒咗㗎啦!」融樂會的官方記者會剛落幕,前總幹事謝永齡和前項目主任木慧雅,即舉行「場外記者會」。對融樂會指已實現使命及目標而解散,謝永齡指說法欠說服力、「荒謬」,「就好似一間醫院嘅管理層,話我間醫院已經醫夠病人,醫好咗好多㗎啦,咁我就要執笠,呢個肯定係罔顧仲有病人喺度輪候啦」 。他指昨才做了六小時的學校講座,今融樂會就要解散,「12 分鐘內,解散一個 24 歲嘅慈善機構,係非常可惜,不負責任」。

謝表明,不贊成解散,亦在會員大會獲授權投下唯一一張反對票。他指香港對少數族裔仍存有歧視,「好老實講,大家睇吓,香港社會,冇對少數族裔嘅歧視咩?冇種族主義咩?」,「每日都遇到,最普遍就係佢行入車廂,香港人係彈開㗎⋯⋯你滿意咩?我好唔滿意」,批評解散如把頭埋在沙中,「明明有問題,你唔睇咋嘛」。

「有啲人當咗融樂會係一個私人機構」

謝永齡確認,融樂會沒受任何政治壓力、亦非財政不足,接近消息人士告訴他,解散理由最有可能是「我唔做,又唔係幾想畀人做,不如解散」。他形容做法奇怪,指一般機構董事局成員不足,會再找新董事,但融樂會沒有這樣做;及至他找到人想加入,董事局亦不接納,他批評「呢個唔係一個好嘅原因,我會形容係不負責任嘅做法」。

對於解散具體原因,謝坦言作為總幹事,有兩個會議未獲邀請,對會上討論不知情。他猜測,「有啲人對於增權、倡導睇法好狹隘,窄到一個地步,認為只能叫口號、遊行、拉橫額一啲較『極端』行為」,有人或認為倡導「根本冇得做」。但他認為,倡導很闊、不只針對政府,仍有很多不同層面的做法,「最緊要幫到人」。

「慈善機構不是私人公司」

謝強調,融樂會是慈善機構,不是私人公司,有社會責任為少數族裔謀幸福、若解散亦應廣泛諮詢獲同意,但「有啲人當咗融樂會係一個私人機構,話拉閘就拉閘」,他質疑:「清盤點解要咁快呢?點解唔謀求一啲方案解決問題呢?呢個真係耐人尋味」。

對於解散過程,謝永齡批評過程密不透風,事前沒有正式諮詢職員,亦不准接觸任何捐助者、義工、少數族裔,沒有好好溝通解釋。謝指,他於去年約九、十月才得悉融樂會擬解散,獲指示須保密和停止所有項目,木慧雅更於今年一月尾才得知;期間謝與慈善機構洽談時不能透露原因,致過程「好難做」、個人誠信破產。謝又指,他曾多次要求停止接收捐款,但執委會稱不能向捐助者透露擬解散決定,最終直至一月尾才停收捐款,批評做法不負責任。

估計有約百人受影響

雖然被指示停止所有項目,但謝認為有部分項目不可能停止,「我真係唔能夠依從」,故與職員繼續進行至今,包括少數族裔生涯規劃、功課輔導、學校講座、社工實習等,「我哋啲服務係有用,係成個社會、特別少數族裔會得益」。

現時融樂會解散,謝估計有約百名服務對象受影響。在融樂會工作兩年多的木慧雅指,消息一出,收到很多電話,有媽媽哭着問「點算」,「我哋真係唔知點樣可以同媽媽、小朋友或者老師交代融樂會已經冇咗」。事件在少數族裔間亦引起迴響,不少人在社交媒體抗議指歧視仍然存在,甚至有人罵木慧雅,指她作為少數族裔,同令社群失望。

連同謝永齡和木慧雅在內,融樂會有約五至六名職員,木指全部職員都不同意決定,「個個都唔開心」。木又指,融樂會成立逾廿載,是少數族裔社群的支柱(backbone),她對決定感到很失望和受傷,「今天我們令所有社群失望⋯⋯(解散)沒有任何原因,他們說任務已完成,但我認為任務才剛開始」。

謝永齡指,現時有逾百名義工,及十多個捐助者,他指捐助者「唔係幾開心」、因事前無獲得通知,有人得知消息後向他說解散是「巨大錯誤」、消息令人沮喪。二人決定籌辦新團體「香港多元動力」(Hong Kong Initiative for Diversity),延續現時少數族裔服務。