新一份財政預算案交代「北都」新政，向三間園區公司注資 300 億元，又分兩年調撥 1500 億外匯基金到基本工程儲備基金，支持北都在內的基建項目；在「派糖」方面，財爺提出退稅 3000 元、調整免稅額等措施。陳茂波今（26日）出席電台 phone-in，有不少聽眾投訴預算案對中產幫助不大、無助鼓勵生育，亦有市民質疑預算案把「九成錢揼晒落北都」是「益深圳」，陳回應指「錯喇」，重申「投資北都係好值得」，因引進企業落戶最終會令香港得益。
市民曾先生今早在節目中，質疑政府「點解將九成錢揼晒落北部都會區」，如北環線等建築項目，他指興建新市鎮非簡單事，需時十年八載，「希望將錢分啲畀香港市民、派啲錢畀我哋？因為咁落去香港會冧，得益嘅係深圳」，另指近日到新商場行街，「行入去之後好似死城」。
陳茂波回應指投資北都是值得，「剛才曾生話益晒深圳，錯喇」。他續指政府以前投資和撥款創科發展，但商業化生產落戶內地，經濟得益者是深圳和大灣區，現時發展做法是引進企業落戶香港北都，「咁稅收、就業、商業化係我哋」，亦能用用香港平台打進內地和國際市場，「所以正正係曾生誤解」。
亦有市民引述科技園使用資金做定期存款的例子，關注政府如何監督三間專屬公司，確保撥款用得其所。陳茂波指科技園公司需要資源實行擴充計劃，包括透過存款和透過市場組織商業貸款，過渡期間需要有積蓄有儲備，重申撥款予北都三間園區公司的 100 億是起始資金，鼓勵社會透過其他方式如土地、資金等合作發展。他又強調會為園區公司設 KPI 緊察，包括財政、引進企業和創造職位等數目。
市民質疑拒派消費券 諮詢意見「左邊入右邊出」
有期望政府派錢落空的市民致電質疑決定。鄧先生指去年預算案已失望，今年更失望，指派錢和消費券「完全冇下文」，批評陳茂波就預算案作諮詢，但「意見聽完左邊入右邊出」，舉例指澳門「派錢派足 19 年，一年比一年多」，批評香港落後。
陳茂波回應指目前零售餐飲市場「穩住，亦可以講扭轉之前跌勢，氛圍相當唔錯」，他說訪港旅客有所增長，市民「都見到旺咗好多」，重申在政府發債、投資基建情況下，「今年都係打和」，亦在力所能及範圍內，在調整免稅額方面做了大量功夫，又說「我睇到如果一個家庭有兩個小朋友，其實今次預算案各項措施，佢一年都慳成萬蚊以上」。他強調政府會繼續舉辦盛事、吸引旅客訪港，「搞活動搞旺個場」，令市民生意更好、有更多就業機會和更高收入。
中產嘆未獲益 基層愁醫療
節目中亦有不少中產表示受惠不多，有市民問到在子女免稅額方面，能否按子女數目採用累進制，以鼓勵生育。亦有市民指家庭月入七萬元兼育有小孩，但「好多福利都享受唔到」，希望政府提供更多支援予中產家庭。
陳茂波指希望市民體諒經濟剛恢復，政府財政剛剛有所改善，未來亦要發債、要整體平衡和兼顧各方面，今次已提升個人、子女、供養父母免稅額，認為長遠有效益，又指「計過數，每年少收幾十億」，今年各項支援措施「成條單加埋 220 幾億」，重申能夠做的會盡力做。
另外有不少基層關注醫療費用改革、申請寬免門檻高，令不少市民生活百上加斤。亦有患癌症正接受治療的病人，表示已屆退休年齡但因要支付標靶藥費而要繼續工作，指「乜嘢福利都冇拎過，冇盼望將來日子點過」，希望政府給予支援。陳茂波強調，政府在醫療方面的承擔相當大，已不斷增撥開支，收費開革是以按能力共付為原則，政府仍承擔九成以上，現行有機制可處理不同市民的情況，會檢討申請寬免手續能否簡化。
相關報道：財政預算案 2026｜北都再投 300 億背後 河套園區、新田科技城、洪水橋三區預算已近千億
財政預算案 2026｜轉撥 $1500 億外匯基金至工程儲備基金 1984 年以來首次 陳茂波：擺喺北都都係做投資
財政預算案 2026｜發債計「收入」 千億赤字變 29 億「盈餘」 未來五年發 9700 億債
財政預算案 2026｜ 恢復盈餘 退稅 $3000 北都、創科最少投放$ 400億 轉撥外匯基金搞基建
