財政預算案 2025｜郁「兩蚊搭車」　公務員照有增薪點　長者質疑：你哋止蝕，我哋要蝕

聚焦一周
2025-02-27
11:15 am
集誌社記者

財政預算案昨（26日）發表，財政司司長陳茂波今出席電台節目，有市民質疑，長者兩蚊搭車優惠被削，但公務員凍薪後照有增薪點，如何跟市民「共渡時艱」，「你哋止蝕，我哋要蝕。」主持問及陳茂波，會否感到「人人負少少責任，但你得罪晒所有人？」，陳茂波以「哈哈哈⋯⋯」回應。

市民陳小姐致電電台表示，公務員凍薪，而市面好多NGO，都會跟政府步伐。她表示，自己在NGO工作，「如我公司都跟政府咁做法，咁會影響我哋生計，減少消費能力，影響政府稅收，對改善政府財赤盤數無助。會否呼籲半官方、私人機構唔好凍薪？」

陳茂波表示，聽到的聲音，對問責官員，公務員薪金的應作出處理，所以決定凍薪。經公帑出糧機構一致行動，所以立法會等都凍薪，希望能理解。

63歲的林先生表示，兩蚊搭車方面，「65歲以上真係唔應搞佢」。他續說：「搞呢個兩蚊，但喺公務員你凍薪，都可跳point，咁點解我要付出多啲，但公務員唔係共渡時艱。你哋止蝕，我哋要蝕。」「啲議員，都油治及興啦，係咪唔需要咁多個？個條數好大」。

陳茂波回應指，兩蚊搭車方面，看過每日出行八次，對 65 歲長者足夠使用。凍薪方面，過去兩年經濟增長，私人市場有加人工，回復財政平衡，政府有加強境整合計劃，所以凍薪合適。至於公務員增薪點，他指每年要做工作評核，「要考慮佢哋工作表現」。

主持人問陳茂波，會否感到「人人負少少責任但你激嬲晒所有人？」陳茂波以「哈哈哈」回應。

此外，聽眾蘇小姐對兩蚊搭車變兩折的慳錢成效有懷疑，她說：「你話慳兩蚊，有冇個數？將嗰兩蚊當咗係同財赤掛勾」。陳茂波回應指，每年會「慳到幾億」，重點是要控制未來的增長幅度。他表示，有要求巴士公司在部分路線，引入分段收費，「有超過 100 條路線可做」，但要評估繁忙及非繁忙時間，對交通的影響等。

黃先生指自己是中產人士，對預算案表示失望，「（退）差餉又減，兩個細路（每人 2500元學生津貼取消），每年跌五千呀」。聽眾伍先生說，現時政府的財政，已變成結構性財赤，以往能靠賣地收入，但現時東涌賣地，呎價 1500 元，「成本都未夠，起鐵路要舉債，賣地收入支撐支出神話破滅」。陳茂波回應指，特區政府不想、不認為應靠土地收入支持財政，認為可努力發展經濟，利得稅收入約有 1700億；薪俸稅也處於穩定水平。