有初創廣告公司，近日利用在街頭的閒置電子廣告牌做禁煙「社會實驗」，投放「吸煙致陽痿」的巨大化廣告，聲稱「一分鐘唔使啲煙鏟就走晒」，周四（2 日）更應網民建議「加碼」推出更嚇人的「吸煙致爛腳」的新廣告。
這場以「放大恐懼」來禁煙的「社會實驗」，效果如何？
《集誌社》記者到場了解，發現在巨大化的可怕圖象廣告牌下，不少煙民仍「無畏無懼」，如常煲煙。有煙民認為，廣告的效果，與煙盒上的煙害圖象警示相若，若當下不是特別想吸煙時或可奏效，也有煙民稱廣告效果誇大、針對，反問「吸毒死咁多人，佢又唔登？」
策劃的廣告公司受訪指，單靠煙民取煙盒看到煙害圖象警示一秒並不足夠，冀透過持續放廣告給煙民一種罪惡感勸阻在公眾地方吸煙。
round 1：廣告公司稱「一分鐘唔使啲煙鏟走晒」
根據政府統計處數字，香港 15 歲以上人士的吸煙率持續下降。不過走在街頭，不時會看見煙民在垃圾桶旁「吞雲吐霧」打邊爐。不吸煙的市民或要忍受二手煙的危害。一間初創廣告公司，近日於深水埗鴨寮街一間藥房招牌的大型電子廣告牌，推動禁煙「社會實驗」。藥房門口正好對著一個煙蒂箱，不時有煙民聚集吸煙，公司近日就利用它投放「吸煙致陽痿」廣告，配上變得彎曲、燃燒中的香煙圖片，周四晚六至八時應網民建議，「加碼」推出「吸煙致爛腳」的新廣告，寫道「截肢風險高兩倍」並配上腳趾呈瘀黑、腳背有潰爛的圖片。
公司周三（1 日）在社交媒體聲稱，想善用空閒時間做個「社會實驗」，「點知一分鐘唔使啲煙鏟就走晒⋯⋯」
round 2：加碼放「吸煙致爛腳」照 數十人煙照食
記者周四晚六時許到場觀察約一小時，目測「廣告」效果，似乎與廣告公司說的有出入。這邊廂「吸煙致陽痿」和「吸煙致爛腳」的巨型廣告熱播；廣告牌下數十名煙民，不停在煙蒂箱旁吸煙。據記者觀察，約有一半煙民有望向廣告牌，但就未見有人會因而立刻「放下屠刀」。「阻嚇力」似減退，廣告公司及後發文說：「爛腳啲煙鏟好似有啲抵抗力」。
Round 3：煙民：睇得多就冇乜感覺
已吸煙數年的林先生指，未有太特別留意廣告。他認為，廣告與煙盒上的煙害圖象警示相似，效果亦相若，「睇得多就冇乜感覺」。他解釋，當不是特別想吸煙時，看到這類警示就不會吸，「如果你特別煩燥嗰時呢，就會想食㗎喇。」但他又指可能見得多，「睇到都會有啲囉囉攣嘅感覺」，特別是「爛腳」的傷口，「可能我對呢啲嘢比較恐懼少少」。
被問到煙癮大時是否就會照吸，正奮力煲煙的林先生指，自己準備不再吸煙，因為平常看到煙盒上的警示，加上自己身體問題，目前已由每日吸一兩包減至五、六支。
煙民：你有冇見人食煙爛手爛腳嘅
吸煙逾 20 年、通常每日吸一包煙的李先生，似乎不太喜歡廣告，他說：「吸毒死咁多人，佢又唔登？食口煙好平常咋嘛。」他批評廣告「吹水」、「誇張過頭」，稱「其實冇咁誇張，你何必咁誇張？爛手爛腳，你有冇見人食煙爛手爛腳嘅？」他又聲稱「食少少冇問題」，「人哋食咗幾十年都咁樣」。
煙齡十多年的沈先生質疑：「呢個唔係咁誇張呀嘛？」對於廣告的警示和圖片，他表示不會怕，已經習慣了，「我覺得冇咩事」。記者問及會否擔心廣告所說的陽痿和爛腳，他說「呢啲唔會」，他指有些人會怕，但自己「我都食慣咗」。他之後補充聲稱：「邊有人食煙食到咁樣呀，係咪？咁誇張。」他指自己每日吸半包，「食少啲囉，唔好食咁多。」
round 4：吸煙對健康影響科普
根據衛生署控煙酒辦資料，吸煙會導致末梢血管疾病，令四肢的末梢血管出現病變，增加血管栓塞的機會。若遇上損傷，傷口會因血液供應不足而使癒合速度減慢，還可能出現發炎、變黑、甚至壞疽而需要截肢。澳門衞生局資料顯示，吸煙與血栓閉塞性血管炎（其中一種末梢血管疾病）有密切的關係，患病後持續吸煙者截肢率可達四至五成，即約每兩人就有一人須截肢。
final round：策劃人現身 「純粹撚吓啲煙鏟」
策劃這個廣告的廣告公司 Hyperbill 兩位創辦人嘉禧和 Kelvin 接受《集誌社》訪問稱，目的「純粹撚吓啲煙鏟」。Kelvin 解釋，公司的一些屏幕目前接完廣告仍有空閒時間，正好這個屏幕位置正對「著名煙剷勝地」，「我哋經過都覺得唔舒服啦，我哋就喺度諗，做返啲正常啲嘅嘢啦不如」，遂善用屏幕空餘時間投放戒煙廣告。
Kelvin 又認為，此處一個戒煙的標示也沒有，「政府係咪做少咗嘢？」他指單靠煙盒上煙害圖象警示並不足夠，「佢望到包裝個陽萎，一秒㗎咋嘛，同埋我哋 keep 住喺佢哋側邊提你，繼續食就陽萎，個效果嚟計，邊個好用啲先？」之所以一開始會選陽萎這個後果，是因為深水埗年長的男性多，他們認為這個年紀白男性「懶係自己好叻」、「死要面」，認為陽萎會最能勸阻他們繼續吸煙。他形容這樣會給煙民一種罪惡感，「我望一望個陽萎廣告，再望一望你，咁你已經尷尬，即刻唔想食。」
指首日「煙鏟散得快」
Kelvin指，一直都有想這樣做的想法，到最近終於實行，運用 AI 製作圖片，認為第一天效果不錯。他當日襯著假期在場觀察，「發覺掂喎，呢鋪！啲煙鏟散得好快喎。」他指曾見過有煙民吸煙時，被碰巧經過的朋友搭著膊頭，指著「吸煙致陽萎」那張說「你睇吓！」他認為，當煙民吸煙時被相熟朋友見到，然後旁邊的廣告板是這種戒煙警示，「啲阿叔都會笑啲阿叔」，「令佢哋好似有啲突然之間覺得，係咪應該要捏熄支煙呢？」
對於昨日仍有不少煙民照樣吸煙，Kelvin 指自己昨日也有在場，質疑有部分人是看到他們在社交媒體的預告，特意過來吸煙。嘉禧就形容，本來這處吸煙的人多得令環境「好似寺廟入面，黃大仙嗰種 level」，「以前呢度太誇張，（煙霧）肉眼可見」，認為即使有一小時內有幾十人照樣吸煙也算有效果。
反感公眾地方吸煙 「同打人一樣」
兩人都指自己並非特別討厭煙民，Kelvin 甚至會接受在社交場合吸煙，「social 煙嘅話，人哋真係遞畀我嘅話，我係會食嘅。」「人哋遞畀我，有時有啲嘢⋯⋯你都識得話 social 啦！」
對在公眾地方吸煙反感
不過他們都對在公眾地方吸煙反感，嘉禧認為這種行為欠缺公德，「你唔覺得公眾地方食煙，個性質同公眾地方打人一樣㗎咩？你都係攻擊緊人㗎？」對於煙民質素針對，他們就回應：「你唔好食囉！」Kelvin 就認為，街上會有小孩等等，吸煙會影響到人，「有人覺得我哋多管閒事，都有人覺得我哋為民除害，好多添啦！」
